Maha Kumbh 2025 Live Updates: ਪ੍ਰਯਾਗਰਾਜ ‘ਚ ਮਹਾਕੁੰਭ ਚੱਲ ਰਿਹਾ ਹੈ ਅਤੇ ਸੰਗਤਾਂ ਦੀ ਆਮਦ ਜਾਰੀ ਹੈ | ਪ੍ਰਯਾਗਰਾਜ ਸ਼ਹਿਰ ਪੂਰੀ ਦੁਨੀਆ ‘ਚ ਕਾਫ਼ੀ ਮਸ਼ਹੂਰ ਹੈ। ਹਿੰਦੂ ਧਰਮ ‘ਚ ਕੁੰਭ ਮੇਲਾ ਹਰ 12 ਸਾਲਾਂ ‘ਚ ਚਾਰ ਪਵਿੱਤਰ ਸਥਾਨਾਂ ‘ਤੇ ਲੱਗਦਾ ਹੈ | ਮਹਾਂਕੁੰਭ ਮੇਲੇ ਦੀ ਹਰ ਅਪਡੇਟ ਲਈ ਸਾਡੀ ‘ਦ ਅਨਮਿਊਟ’ ਵੈੱਬਸਾਈਟ ਨਾਲ ਜੁੜੇ ਰਹੋ |
11 ਫਰਵਰੀ 2025 ਅਪਡੇਟ
ਪ੍ਰਯਾਗਰਾਜ ਮਹਾਂਕੁੰਭ ਮੇਲਾ ਖੇਤਰ ‘ਚ ਤ੍ਰਿਵੇਣੀ ਸੰਗਮ ‘ਚ ਪਵਿੱਤਰ ਡੁਬਕੀ ਲਗਾਉਣ ਲਈ ਸ਼ਰਧਾਲੂਆਂ ਦੀ ਇੱਕ ਵੱਡੀ ਭੀੜ ਪਹੁੰਚ ਰਹੀ ਹੈ।
ਕਨਕਲੇਵ 16 ਫਰਵਰੀ ਨੂੰ ਮਹਾਕੁੰਭ ‘ਚ ਹੋਣ ਜਾ ਰਿਹਾ ਹੈ। ਜਿਸ ‘ਤੇ ਜੰਗਲਾਤ ਅਤੇ ਪੰਚਾਇਤੀ ਰਾਜ ਵਿਭਾਗ ਦਾ ਬਿਆਨ ਸਾਹਮਣੇ ਆਇਆ ਹੈ। ਉਹ ਕਹਿੰਦੇ ਹਨ ਕਿ ਜਲਵਾਯੂ ਪਰਿਵਰਤਨ ਦੇ ਵਿਸ਼ੇ ‘ਤੇ ਇੱਕ ਸੰਮੇਲਨ ਹੋਵੇਗਾ।
ਹੁਣ ਪ੍ਰਯਾਗਰਾਜ ਮਹਾਂਕੁੰਭ ਦਾ ਪ੍ਰਭਾਵ ਸਕੂਲਾਂ ਅਤੇ ਕਾਲਜਾਂ ‘ਚ ਦਿਖਾਈ ਦੇ ਰਿਹਾ ਹੈ। ਸ਼ਰਧਾਲੂਆਂ ਦੀ ਆਮਦ ਨੂੰ ਦੇਖਦੇ ਹੋਏ ਯੂਪੀ ਦੇ ਕਈ ਜ਼ਿਲ੍ਹਿਆਂ ‘ਚ ਸਕੂਲ ਬੰਦ ਰੱਖਣ ਦਾ ਐਲਾਨ ਕੀਤਾ ਗਿਆ ਹੈ। ਮਹਾਂਕੁੰਭ ਦੇ ਉਲਟ ਪ੍ਰਵਾਹ ਕਾਰਨ ਵਿੰਧਿਆਚਲ ‘ਚ ਭਾਰੀ ਭੀੜ ਇਕੱਠੀ ਹੋਣ ਦੇ ਮੱਦੇਨਜ਼ਰ, ਮਿਰਜ਼ਾਪੁਰ ‘ਚ ਸਕੂਲ ਨੂੰ ਤਿੰਨ ਦਿਨਾਂ ਲਈ ਬੰਦ ਕਰਨ ਦਾ ਆਦੇਸ਼ ਦਿੱਤਾ ਗਿਆ ਹੈ।
10 ਫਰਵਰੀ 2025 ਅਪਡੇਟ
ਦੇਸ਼ ਦੇ ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਨੇ ਸੰਗਮ ਵਿਖੇ ਪਵਿੱਤਰ ਡੁਬਕੀ ਲਗਾਈ ਅਤੇ ਪੰਛੀਆਂ ਨੂੰ ਖਾਣਾ ਖਵਾਇਆ | ਇਸ ਤੋਂ ਪਹਿਲਾਂ ਭਾਰਤ ਦੀ ਪਹਿਲੀ ਨਾਗਰਿਕ, ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ ਦੇ ਪਵਿੱਤਰ ਕੁੰਭ ਸ਼ਹਿਰ ਪ੍ਰਯਾਗਰਾਜ ਵਿਖੇ ਪਹੁੰਚਣ ‘ਤੇ ਪ੍ਰਯਾਗਰਾਜ ਦੇ ਪਹਿਲੇ ਨਾਗਰਿਕ, ਮੇਅਰ ਉਮੇਸ਼ ਚੰਦਰ ਗਣੇਸ਼ ਕੇਸਰਵਾਨੀ ਨੇ ਪ੍ਰਯਾਗਰਾਜ ਮਹਾਂਨਗਰ ਦੀ ਚਾਬੀ ਭੇਟ ਕਰਕੇ ਉਨ੍ਹਾਂ ਦਾ ਸਵਾਗਤ ਕੀਤਾ।
ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ 12 ਫਰਵਰੀ ਨੂੰ ਮਾਘੀ ਪੂਰਨਿਮਾ ਇਸ਼ਨਾਨ ਤੋਂ ਪਹਿਲਾਂ ਪ੍ਰਯਾਗਰਾਜ ਰੇਲਵੇ ਸਟੇਸ਼ਨ ‘ਤੇ ਪ੍ਰਬੰਧਾਂ ਦਾ ਨਿਰੀਖਣ ਕੀਤਾ। ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਕਿਹਾ ਕਿ “ਰੇਲਵੇ ਨੇ ਪ੍ਰਯਾਗਰਾਜ ਮਹਾਕੁੰਭ ਲਈ ਅੱਠ ਰੇਲਵੇ ਸਟੇਸ਼ਨਾਂ ‘ਤੇ ਸਾਰੇ ਪ੍ਰਬੰਧਾਂ ਦਾ ਧਿਆਨ ਰੱਖਿਆ ਹੈ। ਕੱਲ੍ਹ ਪ੍ਰਯਾਗਰਾਜ ਜੰਕਸ਼ਨ ਤੋਂ 330 ਰੇਲਗੱਡੀਆਂ ਰਵਾਨਾ ਹੋਈਆਂ ਅਤੇ ਅੱਜ ਵੀ ਰੇਲਗੱਡੀਆਂ ਯੋਜਨਾਬੱਧ ਢੰਗ ਨਾਲ ਚੱਲ ਰਹੀਆਂ ਹਨ।
08 ਫਰਵਰੀ 2025 ਅਪਡੇਟ
ਕੁੰਭ ‘ਚ ਆਉਣ ਵਾਲੇ ਸ਼ਰਧਾਲੂਆਂ ਦੀ ਗਿਣਤੀ ਲਗਭਗ 42 ਕਰੋੜ ਤੱਕ ਪਹੁੰਚ ਗਈ ਹੈ। ਪਰ ਫਿਰ ਵੀ ਦੇਸ਼ ਭਰ ਤੋਂ ਆਉਣ ਵਾਲੇ ਲੋਕਾਂ ‘ਚ ਬਹੁਤ ਉਤਸ਼ਾਹ ਹੈ | ਲੋਕ ਸਵੇਰ ਤੋਂ ਸ਼ਾਮ ਤੱਕ ਉਸੇ ਰਫ਼ਤਾਰ ਨਾਲ ਇਸ਼ਨਾਨ ਕਰਨ ਲਈ ਪਹੁੰਚ ਰਹੇ ਹਨ।
ਮਹਾਂਕੁੰਭ ਦੌਰਾਨ ਕਿਲ੍ਹਾ ਘਾਟ ਤੋਂ ਕਿਸ਼ਤੀਆਂ ਦਾ ਸੰਚਾਲਨ ਪੂਰੀ ਤਰ੍ਹਾਂ ਬੰਦ
