ਚੰਡੀਗੜ੍ਹ, 07 ਮਾਰਚ 2023: ਨੈਸ਼ਨਲ ਪੀਪਲਜ਼ ਪਾਰਟੀ ਅਤੇ ਭਾਜਪਾ ਦੀ ਗਠਜੋੜ ਦੀ ਮੇਘਾਲਿਆ ਸਰਕਾਰ ਦਾ ਅੱਜ ਸਹੁੰ ਚੁੱਕ ਸਮਾਗਮ ਹੋਇਆ। ਕੋਨਰਾਡ ਸੰਗਮਾ (Conrad Sangma) ਨੇ ਅੱਜ ਮੇਘਾਲਿਆ ਦੇ ਮੁੱਖ ਮੰਤਰੀ ਵਜੋਂ ਸਹੁੰ ਚੁੱਕੀ। ਇਸ ਤੋਂ ਬਾਅਦ ਉਨ੍ਹਾਂ ਦੇ ਮੰਤਰੀ ਮੰਡਲ ਵਿੱਚ ਸ਼ਾਮਲ ਹੋਏ ਹੋਰ ਆਗੂਆਂ ਨੂੰ ਸਹੁੰ ਚੁਕਾਈ ਗਈ। ਪ੍ਰੋਗਰਾਮ ‘ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੋਂ ਇਲਾਵਾ ਗ੍ਰਹਿ ਮੰਤਰੀ ਅਮਿਤ ਸ਼ਾਹ, ਭਾਜਪਾ ਪ੍ਰਧਾਨ ਜੇਪੀ ਨੱਡਾ ਵੀ ਪਹੁੰਚੇ। ਸਹੁੰ ਚੁੱਕ ਸਮਾਗਮ ਸ਼ਿਲਾਂਗ ਦੇ ਰਾਜ ਭਵਨ ਵਿੱਚ ਹੋਇਆ। ਪ੍ਰੈਸਟਨ ਟਿਨਸੋਂਗ ਅਤੇ ਐਸ ਧਰ ਨੇ ਮੇਘਾਲਿਆ ਦੇ ਉਪ ਮੁੱਖ ਮੰਤਰੀ ਵਜੋਂ ਸਹੁੰ ਚੁੱਕੀ ਹੈ ।

ਸ਼ੈਕਲੀਅਰ ਵਜਰੀ, ਅਬੂ ਤਹਰ ਮੰਡਲ, ਕਿਰਮੇਨ ਸ਼ਿਲਾ, ਮਾਰਕੁਸ ਐਨ ਮਾਰਕ ਅਤੇ ਰਾਕਮ ਏ ਸੰਗਮਾ ਨੇ ਵੀ ਮੇਘਾਲਿਆ ਵਿੱਚ ਐਨਪੀਪੀ ਦੀ ਅਗਵਾਈ ਵਾਲੀ ਗੱਠਜੋੜ ਸਰਕਾਰ ਵਿੱਚ ਮੰਤਰੀ ਵਜੋਂ ਸਹੁੰ ਚੁੱਕੀ।

ਮੇਘਾਲਿਆ ਵਿੱਚ, ਭਾਜਪਾ ਦੇ ਦੋ ਵਿਧਾਇਕਾਂ ਸਮੇਤ 45 ਵਿਧਾਇਕਾਂ ਦੇ ਸਮਰਥਨ ਨਾਲ ਐਨਪੀਪੀ ਦੀ ਅਗਵਾਈ ਵਾਲੇ ਗੱਠਜੋੜ ਨੇ ਸਰਕਾਰ ਬਣਾਉਣ ਦਾ ਦਾਅਵਾ ਪੇਸ਼ ਕੀਤਾ ਹੈ। ਐਨਪੀਪੀ ਮੁਖੀ ਕੋਨਰਾਡ ਕੇ ਸੰਗਮਾ ਦੀ ਪਾਰਟੀ ਨੇ 27 ਫਰਵਰੀ ਨੂੰ ਹੋਈਆਂ ਚੋਣਾਂ ਵਿੱਚ 26 ਸੀਟਾਂ ਜਿੱਤੀਆਂ ਸਨ। ਭਾਜਪਾ ਅਤੇ ਇਸ ਦੇ ਸਹਿਯੋਗੀਆਂ ਨੇ ਤ੍ਰਿਪੁਰਾ ਅਤੇ ਨਾਗਾਲੈਂਡ ਵਿੱਚ ਸੱਤਾ ਬਰਕਰਾਰ ਰੱਖੀ, ਜਦੋਂ ਕਿ ਮੇਘਾਲਿਆ ਵਿੱਚ, ਨੈਸ਼ਨਲ ਪੀਪਲਜ਼ ਪਾਰਟੀ (ਐਨਪੀਪੀ) ਸਭ ਤੋਂ ਵੱਡੀ ਪਾਰਟੀ ਵਜੋਂ ਉਭਰੀ ਹੈ, ਜਿਸਨੂੰ ਭਾਜਪਾ ਦਾ ਸਮਰਥਨ ਹੈ |