ਸਪੋਰਟਸ, 23 ਦਸੰਬਰ 2025: Sports News: ਮਹਿਲਾ ਕ੍ਰਿਕਟ ਰੈਂਕਿੰਗ ‘ਚ ਦੋ ਨਵੀਆਂ ਨੰਬਰ 1 ਖਿਡਾਰਨਾਂ ਉੱਭਰ ਕੇ ਸਾਹਮਣੇ ਆਈਆਂ ਹਨ। ਭਾਰਤ ਦੀ ਦੀਪਤੀ ਸ਼ਰਮਾ ਪਹਿਲੀ ਵਾਰ ਟੀ-20 ਅੰਤਰਰਾਸ਼ਟਰੀ ਗੇਂਦਬਾਜ਼ਾਂ ਦੀ ਰੈਂਕਿੰਗ ‘ਚ ਸਿਖਰਲੇ ਸਥਾਨ ‘ਤੇ ਪਹੁੰਚ ਗਈ ਹੈ, ਜਦੋਂ ਕਿ ਦੱਖਣੀ ਅਫਰੀਕਾ ਦੀ ਕਪਤਾਨ ਲੌਰਾ ਵੋਲਵਾਰਡਟ ਨੇ ਵਨਡੇ ਬੱਲੇਬਾਜ਼ਾਂ ‘ਚ ਨੰਬਰ-1 ਸਥਾਨ ਪ੍ਰਾਪਤ ਕੀਤਾ ਹੈ।
ਦੀਪਤੀ ਨੇ ਭਾਰਤ ਅਤੇ ਸ਼੍ਰੀਲੰਕਾ ਵਿਚਾਲੇ ਘਰੇਲੂ ਟੀ-20 ਸੀਰੀਜ਼ ਦੇ ਪਹਿਲੇ ਮੈਚ ‘ਚ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਬਦੌਲਤ ਇਹ ਉਪਲਬਧੀ ਹਾਸਲ ਕੀਤੀ। ਵਿਸ਼ਾਖਾਪਟਨਮ ‘ਚ ਖੇਡੇ ਗਏ ਇਸ ਮੈਚ ‘ਚ ਉਨ੍ਹਾਂ ਨੇ 4 ਓਵਰਾਂ ‘ਚ 20 ਦੌੜਾਂ ਦੇ ਕੇ 1 ਵਿਕਟ ਲਈ, ਜਿਸ ਨਾਲ ਭਾਰਤ ਦੀ ਜਿੱਤ ਦੀ ਨੀਂਹ ਰੱਖੀ। ਇਸ ਪ੍ਰਦਰਸ਼ਨ ਨੇ ਦੀਪਤੀ ਨੂੰ 5 ਰੇਟਿੰਗ ਅੰਕ ਹਾਸਲ ਕਰਨ ‘ਚ ਮੱਦਦ ਕੀਤੀ, ਜਿਸ ਨਾਲ ਦੀਪਤੀ 737 ਅੰਕਾਂ ਨਾਲ ਨੰਬਰ 1 ‘ਤੇ ਪਹੁੰਚ ਗਈ।
ਦੀਪਤੀ ਹੁਣ ਆਸਟ੍ਰੇਲੀਆ ਦੀ ਐਨਾਬੇਲ ਸਦਰਲੈਂਡ ਤੋਂ ਸਿਰਫ਼ ਇੱਕ ਅੰਕ ਅੱਗੇ ਹੈ। ਸਦਰਲੈਂਡ, ਜੋ ਅਗਸਤ ਤੋਂ ਸਿਖਰਲੇ ਸਥਾਨ ‘ਤੇ ਸੀ, ਇਸ ਰੈਂਕਿੰਗ ਅਪਡੇਟ ਤੋਂ ਬਾਅਦ ਦੂਜੇ ਸਥਾਨ ‘ਤੇ ਖਿਸਕ ਗਈ ਹੈ। ਦੀਪਤੀ ਦੀ ਟੀਮ ਦੀ ਸਾਥੀ ਜੇਮੀਮਾ ਰੌਡਰਿਗਜ਼ ਨੇ ਵੀ ਇਸ ਰੈਂਕਿੰਗ ਅਪਡੇਟ ‘ਚ ਮਹੱਤਵਪੂਰਨ ਵਾਧਾ ਕੀਤਾ ਹੈ।
ਜੇਮੀਮਾ ਟੀ-20 ਬੱਲੇਬਾਜ਼ਾਂ ‘ਚ ਪੰਜ ਸਥਾਨਾਂ ਦੀ ਛਾਲ ਮਾਰ ਕੇ ਨੌਵੇਂ ਸਥਾਨ ‘ਤੇ ਪਹੁੰਚ ਗਈ ਹੈ। ਉਸਨੇ ਵਿਸ਼ਾਖਾਪਟਨਮ ‘ਚ ਸ਼੍ਰੀਲੰਕਾ ਵਿਰੁੱਧ 44 ਗੇਂਦਾਂ ‘ਤੇ ਨਾਬਾਦ 69 ਦੌੜਾਂ ਦੀ ਮੈਚ ਜੇਤੂ ਪਾਰੀ ਨਾਲ ਭਾਰਤ ਨੂੰ ਜਿੱਤ ਦਿਵਾਈ ਸੀ। ਟੀ-20 ਬੱਲੇਬਾਜ਼ਾਂ ਦੇ ਸਿਖਰਲੇ 10 ‘ਚ, ਭਾਰਤ ਦੀ ਸਮ੍ਰਿਤੀ ਮੰਧਾਨਾ ਤੀਜੇ ਸਥਾਨ ‘ਤੇ ਬਣੀ ਹੋਈ ਹੈ ਅਤੇ ਸ਼ੈਫਾਲੀ ਵਰਮਾ ਦਸਵੇਂ ਸਥਾਨ ‘ਤੇ ਹੈ।
Read More: ਵਿਜੇ ਹਜ਼ਾਰੇ ਟਰਾਫੀ ‘ਚ ਖੇਡਣਗੇ ਸ਼ੁਭਮਨ ਗਿੱਲ, ਪੰਜਾਬ ਟੀਮ ਦਾ ਐਲਾਨ