ਮਹਾਂਕੁੰਭ ਵਿੱਚ ਸ਼ਰਧਾਲੂਆਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਕਿਲਾ ਘਾਟ ਤੋਂ ਕਿਸ਼ਤੀਆਂ ਦਾ ਸੰਚਾਲਨ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤਾ ਗਿਆ ਹੈ। ਹੁਣ ਸਿਰਫ਼ ਜਲ ਪੁਲਿਸ ਅਤੇ ਐਨਡੀਆਰਐਫ ਟੀਮਾਂ ਹੀ ਕਿਸ਼ਤੀਆਂ ਰਾਹੀਂ ਗਸ਼ਤ ਕਰ ਸਕਣਗੀਆਂ, ਤਾਂ ਜੋ ਕਿਸੇ ਵੀ ਐਮਰਜੈਂਸੀ ਵਿੱਚ ਤੁਰੰਤ ਮਦਦ ਪ੍ਰਦਾਨ ਕੀਤੀ ਜਾ ਸਕੇ।
07 ਫਰਵਰੀ 2025 ਅਪਡੇਟ
ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ 10 ਫਰਵਰੀ ਨੂੰ ਸੰਗਮ ‘ਚ ਇਸ਼ਨਾਨ ਕਰਨਗੇ। ਉਹ ਇੱਥੇ ਲਗਭਗ ਪੰਜ ਘੰਟੇ ਰਹਿਣਗੇ। ਇਸ ਦੌਰਾਨ ਉਹ ਤ੍ਰਿਵੇਣੀ ‘ਚ ਇਸ਼ਨਾਨ ਕਰਨ ਦੇ ਨਾਲ-ਨਾਲ ਅਕਸ਼ੈਵਟ ਅਤੇ ਵੱਡੇ ਹਨੂੰਮਾਨ ਮੰਦਰ ਵੀ ਜਾਣਗੇ ਅਤੇ ਪੂਜਾ ਕਰਨਗੇ। ਰਾਸ਼ਟਰਪਤੀ ਦਫ਼ਤਰ ਤੋਂ ਇਜਾਜ਼ਤ ਮਿਲਣ ਤੋਂ ਬਾਅਦ ਵੀਰਵਾਰ ਨੂੰ ਮੇਲਾ ਅਤੇ ਪੁਲਿਸ ਪ੍ਰਸ਼ਾਸਨ ਵਿਚਕਾਰ ਇੱਕ ਬੈਠਕ ਹੋਈ। ਇਸ ‘ਚ ਰਾਸ਼ਟਰਪਤੀ ਦੇ ਪ੍ਰੋਗਰਾਮ ਨੂੰ ਅੰਤਿਮ ਰੂਪ ਦਿੱਤਾ ਗਿਆ। ਇਸ ਦੇ ਨਾਲ ਹੀ ਰਾਸ਼ਟਰਪਤੀ ਦੇ ਪ੍ਰੋਗਰਾਮ ਦੀਆਂ ਤਿਆਰੀਆਂ ਸ਼ੁਰੂ ਹੋ ਗਈਆਂ।
ਗੁਜਰਾਤ ਦੇ ਮੁੱਖ ਮੰਤਰੀ ਭੂਪੇਂਦਰ ਪਟੇਲ ਪ੍ਰਯਾਗਰਾਜ ਪਹੁੰਚ ਗਏ ਹਨ। ਅੱਜ ਮੁੱਖ ਮੰਤਰੀ ਮਹਾਂਕੁੰਭ ਦੇ ਤ੍ਰਿਵੇਣੀ ਸੰਗਮ ‘ਚ ਪਵਿੱਤਰ ਇਸ਼ਨਾਨ ਕੀਤਾ।
ਸੈਕਟਰ 18 ਸਥਿਤ ਇਸਕੋਨ ਕੈਂਪ ‘ਚ ਅੱਗ ਲੱਗ ਗਈ। ਫਾਇਰ ਵਿਭਾਗ ਦੀ ਟੀਮ ਨੇ ਮੌਕੇ ‘ਤੇ ਪਹੁੰਚ ਕੇ ਅੱਗ ‘ਤੇ ਕਾਬੂ ਪਾਇਆ। ਸੀਐਫਓ ਦਾ ਦਾਅਵਾ ਹੈ ਕਿ ਇਸ ਅੱਗ ਦੀ ਘਟਨਾ ‘ਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਦਰਅਸਲ, ਮਹਾਕੁੰਭ ਮੇਲਾ ਖੇਤਰ ਦੇ ਸੈਕਟਰ 18, ਸ਼ੰਕਰਾਚਾਰੀਆ ਮਾਰਗ ‘ਚ ਅੱਗ ਲੱਗ ਗਈ। ਅਸਮਾਨ ‘ਚ ਕਾਲਾ ਧੂੰਆਂ ਦਿਖਾਈ ਦਿੱਤਾ |
06 ਫਰਵਰੀ 2025 ਅਪਡੇਟ
ਉੱਤਰ ਪ੍ਰਦੇਸ਼ ਸੂਚਨਾ ਵਿਭਾਗ ਦੇ ਮੁਤਾਬਕ 5 ਫਰਵਰੀ ਤੱਕ, 38.97 ਕਰੋੜ ਤੋਂ ਵੱਧ ਲੋਕਾਂ ਨੇ ਪ੍ਰਯਾਗਰਾਜ ਮਹਾਂਕੁੰਭ ’ਚ ਪਵਿੱਤਰ ਡੁਬਕੀ ਲਗਾਈ ਹੈ।
ਪ੍ਰਯਾਗਰਾਜ ਮਹਾਂਕੁੰਭ ਜਾਣ ਵਾਲੇ ਯਾਤਰੀਆਂ ਦੀ ਭੀੜ ਨੂੰ ਦੇਖਦੇ ਹੋਏ, ਰਾਂਚੀ ਤੋਂ ਸਿੱਧੀ ਉਡਾਣ ਸੇਵਾ 15 ਫਰਵਰੀ ਤੋਂ ਸ਼ੁਰੂ ਹੋਣ ਜਾ ਰਹੀ ਹੈ। ਇਹ ਸੇਵਾ 28 ਫਰਵਰੀ ਤੱਕ ਉਪਲਬੱਧ ਰਹੇਗੀ। ਇੰਡੀਗੋ ਨੇ ਅਥਾਰਟੀ ਨੂੰ ਆਪਣਾ ਸ਼ਡਿਊਲ ਦੇ ਦਿੱਤਾ ਹੈ।
14 ਫਰਵਰੀ ਤੋਂ ਹੋਣ ਵਾਲੇ ਮਹਾਂਕੁੰਭ ’ਚ ਵਿਸ਼ਵ ਰਿਕਾਰਡ ਬਣਾਉਣ ਦੀਆਂ ਤਿਆਰੀਆਂ ਹਨ। ਅੱਜ ਝੁੰਸੀ ਤੋਂ ਸ਼ਰਧਾਲੂਆਂ ਲਈ ਤਿੰਨ ਵਿਸ਼ੇਸ਼ ਰੇਲਗੱਡੀਆਂ ਚਲਾਈਆਂ ਜਾ ਰਹੀਆਂ ਹਨ। 14 ਤਾਰੀਖ਼ ਨੂੰ ਸਫ਼ਾਈ, 15 ਤਾਰੀਖ਼ ਨੂੰ ਨਦੀ ਦੀ ਸਫ਼ਾਈ, 16 ਤਰੀਕ ਨੂੰ ਈ-ਰਿਕਸ਼ਾ ਸੰਚਾਲਨ ਅਤੇ 17 ਫਰਵਰੀ ਨੂੰ ਵੱਧ ਤੋਂ ਵੱਧ ਹੱਥਾਂ ਦੇ ਪ੍ਰਿੰਟ ਲਗਾਏ ਜਾਣਗੇ। ਸਾਰੀ ਦੁਨੀਆਂ ਇਸਦੀ ਗਵਾਹ ਹੋਵੇਗੀ।
05 ਫਰਵਰੀ 2025 ਅਪਡੇਟ
ਪ੍ਰਧਾਨ ਮੰਤਰੀ ਮੋਦੀ ਦੇ ਪ੍ਰਯਾਗਰਾਜ ‘ਚ ਸੰਗਮ ‘ਚ ਡੁਬਕੀ ਲਗਾਉਣ ਲਈ ਪਹੁੰਚਣ ਤੋਂ ਪਹਿਲਾਂ ਸੁਰੱਖਿਆ ਪ੍ਰਬੰਧ ਸਖ਼ਤ ਕਰ ਦਿੱਤੇ ਸਨ। ਹਾਲਾਂਕਿ, ਸ਼ਰਧਾਲੂਆਂ ਨੂੰ ਅਸੁਵਿਧਾ ਤੋਂ ਬਚਾਉਣ ਲਈ, ਕਿਸੇ ਵੀ ਰਸਤੇ ਨੂੰ ਨਾ ਰੋਕਣ ਦਾ ਫੈਸਲਾ ਕੀਤਾ ਗਿਆ ਹੈ। ਪ੍ਰਧਾਨ ਮੰਤਰੀ ਮੋਦੀ ਪ੍ਰਯਾਗਰਾਜ ਪਹੁੰਚ ਗਏ ਹਨ।
