ਉੱਤਰ ਪ੍ਰਦੇਸ਼, 31 ਜਨਵਰੀ 2026: ਖੰਘ ਵਾਲੀ ਸ਼ਿਰਪ ਦੀ ਤਸਕਰੀ ‘ਚ ਸ਼ਾਮਲ ਭੋਲਾ ਪ੍ਰਸਾਦ ਜੈਸਵਾਲ ਵਿਰੁੱਧ ਪੁਲਿਸ ਦੀ ਵੱਡੀ ਕਾਰਵਾਈ ਜਾਰੀ ਹੈ। ₹28.50 ਕਰੋੜ ਦੀ ਜਾਇਦਾਦ ਜ਼ਬਤ ਕਰਨ ਤੋਂ ਬਾਅਦ, ਸੋਨਭੱਦਰ ਪੁਲਿਸ ਨੇ ਹੁਣ ਕਰੀਬ ₹5.77 ਕਰੋੜ ਦੀ ਵਾਧੂ ਜਾਇਦਾਦ ਜ਼ਬਤ ਕੀਤੀ ਹੈ। ਇਸ ਨਾਲ ਨਸ਼ੀਲੇ ਪਦਾਰਥਾਂ ਦੇ ਤਸਕਰਾਂ ਤੋਂ ਗੈਰ-ਕਾਨੂੰਨੀ ਜਾਇਦਾਦਾਂ ਦੀ ਕੁੱਲ ਜ਼ਬਤ ₹34.27 ਕਰੋੜ ਤੋਂ ਵੱਧ ਹੋ ਗਈ ਹੈ।
ਇਹ ਕਾਰਵਾਈ ਪੁਲਿਸ ਸੁਪਰਡੈਂਟ ਅਭਿਸ਼ੇਕ ਵਰਮਾ ਦੇ ਨਿਰਦੇਸ਼ਾਂ ਹੇਠ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਵਿਰੁੱਧ ਚੱਲ ਰਹੀ ਮੁਹਿੰਮ ਦੇ ਹਿੱਸੇ ਵਜੋਂ ਕੀਤੀ ਸੀ। ਰੌਬਰਟਸਗੰਜ ਪੁਲਿਸ ਸਟੇਸ਼ਨ ‘ਚ ਦਰਜ ਐਫਆਈਆਰ ਦੇ ਆਧਾਰ ‘ਤੇ ਭੋਲਾ ਪ੍ਰਸਾਦ, ਜੋ ਕਿ ਕਾਇਸਥ ਟੋਲਾ, ਪ੍ਰਹਿਲਾਦ ਘਾਟ ਦਾ ਰਹਿਣ ਵਾਲਾ ਹੈ, ਵਿਰੁੱਧ ਐਨਡੀਪੀਐਸ ਐਕਟ ਤਹਿਤ ਕਾਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ।
23 ਜਨਵਰੀ ਨੂੰ ਅਦਾਲਤ ਦੇ ਹੁਕਮਾਂ ਦੀ ਪਾਲਣਾ ‘ਚ 28.50 ਕਰੋੜ ਰੁਪਏ ਦੀ ਚੱਲ ਅਤੇ ਅਚੱਲ ਜਾਇਦਾਦ ਪਹਿਲਾਂ ਹੀ ਜ਼ਬਤ ਕਰ ਲਈ ਗਈ ਸੀ। ਇਸ ਤੋਂ ਬਾਅਦ, ਵਾਰਾਣਸੀ ਜ਼ਿਲ੍ਹੇ ‘ਚ ਮੁਲਜ਼ਮ ਅਤੇ ਉਸਦੇ ਪਰਿਵਾਰਕ ਮੈਂਬਰਾਂ ਦੀਆਂ ਜਾਇਦਾਦਾਂ ਨੂੰ NDPS ਐਕਟ ਦੀ ਧਾਰਾ 68-F ਦੇ ਤਹਿਤ ਜ਼ਬਤ ਕੀਤਾ ਗਿਆ।