ਅੱਜ ਵੀ ਸ਼ਰਧਾਲੂ ਤ੍ਰਿਵੇਣੀ ਸੰਗਮ ‘ਚ ਸ਼ਰਧਾ ਅਤੇ ਉਤਸ਼ਾਹ ਨਾਲ ਇਸ਼ਨਾਨ ਕਰ ਰਹੇ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀ ਅੱਜ ਸੰਗਮ ‘ਚ ਡੁਬਕੀ ਲਗਾਉਣਗੇ ਅਤੇ ਮਾਂ ਗੰਗਾ ਦੀ ਪੂਜਾ ਕਰਨਗੇ। ਮੁੱਖ ਮੰਤਰੀ ਆਦਿੱਤਿਆਨਾਥ ਅਤੇ ਰਾਜ ਸਰਕਾਰ ਦੇ ਕਈ ਮੰਤਰੀ ਵੀ ਪ੍ਰਧਾਨ ਮੰਤਰੀ ਦੇ ਨਾਲ ਹੋਣਗੇ।
04 ਫਰਵਰੀ 2025 ਅਪਡੇਟ
ਕਾਸ਼ੀ ‘ਚ ਨਵੇਂ ਨਾਗਾ ਸਾਧੂਆਂ ਨੂੰ ਪ੍ਰਮਾਣ ਪੱਤਰ ਮਿਲਣ ਜਾ ਰਹੇ ਹਨ, ਇਨ੍ਹਾਂ ਨਾਗਾਂ ਨੇ ਕੁੰਭ ਸ਼ਹਿਰ ‘ਚ ਦੀਖਿਆ ਪ੍ਰਾਪਤ ਕੀਤੀ। ਇਸ ਤੋਂ ਇਲਾਵਾ ਨਵੇਂ ਨਿਯੁਕਤ ਮਹਾਮੰਡਲੇਸ਼ਵਰ, ਮਹੰਤ ਅਤੇ ਰਮਤਾ ਪੰਚ ਦੇ ਮੈਂਬਰਾਂ ਨੂੰ ਵੀ ਕਾਸ਼ੀ ਤੋਂ ਬਣੀ ਨਵੀਂ ਮੋਹਰ ਲੈਣੀ ਪਵੇਗੀ।
ਭੂਟਾਨ ਦੇ ਰਾਜਾ ਅੱਜ ਮਹਾਂਕੁੰਭ ਦੌਰੇ ‘ਤੇ
ਅੱਜ ਭੂਟਾਨ ਦੇ ਰਾਜਾ ਮਹਾਕੁੰਭ ਦੇ ਦੌਰੇ ‘ਤੇ ਹਨ, ਭੂਟਾਨ ਦੇ ਰਾਜਾ ਜਿਗਮੇ ਖੇਸਰ ਨਾਮਗਿਆਲ ਵਾਂਗਚੁਕ ਇਸ਼ਨਾਨ ਲਈ ਸੰਗਮ ਪਹੁੰਚੇ ਹਨ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਵੀ ਪ੍ਰਯਾਗਰਾਜ ‘ਚ ਉਨ੍ਹਾਂ ਦੇ ਨਾਲ ਮੌਜੂਦ ਹਨ।
ਲਖਨਊ ਦੇ ਗੋਸਾਈਗੰਜ ਦੇ ਕਬੀਰਪੁਰ ਵਿੱਚ ਸ਼ਰਧਾਲੂਆਂ ਨੂੰ ਲੈ ਕੇ ਜਾ ਰਹੀ ਇੱਕ ਕਾਰ ਸੜਕ ਕਿਨਾਰੇ ਖੜ੍ਹੇ ਇੱਕ ਟ੍ਰੇਲਰ ਨਾਲ ਟਕਰਾ ਗਈ। ਇਸ ਸੜਕ ਹਾਦਸੇ ‘ਚ ਡਰਾਈਵਰ ਦੀ ਮੌਤ ਹੋ ਗਈ। ਜਦੋਂ ਕਿ ਕਾਰ ‘ਚ ਸਵਾਰ 6 ਹੋਰ ਜਣੇ ਜ਼ਖਮੀ ਹੋ ਗਏ। ਦੱਸਿਆ ਜਾ ਰਿਹਾ ਹੈ ਕਿ ਸਾਰੇ ਦੋਸਤ ਮਹਾਂਕੁੰਭ ’ਚ ਇਸ਼ਨਾਨ ਕਰਕੇ ਅਤੇ ਵਾਰਾਣਸੀ ਦੇ ਦਰਸ਼ਨ ਕਰਨ ਤੋਂ ਬਾਅਦ ਰਾਜਸਥਾਨ ਵਾਪਸ ਆ ਰਹੇ ਸਨ। ਇਸ ਦੌਰਾਨ ਕਾਰ ਹਾਦਸੇ ਦਾ ਸ਼ਿਕਾਰ ਹੋ ਗਈ।
03 ਫਰਵਰੀ 2025 ਅਪਡੇਟ
ਮਾਂ ਗੰਗਾ, ਮਾਂ ਯਮੁਨਾ ਅਤੇ ਅਦਿੱਖ ਮਾਂ ਸਰਸਵਤੀ ਦੇ ਪਵਿੱਤਰ ਸੰਗਮ ‘ਤੇ ਸ਼ਰਧਾ ਅਤੇ ਵਿਸ਼ਵਾਸ ਨਾਲ ਭਰੇ ਸੰਤਾਂ, ਭਗਤਾਂ, ਕਲਪਵਾਸੀਆਂ, ਇਸ਼ਨਾਨ ਕਰਨ ਵਾਲਿਆਂ ਅਤੇ ਗ੍ਰਹਿਸਥੀਆਂ ਦਾ ਇਸ਼ਨਾਨ ਹੁਣ ਇੱਕ ਨਵੇਂ ਸਿਖਰ ‘ਤੇ ਪਹੁੰਚ ਗਿਆ ਹੈ। ਇਸੇ ਕ੍ਰਮ ‘ਚ ਬਸੰਤ ਪੰਚਮੀ ਦੇ ਅੰਮ੍ਰਿਤ ਇਸ਼ਨਾਨ ‘ਤੇ ਮਹਾਂਕੁੰਭ ’ਚ ਇਸ਼ਨਾਨ ਕਰਨ ਵਾਲਿਆਂ ਦੀ ਗਿਣਤੀ ਹੁਣ ਤੱਕ 35 ਕਰੋੜ ਦੇ ਅੰਕੜੇ ਨੂੰ ਪਾਰ ਕਰ ਗਈ ਹੈ।
ਸੋਮਵਾਰ ਸਵੇਰੇ 8 ਵਜੇ ਤੱਕ 62.25 ਲੱਖ ਸ਼ਰਧਾਲੂਆਂ ਨੇ ਤ੍ਰਿਵੇਣੀ ਸੰਗਮ ‘ਚ ਪਵਿੱਤਰ ਡੁਬਕੀ ਲਗਾਈ। ਇਸ ਦੇ ਨਾਲ ਮਹਾਂਕੁੰਭ ’ਚ ਇਸ਼ਨਾਨ ਕਰਨ ਵਾਲਿਆਂ ਦੀ ਕੁੱਲ ਗਿਣਤੀ 35 ਕਰੋੜ ਨੂੰ ਪਾਰ ਕਰ ਗਈ। ਮਹਾਂਕੁੰਭ ਦੇ ਅਜੇ 23 ਦਿਨ ਬਾਕੀ ਹਨ ਅਤੇ ਉਮੀਦ ਹੈ ਕਿ ਇਸਨਾਨ ਕਰਨ ਵਾਲਿਆਂ ਦੀ ਗਿਣਤੀ 50 ਕਰੋੜ ਨੂੰ ਪਾਰ ਕਰ ਜਾਵੇਗੀ।
2 ਫਰਵਰੀ 2025 ਅਪਡੇਟ
ਮਹਾਕੁੰਭ ਨਗਰ: ਮਹਾਕੁੰਭ ਤੋਂ ਬਾਅਦ ਪ੍ਰਯਾਗਰਾਜ ਤੋਂ ਵਾਪਸ ਆ ਰਹੀ ਭੀੜ ਨੂੰ ਦੇਖਦੇ ਹੋਏ, ਵਾਰਾਣਸੀ ਵਿੱਚ ਸਕੂਲ ਬੰਦ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ। ਜ਼ਿਲ੍ਹਾ ਮੈਜਿਸਟ੍ਰੇਟ ਨੇ 12ਵੀਂ ਜਮਾਤ ਤੱਕ ਦੇ ਸਾਰੇ ਸਕੂਲਾਂ ਨੂੰ 5 ਫਰਵਰੀ, 2025 ਤੱਕ ਬੰਦ ਰੱਖਣ ਦਾ ਹੁਕਮ ਜਾਰੀ ਕੀਤਾ ਹੈ।
01 ਫਰਵਰੀ 2025 ਅਪਡੇਟ
ਸੀਐਮ ਯੋਗੀ ਨੇ ਸੰਗਮ ਨੋਜ਼ ਅਤੇ ਗੰਗਾ ਦੇ ਘਾਟਾਂ ਦਾ ਜ਼ਮੀਨੀ ਨਿਰੀਖਣ ਕੀਤਾ ਹੈ। ਬਸੰਤ ਪੰਚਮੀ ਇਸ਼ਨਾਨ ਤਿਉਹਾਰ ਤੋਂ ਪਹਿਲਾਂ, ਸੀਐਮ ਯੋਗੀ ਨੇ ਤਿਆਰੀਆਂ ਦਾ ਸਥਾਨ ਨਿਰੀਖਣ ਕੀਤਾ। ਸੀਐਮ ਯੋਗੀ ਨੇ ਅਧਿਕਾਰੀਆਂ ਨੂੰ ਜ਼ਰੂਰੀ ਨਿਰਦੇਸ਼ ਵੀ ਦਿੱਤੇ ਹਨ।
ਮੁੱਖ ਮੰਤਰੀ ਯੋਗੀ ਨੇ ਸੈਕਟਰ 21 ‘ਚ ਸਥਿਤ ਸਤੁਆ ਬਾਬਾ ਆਸ਼ਰਮ ਅਤੇ ਸੈਕਟਰ 5 ‘ਚ ਸਥਿਤ ਭਾਰਤ ਸੇਵਾ ਸ਼੍ਰਮ ਕੈਂਪ ਦਾ ਵੀ ਦੌਰਾ ਕੀਤਾ। ਮੁੱਖ ਮੰਤਰੀ ਮੇਲਾ ਸਰਕਟ ਹਾਊਸ ਵਿਖੇ ਵੱਖ-ਵੱਖ ਦੇਸ਼ਾਂ ਦੇ ਮਿਸ਼ਨਾਂ ਦੇ ਮੁਖੀਆਂ ਦੇ ਪ੍ਰਤੀਨਿਧੀਆਂ ਨਾਲ ਵੀ ਮੁਲਾਕਾਤ ਕਰਨਗੇ। 77 ਦੇਸ਼ਾਂ ਦੇ ਮਿਸ਼ਨਾਂ ਦੇ ਮੁਖੀਆਂ, ਉਨ੍ਹਾਂ ਦੇ ਜੀਵਨ ਸਾਥੀਆਂ ਅਤੇ ਡਿਪਲੋਮੈਟਾਂ ਸਮੇਤ 118 ਮੈਂਬਰੀ ਵਫ਼ਦ ਵੀ ਅੱਜ ਪ੍ਰਯਾਗਰਾਜ ‘ਚ ਮਹਾਂਕੁੰਭ ਦਾ ਦੌਰਾ ਕਰ ਰਿਹਾ ਹੈ।
ਮਹਾਂਕੁੰਭ’ਚ ਹੋਣ ਵਾਲੇ ਸਾਰੇ ਸੱਭਿਆਚਾਰਕ ਪ੍ਰੋਗਰਾਮ 5 ਫਰਵਰੀ ਤੱਕ ਰੱਦ ਕਰ ਦਿੱਤੇ ਗਏ ਹਨ। ਗੰਗਾ, ਯਮੁਨਾ, ਸਰਸਵਤੀ ਅਤੇ ਤ੍ਰਿਵੇਣੀ ਪੰਡਾਲਾਂ ਵਿੱਚ ਕੋਈ ਸਮਾਗਮ ਨਹੀਂ ਹੋਵੇਗਾ।
ਅੱਜ ਮਹਾਂਕੁੰਭ ਦਾ 20ਵਾਂ ਦਿਨ
ਸਵੇਰ ਤੋਂ ਹੀ ਲੋਕ ਸੰਗਮ ਵਿੱਚ ਧਾਰਮਿਕ ਡੁਬਕੀ ਲਗਾ ਰਹੇ ਹਨ। ਸੰਗਮ ‘ਚ ਇਸ਼ਨਾਨ ਲਈ ਆਉਣ ਵਾਲੇ ਸ਼ਰਧਾਲੂਆਂ ਦਾ ਹੜ੍ਹ ਜਾਰੀ ਹੈ। ਖਾਸ ਗੱਲ ਇਹ ਹੈ ਕਿ ਅੱਜ ਵਿਦੇਸ਼ਾਂ ਤੋਂ 100 ਤੋਂ ਵੱਧ ਮਹਿਮਾਨ ਵੀ ਮੇਲਾ ਦੇਖਣ ਲਈ ਤੀਰਥ ਨਗਰੀ ਵਿੱਚ ਆ ਰਹੇ ਹਨ। ਅੱਜ ਉਪ ਰਾਸ਼ਟਰਪਤੀ ਜਗਦੀਪ ਧਨਗੜ੍ਹ ਦੇ ਸੰਗਮ ‘ਚ ਡੁਬਕੀ ਲਗਾਉਣਗੇ |
31 ਜਨਵਰੀ 2024 ਅਪਡੇਟ
ਸੰਗਮ ਸ਼ਹਿਰ ‘ਚ ਮਹਾਂਕੁੰਭ ’ਚ ਸ਼ਰਧਾਲੂਆਂ ਦੀ ਆਮਦ ‘ਚ ਭਰੋਈ ਵਾਧਾ ਹੋਇਆ ਹੈ | ਮਹਾਂਕੁੰਭ ਖੇਤਰ ਨੂੰ ਨੋ ਵਹੀਕਲ ਜ਼ੋਨ ਘੋਸ਼ਿਤ ਕੀਤਾ ਗਿਆ ਹੈ, ਜਿਸ ਕਾਰਨ ਮੇਲੇ ਵਾਲੇ ਖੇਤਰ ਵਿੱਚ ਵਾਹਨਾਂ ਦੇ ਦਾਖਲੇ ‘ਤੇ ਪੂਰੀ ਤਰ੍ਹਾਂ ਪਾਬੰਦੀ ਹੈ। ਅਜਿਹੀ ਸਥਿਤੀ ‘ਚ ਸ਼ਰਧਾਲੂ ਇਸ਼ਨਾਨ ਕਰਨ ਲਈ ਸੰਗਮ ਪਹੁੰਚਣ ਲਈ ਕਈ ਕਿਲੋਮੀਟਰ ਦੀ ਦੂਰੀ ਪੈਦਲ ਤੈਅ ਕਰ ਰਹੇ ਹਨ।
ਇਸ ਸਭ ਦੇ ਵਿਚਕਾਰ, ਸੰਗਮ ਸ਼ਹਿਰ ਦੇ ਨੌਜਵਾਨਾਂ ਦੇ ਇੱਕ ਸਮੂਹ ਨੇ ਨਹਾਉਣ ਵਾਲਿਆਂ ਦੀ ਮਦਦ ਕਰਨ ਦਾ ਕੰਮ ਆਪਣੇ ਹੱਥ ‘ਚ ਲਿਆ ਹੈ। ਕਲਯੁਗ ਦੇ ਸ਼੍ਰਵਣ ਕੁਮਾਰ ਦੀ ਭੂਮਿਕਾ ਨਿਭਾ ਰਹੇ ਇਹ ਨੌਜਵਾਨ ਨਾ ਸਿਰਫ ਪੈਦਲ ਚੱਲ ਰਹੇ ਭਗਤਾਂ ਨੂੰ ਸੰਗਮ ‘ਚ ਇਸ਼ਨਾਨ ਕਰਨ ਲਈ ਸਾਈਕਲਾਂ ‘ਤੇ ਲੈ ਜਾ ਰਹੇ ਹਨ, ਸਗੋਂ ਉਨ੍ਹਾਂ ਨੂੰ ਉਨ੍ਹਾਂ ਦੀ ਮੰਜ਼ਿਲ ਵੱਲ ਜਾਣ ਵਾਲੇ ਵਾਹਨ ਸਟੈਂਡ ‘ਤੇ ਵੀ ਛੱਡ ਰਹੇ ਹਨ।
ਫਾਫਾਮੌਓ ਸਰਹੱਦ ਸੀਲ, ਲੰਮਾ ਜਾਮ ਲੱਗਿਆ
ਪ੍ਰਯਾਗਰਾਜ ਦੀ ਫਾਫਾਮੌਓ ਸਰਹੱਦ ਸੀਲ ਕਰ ਦਿੱਤੀ ਗਈ ਹੈ ਅਤੇ ਉੱਥੇ ਲੰਬਾ ਟ੍ਰੈਫਿਕ ਜਾਮ ਹੈ। ਲੋਕ ਇੱਥੇ ਬਹੁਤ ਸਮੇਂ ਤੋਂ ਫਸੇ ਹੋਏ ਹਨ। ਪੁਲਿਸ ਵਾਲੇ ਵਾਹਨਾਂ ਨੂੰ ਬਾਹਰ ਕੱਢਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਪਰ ਲੋਕ ਆਪਣੀ ਮੰਜ਼ਿਲ ‘ਤੇ ਨਹੀਂ ਪਹੁੰਚ ਪਾ ਰਹੇ।
ਮਹਾਮੰਡਲੇਸ਼ਵਰ ਲਕਸ਼ਮੀ ਨਾਰਾਇਣ ਤ੍ਰਿਪਾਠੀ ਨੂੰ ਹਟਾਉਨ ਦੀ ਤਿਆਰੀ