ਸ਼ਨੀਵਾਰ ਨੂੰ ਪੁਲਿਸ ਨੇ ਮਦੌਲੀ, ਭਰਲਾਈ ਅਤੇ ਜਗਦੀਸ਼ਪੁਰ ਖੇਤਰਾਂ ‘ਚ ਸਥਿਤ ਸੱਤ ਅਚੱਲ ਜਾਇਦਾਦਾਂ ਜ਼ਬਤ ਕੀਤੀਆਂ, ਜਿਨ੍ਹਾਂ ਦੀ ਕੀਮਤ ਲਗਭਗ ₹4.55 ਕਰੋੜ ਹੈ। ਚਾਰ ਲਗਜ਼ਰੀ ਵਾਹਨ ਅਤੇ ਹੋਰ ਵਾਹਨ, ਜਿਨ੍ਹਾਂ ਦੀ ਕੀਮਤ ਲਗਭੱਗ ₹51 ਲੱਖ ਹੈ, ਉਨ੍ਹਾਂ ਨੂੰ ਵੀ ਜ਼ਬਤ ਕੀਤਾ ਗਿਆ। ₹70.99 ਲੱਖ ਦੇ ਬੈਂਕ ਖਾਤੇ ਵੀ ਜ਼ਬਤ ਕੀਤੇ ਗਏ, ਜਿਸ ਨਾਲ ਜ਼ਬਤ ਕੀਤੀਆਂ ਗਈਆਂ ਜਾਇਦਾਦਾਂ ਦੀ ਕੁੱਲ ਕੀਮਤ ₹5.77 ਕਰੋੜ ਹੋ ਗਈ। ਜ਼ਬਤ ਕੀਤੇ ਗਏ ਵਾਹਨਾਂ ‘ਚ ਇੱਕ ਫਾਰਚੂਨਰ ਲੈਜੇਂਡਰ, ਇੱਕ ਹੁੰਡਈ ਆਈ20, ਇੱਕ ਐਕਟਿਵਾ ਅਤੇ ਇੱਕ ਵੈਸਪਾ ਸਕੂਟਰ ਸ਼ਾਮਲ ਹਨ।
ਇਕੱਲੇ ਫਾਰਚੂਨਰ ਦੀ ਕੀਮਤ ਲਗਭੱਗ ₹40 ਲੱਖ ਹੈ। ਜ਼ਬਤ ਕਰਨ ਦੀ ਕਾਰਵਾਈ ‘ਚ SIT ਇੰਸਪੈਕਟਰ ਪ੍ਰਣਯ ਸ਼੍ਰੀਵਾਸਤਵ, ਹਥੀਨਾਲਾ ਸਟੇਸ਼ਨ ਹਾਊਸ ਅਫਸਰ ਨਾਗੇਸ਼ ਸਿੰਘ ਅਤੇ ਡਾਲਾ ਚੌਕੀ ਇੰਚਾਰਜ ਘਨਸ਼ਿਆਮ ਤਿਵਾੜੀ ਸਮੇਤ ਇੱਕ ਪੁਲਿਸ ਟੀਮ ਸ਼ਾਮਲ ਸੀ। ਪੁਲਿਸ ਸੁਪਰਡੈਂਟ ਅਭਿਸ਼ੇਕ ਵਰਮਾ ਨੇ ਕਿਹਾ ਕਿ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਅਤੇ ਇਸ ਰਾਹੀਂ ਪ੍ਰਾਪਤ ਕੀਤੀ ਗਈ ਗੈਰ-ਕਾਨੂੰਨੀ ਜਾਇਦਾਦਾਂ ਵਿਰੁੱਧ ਸਖ਼ਤ ਅਤੇ ਨਿਰੰਤਰ ਕਾਰਵਾਈ ਜਾਰੀ ਰਹੇਗੀ। ਅਜਿਹੇ ਅਪਰਾਧੀਆਂ ਨੂੰ ਕਿਸੇ ਵੀ ਹਾਲਤ ‘ਚ ਬਖਸ਼ਿਆ ਨਹੀਂ ਜਾਵੇਗਾ।
Read More: Cough Syrup: ਖੰਘ ਦੀ ਦਵਾਈ ਪੀਣ ਤੋਂ ਬਾਅਦ 16 ਬੱਚਿਆਂ ਦੀ ਮੌ.ਤ, ਜਾਂਚ ਲਈ SIT ਦਾ ਗਠਨ