ਕਿੰਨਰ ਅਖਾੜੇ ਤੋਂ ਆਚਾਰੀਆ ਮਹਾਮੰਡਲੇਸ਼ਵਰ ਲਕਸ਼ਮੀ ਨਾਰਾਇਣ ਤ੍ਰਿਪਾਠੀ ਨੂੰ ਹਟਾਉਣ ਦੀਆਂ ਤਿਆਰੀਆਂ ਹਨ, ਕਿੰਨਰ ਅਖਾੜੇ ਦੇ ਸੰਸਥਾਪਕ ਅਜੈਦਾਸ ਲਕਸ਼ਮੀ ਨਾਰਾਇਣ ਤ੍ਰਿਪਾਠੀ ਨੂੰ ਹਟਾਉਣ ਦੀਆਂ ਤਿਆਰੀਆਂ ‘ਚ ਰੁੱਝੇ ਹੋਏ ਹਨ, ਲਕਸ਼ਮੀ ਨਾਰਾਇਣ ਤ੍ਰਿਪਾਠੀ ‘ਤੇ ਕਿੰਨਰ ਅਖਾੜੇ ਦੀ ਮਾਣ-ਮਰਿਆਦਾ ਵਿਰੁੱਧ ਕੰਮ ਕਰਨ ਦਾ ਦੋਸ਼ ਹੈ।
ਮਹਾਂਕੁੰਭ ’ਚ ਬਹੁਤ ਸਾਰੇ ਸ਼ਰਧਾਲੂਆਂ ਦੇ ਆਪਣੇ ਪਰਿਵਾਰਕ ਮੈਂਬਰ ਗੁੰਮ ਹੋ ਗਏ ਹਨ, ਪ੍ਰਯਾਗਰਾਜ ਕੁੰਭ ਦੀ ਭੀੜ ‘ਚ ਬਹੁਤ ਸਾਰੇ ਲੋਕਾਂ ਨੂੰ ਆਪਣੇ ਰਿਸ਼ਤੇਦਾਰਾਂ ਨਹੀਂ ਮਿਲ ਰਹੇ। ਉਨ੍ਹਾਂ ਦੀ ਭਾਲ ਲਈ ਉਨ੍ਹਾਂ ਦੇ ਪਰਿਵਾਰ ਲੌਸਟ ਐਂਡ ਫਾਊਂਡ ਸੈਂਟਰ ਪਹੁੰਚ ਰਹੇ ਹਨ। ਇਨ੍ਹਾਂ ਲੋਕਾਂ ਦਾ ਦੋਸ਼ ਹੈ ਕਿ ਉਨ੍ਹਾਂ ਨੂੰ ਪੁਲਿਸ ਅਤੇ ਮੇਲਾ ਪ੍ਰਸ਼ਾਸਨ ਤੋਂ ਕੋਈ ਮਦਦ ਨਹੀਂ ਮਿਲ ਰਹੀ।
30 ਜਨਵਰੀ 2024 ਅਪਡੇਟ
ਮਹਾਂਕੁੰਭ ’ਚ ਪੁਲਿਸ ਸਰਗਰਮ
ਸੰਗਮ ਨੋਜ਼ ਦੇ ਨੇੜੇ ਪੁਲਿਸ ਸਰਗਰਮ ਹੈ ਅਤੇ ਸੜਕ ‘ਤੇ ਬੈਠੇ ਲੋਕਾਂ ਨੂੰ ਹਟਾ ਰਹੀ ਹੈ। ਕੁੰਭ ਖੇਤਰ ‘ਚ ਪੁਲਿਸ ਪੂਰੇ ਖੇਤਰ ‘ਚ ਲਗਾਤਾਰ ਗਸ਼ਤ ਕਰ ਰਹੀ ਹੈ ਅਤੇ ਇਸਦੇ ਨਾਲ ਹੀ, ਸੁਰੱਖਿਆ ਦੇ ਉਦੇਸ਼ਾਂ ਲਈ ਏਟੀਐਸ ਵਾਹਨ ਵੀ ਕੁੰਭ ਖੇਤਰ ‘ਚ ਲਗਾਤਾਰ ਘੁੰਮ ਰਹੇ ਹਨ।
ਭਗਦੜ ਤੋਂ ਬਾਅਦ ਭਾਰੀ ਟ੍ਰੈਫਿਕ ਜਾਮ
ਮਹਾਂਕੁੰਭ ਮੇਲੇ ‘ਚ ਭਗਦੜ ਤੋਂ ਬਾਅਦ ਯੂਪੀ ‘ਚ ਕਈ ਥਾਵਾਂ ‘ਤੇ ਜਾਮ ਹੈ, ਪ੍ਰਯਾਗਰਾਜ ਨੂੰ ਜਾਣ ਵਾਲੇ ਕਈ ਮਹੱਤਵਪੂਰਨ ਰਸਤੇ ਬੰਦ ਕਰ ਦਿੱਤੇ ਹਨ, ਜਿਸ ਕਾਰਨ ਸ਼ਰਧਾਲੂਆਂ ਨੂੰ ਬਹੁਤ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਜਾਮ ਕਾਰਨ 8 ਜ਼ਿਲ੍ਹਿਆਂ ‘ਚ 2 ਲੱਖ ਤੋਂ ਵੱਧ ਵਾਹਨਾਂ ਦੇ ਪਹੀਏ ਰੁਕ ਗਏ ਹਨ।
ਪ੍ਰਯਾਗਰਾਜ ਮਹਾਂਕੁੰਭ ’ਚ ਭਗਦੜ ਕਾਰਨ ਹੋਈਆਂ ਮੌਤਾਂ ਨੂੰ ਲੈ ਕੇ ਸੁਪਰੀਮ ਕੋਰਟ ‘ਚ ਇੱਕ ਪਟੀਸ਼ਨ ਦਾਇਰ ਕੀਤੀ ਗਈ ਸੀ। ਵਕੀਲ ਵਿਸ਼ਾਲ ਤਿਵਾੜੀ ਵੱਲੋਂ ਦਾਇਰ ਪਟੀਸ਼ਨ ‘ਚ ਇਸ ਘਟਨਾ ਸਬੰਧੀ ਯੂਪੀ ਸਰਕਾਰ ਤੋਂ ਸਟੇਟਸ ਰਿਪੋਰਟ ਤਲਬ ਕਰਨ ਅਤੇ ਇਸ ਲਈ ਜ਼ਿੰਮੇਵਾਰ ਅਧਿਕਾਰੀਆਂ ਖ਼ਿਲਾਫ਼ ਕਾਰਵਾਈ ਕਰਨ ਦੀ ਮੰਗ ਕੀਤੀ ਗਈ ਹੈ।
ਸੀਐਮ ਯੋਗੀ ਦੀਆਂ ਮਹੱਤਵਪੂਰਨ ਹਦਾਇਤਾਂ ਦਿੱਤੀ ਹੈ ਕਿ 5 ਅਧਿਕਾਰੀਆਂ ਦੀ ਇੱਕ ਟੀਮ ਪ੍ਰਯਾਗਰਾਜ ਜਾਵੇਗੀ | ਇਸ ‘ਚ ਵਿਸ਼ੇਸ਼ ਸਕੱਤਰ ਪੱਧਰ ਦੇ ਅਧਿਕਾਰੀ ਜਾਣਗੇ | ਸਿਸਟਮ ਨੂੰ ਬਿਹਤਰ ਬਣਾਉਣ ਲਈ ਤਾਇਨਾਤ ਕੀਤਾ ਗਿਆ ਹੈ, ਅਧਿਕਾਰੀ 12 ਫਰਵਰੀ ਤੱਕ ਪ੍ਰਯਾਗਰਾਜ ‘ਚ ਰਹਿਣਗੇ।
29 ਜਨਵਰੀ 2024 ਅਪਡੇਟ
ਮੌਨੀ ਅਮਾਵਸਿਆ ਦੇ ਮੌਕੇ ‘ਤੇ ਅਖਾੜਿਆਂ ਅਤੇ ਸੰਤਾਂ ਦੇ ਅੰਮ੍ਰਿਤ ਇਸ਼ਨਾਨ ਲਈ ਰਸਤਾ ਸਾਫ਼ ਕਰਨ ਲਈ ਪੁਲਿਸ ਦੇ ਨਾਲ-ਨਾਲ ਤ੍ਰਿਵੇਣੀ ਸੰਗਮ ‘ਤੇ ਭਾਰੀ ਸੁਰੱਖਿਆ ਤਾਇਨਾਤ ਕੀਤੀ ਗਈ ਹੈ। ਅਖਾੜਾ ਪ੍ਰੀਸ਼ਦ ਦੇ ਪ੍ਰਧਾਨ ਸ਼੍ਰੀਮਹੰਤ ਰਵਿੰਦਰ ਪੁਰੀ ਨੇ ਕਿਹਾ ਕਿ ਅੰਮ੍ਰਿਤ ਇਸ਼ਨਾਨ ਜਲਦੀ ਹੀ ਸ਼ੁਰੂ ਹੋਵੇਗਾ। ਸੰਤ ਘੱਟ ਗਿਣਤੀ ‘ਚ ਇਸ਼ਨਾਨ ਕਰਨ ਜਾਣਗੇ। ਦੌਰਾਨ ਝਾਂਕੀ ਨਹੀਂ ਕੱਢੀ ਜਾਵੇਗੀ।
ਚੀਫ਼ ਸੁਪਰਡੈਂਟ ਡਾ. ਅਜੈ ਸਕਸੈਨਾ ਨੇ ਕਿਹਾ ਕਿ ਮੇਲੇ ਤੋਂ 24 ਜ਼ਖਮੀਆਂ ਨੂੰ ਟਰਾਮਾ ਸੈਂਟਰ ਲਿਆਂਦਾ ਗਿਆ ਹੈ। ਜਿਨ੍ਹਾਂ ਦਾ ਇਲਾਜ ਕੀਤਾ ਜਾ ਰਿਹਾ ਹੈ। ਜ਼ਿਆਦਾਤਰ ਮਰੀਜ਼ਾਂ ਨੂੰ ਛਾਤੀ ‘ਚ ਸੱਟਾਂ ਲੱਗੀਆਂ ਹਨ, ਹਾਦਸੇ ਕਾਰਨ ਕਈ ਬੇਹੋਸ਼ ਹੋ ਗਏ। ਮਹਾਂਕੁੰਭ ਮੇਲੇ ਦੇ ਖੇਤਰ ਪ੍ਰਸ਼ਾਸਨ ਨੇ ਮਹਾਂਕੁੰਭ ਮੇਲੇ ‘ਚ ਹੋਈ ਭਗਦੜ ਸਬੰਧੀ ਅਧਿਕਾਰਤ ਅੰਕੜੇ ਜਾਰੀ ਕੀਤੇ ਹਨ। ਮੰਗਲਵਾਰ ਰਾਤ ਨੂੰ ਹੋਈ ਭਗਦੜ ‘ਚ 30 ਜਣਿਆਂ ਦੀ ਜਾਨ ਚਲੀ ਗਈ ਹੈ।
ਭਗਦੜ ਤੋਂ ਬਾਅਦ, ਸੀਐਮ ਯੋਗੀ ਨੇ ਸ਼ਰਧਾਲੂਆਂ ਨੂੰ ਸੰਗਮ ਨੋਕ ‘ਤੇ ਜਾਣ ਦੀ ਬਜਾਏ ਨੇੜਲੇ ਘਾਟ ‘ਤੇ ਇਸ਼ਨਾਨ ਕਰਨ ਦੀ ਅਪੀਲ ਕੀਤੀ ਹੈ।
28 ਜਨਵਰੀ 2024 ਅਪਡੇਟ
ਅੱਜ ਸਵੇਰੇ 8 ਵਜੇ ਤੱਕ 55 ਲੱਖ ਤੋਂ ਵੱਧ ਸੰਗਤਾਂ ਨੇ ਮਹਾਂਕੁੰਭ ’ਚ ਇਸ਼ਨਾਨ ਕੀਤਾ ਹੈ। ਹੁਣ ਤੱਕ 15 ਕਰੋੜ ਤੋਂ ਵੱਧ ਸ਼ਰਧਾਲੂ ਪਵਿੱਤਰ ਇਸ਼ਨਾਨ ਕਰ ਚੁੱਕੇ ਹਨ। ਉੱਤਰ ਪ੍ਰਦੇਸ਼ ਸੂਚਨਾ ਵਿਭਾਗ ਦੇ ਅਨੁਸਾਰ, ਸਵੇਰੇ 8 ਵਜੇ ਤੱਕ ਇਸ਼ਨਾਨ ਕਰਨ ਵਾਲਿਆਂ ਦੀ ਕੁੱਲ ਗਿਣਤੀ 15 ਕਰੋੜ ਨੂੰ ਪਾਰ ਕਰ ਗਈ।
ਮੌਨੀ ਮੱਸਿਆ ਤੇ ਬਸੰਤ ਪੰਚਮੀ ‘ਤੇ 10 ਟੋਲ ਟੈਕਸ ਮੁਕਤ ਹੋਣਗੇ
ਮੌਨੀ ਮੱਸਿਆ ਇਸ਼ਨਾਨ ਤਿਉਹਾਰ ਦੇ ਮੌਕੇ ‘ਤੇ 27 ਤੋਂ 30 ਜਨਵਰੀ ਤੱਕ 10 ਟੋਲ ਪਲਾਜ਼ਾ ਟੈਕਸ ਮੁਕਤ ਰਹਿਣਗੇ। ਇਸ ਤੋਂ ਇਲਾਵਾ ਬਸੰਤ ਪੰਚਮੀ ਲਈ, 1 ਫਰਵਰੀ ਨੂੰ ਰਾਤ 8 ਵਜੇ ਤੋਂ 4 ਫਰਵਰੀ ਨੂੰ ਸ਼ਾਮ 7.59 ਵਜੇ ਤੱਕ ਟੋਲ ‘ਤੇ ਕੋਈ ਟੈਕਸ ਨਹੀਂ ਹੋਵੇਗਾ। ਇਹ ਪ੍ਰਣਾਲੀ ਕੋਖਰਾਜ, ਨਵਾਬਗੰਜ, ਸੋਰਾਂਵ, ਸਹਸੋਂ, ਹਾਂਡਿਆ , ਲਾਲਾਨਗਰ, ਰਾਮਨਗਰ ਘਸਿਆਰੀ, ਉਮਾਪੁਰ, ਮੁੰਗਾਰੀ ਅਤੇ ਹੈਰੋ ਟੋਲ ਪਲਾਜ਼ਿਆਂ ‘ਤੇ ਲਾਗੂ ਹੋਵੇਗੀ। ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ (NHAI) ਦੇ ਮੁੱਖ ਪ੍ਰੋਜੈਕਟ ਮੈਨੇਜਰ ਪੰਕਜ ਮਿਸ਼ਰਾ ਨੇ ਇਸਦੀ ਪੁਸ਼ਟੀ ਕੀਤੀ ਹੈ।
27 ਜਨਵਰੀ 2024 ਅਪਡੇਟ
ਪ੍ਰਯਾਗਰਾਜ ‘ਚ ਚੱਲ ਰਹੇ ਮਹਾਂਕੁੰਭ ਮੇਲੇ ‘ਚ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅਤੇ ਸੀਐਮ ਯੋਗੀ ਦੇ ਆਉਣ ਦੇ ਮੱਦੇਨਜ਼ਰ ਕਈ ਪੋਂਟੂਨ ਪੁਲਾਂ ਨੂੰ ਬੰਦ ਕਰ ਦਿੱਤਾ ਗਿਆ। ਸੰਗਤਾਂ ਦੀ ਵੱਡੀ ਆਮਦ ਕਾਰਨ ਕਾਰਨ ਵਾਹਨਾਂ ਦੀ ਆਵਾਜਾਈ ਵੀ ਸੀਮਤ ਕਰ ਦਿੱਤੀ। ਅਮਿਤ ਸ਼ਾਹ ਨੇ ਆਪਣੇ ਪਰਿਵਾਰ ਨਾਲ ਜੂਨਾ ਅਖਾੜੇ ਵਿਖੇ ਪ੍ਰਸ਼ਾਦ ਲਿਆ, ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ ਅਕਸ਼ੈਵਟ ਦੇ ਦਰੱਖਤ ਦੀ ਪੂਜਾ ਕੀਤੀ।
ਸੁਨੀਲ ਸ਼ੈੱਟੀ ਵੱਲੋਂ ਸਨਾਤਨ ਧਰਮ ਦੀ ਰੱਖਿਆ ਲਈ ਇਕੱਠੇ ਹੋਣ ਦੀ ਅਪੀਲ
ਅਦਾਕਾਰ ਸੁਨੀਲ ਸ਼ੈੱਟੀ ਨੇ ਪ੍ਰਯਾਗਰਾਜ ਮਹਾਂਕੁੰਭ ਵਿਖੇ ਸਨਾਤਨ ਧਰਮ ਪ੍ਰਤੀ ਸ਼ਰਧਾ ‘ਚ ਏਕਤਾ ਦਾ ਸੱਦਾ ਦਿੱਤਾ। ਉਨ੍ਹਾਂ 27 ਜਨਵਰੀ ਨੂੰ ਸਵਾਮੀ ਦੇਵਕੀਨੰਦਨ ਠਾਕੁਰਜੀ ਮਹਾਰਾਜ ਦੀ ਅਗਵਾਈ ਹੇਠ ਸਨਾਤਨ ਬੋਰਡ ਦੀ ਸਥਾਪਨਾ ਲਈ ਅੰਦੋਲਨ ‘ਚ ਹਿੱਸਾ ਲੈਣ ਅਤੇ ਮੰਦਰਾਂ, ਗੁਰੂਕੁਲਾਂ ਅਤੇ ਗਊ ਆਸ਼ਰਮ ਦੀ ਰੱਖਿਆ ਲਈ ਸ਼ਾਂਤੀ ਸੇਵਾ ਕੈਂਪ ‘ਚ ਸ਼ਾਮਲ ਹੋਣ ਦੀ ਅਪੀਲ ਕੀਤੀ।
26 ਜਨਵਰੀ 2024 ਅਪਡੇਟ
ਮਹਾਂਕੁੰਭ ਸੰਬੰਧੀ ਡੀਐਮ ਰਵਿੰਦਰ ਕੁਮਾਰ ਦੀ ਅਪੀਲ
ਪ੍ਰਯਾਗਰਾਜ ਦੇ ਲੋਕਾਂ ਨੂੰ ਅਪੀਲ ਹੈ ਕਿ ਉਹ ਚਾਰ ਪਹੀਆ ਵਾਹਨਾਂ ਦੀ ਵਰਤੋਂ ਨਾ ਕਰਨ। ਬਾਹਰੋਂ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਹੋ ਰਹੀ ਅਸੁਵਿਧਾ ਦੇ ਮੱਦੇਨਜ਼ਰ ਇਹ ਅਪੀਲ ਕੀਤੀ ਜਾਂਦੀ ਹੈ। ਮੌਨੀ ਮੱਸਿਆ ਇਸ਼ਨਾਨ ਤਿਉਹਾਰ ਤੱਕ ਸਿਰਫ਼ ਦੋ ਪਹੀਆ ਵਾਹਨਾਂ ਦੀ ਵਰਤੋਂ ਕਰਨ ਦੀ ਬੇਨਤੀ। ਡੀਐਮ ਰਵਿੰਦਰ ਕੁਮਾਰ ਨੇ ਭੀੜ ਅਤੇ ਜਾਮ ਤੋਂ ਬਚਣ ਦੀ ਅਪੀਲ ਕੀਤੀ
25 ਜਨਵਰੀ 2024 ਅਪਡੇਟ
ਮਹਾਕੁੰਭ ਪ੍ਰਯਾਗਰਾਜ ਦੇ 12ਵੇਂ ਦਿਨ ਸ਼ੁੱਕਰਵਾਰ ਰਾਤ 8 ਵਜੇ ਤੱਕ, 58.76 ਲੱਖ ਸ਼ਰਧਾਲੂਆਂ ਨੇ ਸੰਗਮ ‘ਚ ਇਸ਼ਨਾਨ ਕੀਤਾ। ਹੁਣ ਤੱਕ ਮਹਾਂਕੁੰਭ ’ਚ ਕਲਪਵਾਸੀਆਂ ਦੀ ਗਿਣਤੀ 10 ਲੱਖ ਤੋਂ ਵੱਧ ਹੈ। ਇਸ ਲਈ 13 ਜਨਵਰੀ ਤੋਂ ਅੱਜ ਤੱਕ, 12ਵੇਂ ਦਿਨ, 10.80 ਕਰੋੜ ਸ਼ਰਧਾਲੂਆਂ ਨੇ ਸੰਗਮ ‘ਚ ਪਵਿੱਤਰ ਇਸ਼ਨਾਨ ਕੀਤਾ ਹੈ। 29 ਜਨਵਰੀ ਨੂੰ ਮੌਨੀ ਮੱਸਿਆ ਦੇ ਅੰਮ੍ਰਿਤ ਇਸ਼ਨਾਨ ਨੂੰ ਸਭ ਤੋਂ ਵੱਡਾ ਇਸ਼ਨਾਨ ਮੰਨਿਆ ਜਾ ਰਿਹਾ ਹੈ।
ਮੁੱਖ ਮੰਤਰੀ ਯੋਗੀ ਵਲੋਂ ਫਿਰ ਮਹਾਂਕੁੰਭ ਦਾ ਦੌਰਾ
ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਸ਼ਨੀਵਾਰ ਨੂੰ ਪ੍ਰਯਾਗਰਾਜ ਦੇ ਦੌਰੇ ‘ਤੇ ਮਹਾਂਕੁੰਭ ਵਿੱਚ ਮੌਨੀ ਅਮਾਵਸਿਆ ਤੋਂ ਪਹਿਲਾਂ ਤਿਆਰੀਆਂ ਦਾ ਜਾਇਜ਼ਾ ਲੈਣਗੇ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ 25 ਜਨਵਰੀ, 2025 ਨੂੰ ਸ਼ਨੀਵਾਰ ਸਵੇਰੇ 11:30 ਵਜੇ ਪ੍ਰਯਾਗਰਾਜ ਪਹੁੰਚਣਗੇ।
ਸੰਤਾਂ ਦੀ ਪੁਲਿਸ ਵਾਲਿਆਂ ਨਾਲ ਝੜੱਪ
ਸ਼ੁੱਕਰਵਾਰ ਨੂੰ ਪ੍ਰਯਾਗਰਾਜ ਮਹਾਂਕੁੰਭ ਵਿਖੇ ਸੰਤਾਂ ਦੀ ਪੁਲਿਸ ਵਾਲਿਆਂ ਨਾਲ ਝੜੱਪ ਹੋਈ, ਜਿਸਦੀ ਵੀਡੀਓ ਵੀ ਸਾਹਮਣੇ ਆਈ ਹੈ। ਵੀਡੀਓ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਪੁਲਿਸ ਵਾਲਿਆਂ ਨੇ ਦਾਰਾਗੰਜ ਸੈਕਟਰ ਦੇ ਸਾਹਮਣੇ ਪੋਂਟੂਨ ਪੁਲ ‘ਤੇ ਬੈਰੀਕੇਡ ਲਗਾਏ ਹੋਏ ਸਨ ਅਤੇ ਕਿਸੇ ਨੂੰ ਵੀ ਲੰਘਣ ਨਹੀਂ ਦੇ ਰਹੇ ਸਨ, ਕੁਝ ਸੰਤਾਂ ਨੇ ਪੁਲਿਸ ਨੂੰ ਬੈਰੀਕੇਡ ਹਟਾਉਣ ਲਈ ਕਿਹਾ, ਪਰ ਜਦੋਂ ਪੁਲਿਸ ਵਾਲੇ ਸਹਿਮਤ ਨਹੀਂ ਹੋਏ, ਤਾਂ ਸੰਤਾਂ ਨੇ ਬੈਰੀਕੇਡਿੰਗ ਨੂੰ ਹਟਾ ਦਿੱਤੇ |
24 ਜਨਵਰੀ 2024 ਅਪਡੇਟ
ਸੀਐਮ ਯੋਗੀ ਕੱਲ੍ਹ ਆਉਣਗੇ ਮਹਾਂਕੁੰਭ
ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਸ਼ਨੀਵਾਰ ਨੂੰ ਮੌਨੀ ਮੱਸਿਆ ‘ਤੇ ਹੋਣ ਵਾਲੇ ਅੰਮ੍ਰਿਤ ਇਸ਼ਨਾਨ ਤੋਂ ਪਹਿਲਾਂ ਦੀਆਂ ਤਿਆਰੀਆਂ ਦਾ ਜਾਇਜ਼ਾ ਲੈਣ ਲਈ ਮਹਾਂਕੁੰਭ ਆਉਣਗੇ।
ਦੂਜੇ ਪਾਸੇ ਮਹਾਂਕੁੰਭ ’ਚ ਸੈਕਟਰ 20 ਦੇ ਨੇੜੇ ਇੱਕ ਸ਼ੰਖ ਦੇ ਸਟਾਲ ‘ਚ 2 ਫੁੱਟ 10 ਇੰਚ ਲੰਬਾ ਸ਼ੰਖ ਰੱਖਿਆ ਗਿਆ ਹੈ। ਇਸਦੀ ਕੀਮਤ ਲਗਭਗ 6 ਲੱਖ ਰੁਪਏ ਹੈ।
ਡਰੋਨ ਸ਼ੋਅ ਨਾਲ ਹੋਵੇਗਾ ਪ੍ਰੋਗਰਾਮ
ਡਰੋਨ ਸ਼ੋਅ 24, 25 ਅਤੇ 26 ਜਨਵਰੀ ਨੂੰ ਸੈਕਟਰ 7 ‘ਚ ਸ਼ਾਮ 7 ਵਜੇ ਮਹਾਂਕੁੰਭ ਵਿਖੇ ਆਯੋਜਿਤ ਕੀਤਾ ਜਾਵੇਗਾ। ਸੈਰ-ਸਪਾਟਾ ਵਿਭਾਗ ਇਸਦਾ ਪ੍ਰਬੰਧ ਕਰ ਰਿਹਾ ਹੈ। ਇਸਦੇ ਨਾਲ ਹੀ ਸ਼ੁੱਕਰਵਾਰ ਤੋਂ ਮਹਾਂਕੁੰਭ ’ਚ ਬਾਹਰੀ ਵਾਹਨਾਂ ਦੇ ਦਾਖਲੇ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ। ਟ੍ਰੈਫਿਕ ਇੰਚਾਰਜ ਅਮਿਤ ਨੇ ਦੱਸਿਆ ਕਿ ਇਹ ਫੈਸਲਾ ਸ਼ਨੀਵਾਰ ਅਤੇ ਐਤਵਾਰ ਨੂੰ ਗਣਤੰਤਰ ਦਿਵਸ ਦੀ ਛੁੱਟੀ ਦੇ ਮੱਦੇਨਜ਼ਰ ਲਿਆ ਗਿਆ ਹੈ।
23 ਜਨਵਰੀ 2024 ਅਪਡੇਟ
ਸੰਘਣੀ ਧੁੰਦ ਦੇ ਵਿਚਕਾਰ ਹਜ਼ਾਰਾਂ ਦੀ ਗਿਣਤੀ ‘ਚ ਸ਼ਰਧਾਲੂ ਤਿੰਨ ਨਦੀਆਂ – ਗੰਗਾ, ਯਮੁਨਾ ਅਤੇ ਸਰਸਵਤੀ ਦੇ ਪਵਿੱਤਰ ਸੰਗਮ, ਤ੍ਰਿਵੇਣੀ ਸੰਗਮ ‘ਚ ਇਸ਼ਨਾਨ ਕਰਨ ਲਈ ਸੰਗਮ ਘਾਟਾਂ ‘ਤੇ ਇਕੱਠੇ ਹੋਏ ਹਨ। ਕੱਲ੍ਹ ਮਹਾਕੁੰਭ 2025 ‘ਚ 48.74 ਲੱਖ ਤੋਂ ਵੱਧ ਲੋਕਾਂ ਨੇ ਪਵਿੱਤਰ ਡੁਬਕੀ ਲਗਾਈ।
10 ਲੱਖ ਕਲਪਵਾਸੀ ਅਤੇ 38.74 ਲੱਖ ਸ਼ਰਧਾਲੂ ਸ਼ਰਧਾ ‘ਚ ਇੱਕਜੁੱਟ ਹੋਏ ਹਨ, ਜਿਸ ਨਾਲ ਇਹ ਸਮਾਗਮ ਇੱਕ ਵਿਸ਼ਾਲ ਅਧਿਆਤਮਿਕ ਤਿਉਹਾਰ ਬਣ ਗਿਆ। ਹੁਣ ਤੱਕ 9.24 ਕਰੋੜ ਤੋਂ ਵੱਧ ਸ਼ਰਧਾਲੂ ਮਾਂ ਗੰਗਾ, ਯਮੁਨਾ ਅਤੇ ਸਰਸਵਤੀ ਦੀਆਂ ਸ਼ੁੱਧ ਨਦੀਆਂ ‘ਚ ਇਸ਼ਨਾਨ ਕਰ ਚੁੱਕੇ ਹਨ।
ਮਹਾਕੁੰਭ ‘ਚ ਇੱਕ ਹੋਰ ਹੈਲੀਕਾਪਟਰ ਸੇਵਾ
ਉੱਤਰ ਪ੍ਰਦੇਸ਼ ਈਕੋ ਟੂਰਿਜ਼ਮ ਡਿਵੈਲਪਮੈਂਟ ਬੋਰਡ ਵੱਲੋਂ ਮਹਾਂਕੁੰਭ ’ਚ ਛੇਤੀਂ ਹੀ ਹੈਲੀਕਾਪਟਰ ਸੇਵਾ ਵੀ ਸ਼ੁਰੂ ਕੀਤੀ ਜਾਵੇਗੀ, ਜਿਸ ਦਾ ਟ੍ਰਾਇਲ ਪਹਿਲਾਂ ਹੀ ਪੂਰਾ ਹੋ ਚੁੱਕਾ ਹੈ। ਸ਼ਰਧਾਲੂ ਅਸਮਾਨ ਦੀਆਂ ਉਚਾਈਆਂ ਤੋਂ ਮਹਾਂਕੁੰਭ ਦਾ ਆਨੰਦ ਮਾਣ ਸਕਣਗੇ ਅਤੇ ਨਾਲ ਹੀ ਸੂਬੇ ਦੀ ਅਮੀਰ ਕੁਦਰਤੀ ਵਿਰਾਸਤ ਤੋਂ ਜਾਣੂ ਹੋ ਸਕਣਗੇ। ਮਹਾਂਕੁੰਭ ’ਚ ਸ਼ਰਧਾਲੂਆਂ ਨੂੰ ਆਨੰਦਮਈ ਸਵਾਰੀ ਦਾ ਆਨੰਦ ਪ੍ਰਦਾਨ ਕਰਨ ਲਈ ਇੱਕ ਹੈਲੀਕਾਪਟਰ ਪਹਿਲਾਂ ਹੀ ਚਲਾਇਆ ਜਾ ਰਿਹਾ ਹੈ।
22 ਜਨਵਰੀ 2024 ਅਪਡੇਟ
ਯੋਗੀ ਆਦਿੱਤਿਆਨਾਥ (CM Yogi) ਨੇ ਪ੍ਰਯਾਗਰਾਜ (Prayagraj) ਵਿਖੇ ਮਹਾਂਕੁੰਭ 2025 ‘ਤੇ ਇੱਕ ਵਿਸ਼ੇਸ਼ ਕੈਬਨਿਟ ਮੀਟਿੰਗ ਦੀ ਪ੍ਰਧਾਨਗੀ ਕੀਤੀ। ਯੋਗੀ ਨੇ ਮਹਾਂਕੁੰਭ ਵਿਖੇ ਐਲਾਨ ਕੀਤਾ ਕਿ ਯੂਪੀ ਦੇ 7 ਜ਼ਿਲ੍ਹਿਆਂ ਨੂੰ ਮਿਲਾ ਕੇ ਇੱਕ ਨਵਾਂ ਧਾਰਮਿਕ ਸਰਕਟ ਬਣਾਇਆ ਜਾਵੇਗਾ। ਇਨ੍ਹਾਂ ਧਾਰਮਿਕ ਸਰਕਟ ‘ਚ ਪ੍ਰਯਾਗਰਾਜ, ਕਾਸ਼ੀ, ਚੰਦੌਲੀ, ਗਾਜ਼ੀਪੁਰ, ਜੌਨਪੁਰ, ਮਿਰਜ਼ਾਪੁਰ ਅਤੇ ਭਦੋਹੀ ਜ਼ਿਲ੍ਹੇ ਸ਼ਾਮਲ ਹੋਣਗੇ। ਅਰੈਲ ਵਿਖੇ ਇੱਕ ਪੁਲ ਨੂੰ ਵੀ ਪ੍ਰਵਾਨਗੀ ਦਿੱਤੀ ਗਈ ਹੈ।
ਮੁੱਖ ਮੰਤਰੀ ਯੋਗੀ ਨੇ ਲਗਭੱਗ ਆਪਣੇ 54 ਮੰਤਰੀਆਂ ਨਾਲ ਸੰਗਮ ਵਿੱਚ ਇਸ਼ਨਾਨ ਕੀਤਾ ਅਤੇ ਯੋਗੀ ਨੇ ਸਾਇਬੇਰੀਅਨ ਪੰਛੀਆਂ ਅਤੇ ਮੱਛੀਆਂ ਨੂੰ ਖਾਣਾ ਖੁਆਇਆ |
ਯੋਗੀ ਆਦਿੱਤਿਆਨਾਥ (CM Yogi) ਨੇ ਪ੍ਰਯਾਗਰਾਜ (Prayagraj) ਵਿਖੇ ਮਹਾਂਕੁੰਭ 2025 ‘ਤੇ ਇੱਕ ਵਿਸ਼ੇਸ਼ ਕੈਬਨਿਟ ਮੀਟਿੰਗ ਦੀ ਪ੍ਰਧਾਨਗੀ ਕੀਤੀ। ਯੋਗੀ ਨੇ ਮਹਾਂਕੁੰਭ ਵਿਖੇ ਐਲਾਨ ਕੀਤਾ ਕਿ ਯੂਪੀ ਦੇ 7 ਜ਼ਿਲ੍ਹਿਆਂ ਨੂੰ ਮਿਲਾ ਕੇ ਇੱਕ ਨਵਾਂ ਧਾਰਮਿਕ ਸਰਕਟ ਬਣਾਇਆ ਜਾਵੇਗਾ। ਇਨ੍ਹਾਂ ਧਾਰਮਿਕ ਸਰਕਟ ‘ਚ ਪ੍ਰਯਾਗਰਾਜ, ਕਾਸ਼ੀ, ਚੰਦੌਲੀ, ਗਾਜ਼ੀਪੁਰ, ਜੌਨਪੁਰ, ਮਿਰਜ਼ਾਪੁਰ ਅਤੇ ਭਦੋਹੀ ਜ਼ਿਲ੍ਹੇ ਸ਼ਾਮਲ ਹੋਣਗੇ। ਅਰੈਲ ਵਿਖੇ ਇੱਕ ਪੁਲ ਨੂੰ ਵੀ ਪ੍ਰਵਾਨਗੀ ਦਿੱਤੀ ਗਈ ਹੈ।
ਸਵੇਰ 11 ਵਜੇ 22 ਜਨਵਰੀ 2024 ਅਪਡੇਟ
ਉੱਤਰ ਪ੍ਰਦੇਸ਼ ਦੀ ਮੰਤਰੀ ਮੰਡਲ ਪ੍ਰਯਾਗਰਾਜ ਜਾਵੇਗੀ
ਯੂਪੀ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ 22 ਜਨਵਰੀ 2025 ਨੂੰ ਸਵੇਰੇ 11:25 ਵਜੇ ਪ੍ਰਯਾਗਰਾਜ ਪਹੁੰਚਣਗੇ। ਇਸ ਤੋਂ ਬਾਅਦ ਸੀਐਮ ਯੋਗੀ ਤ੍ਰਿਵੇਣੀ ਸੰਗਮ ਦਾ ਦੌਰਾ ਕਰਨਗੇ। ਯੋਗੀ ਅਰੈਲ ਆਡੀਟੋਰੀਅਮ ‘ਚ ਕੈਬਨਿਟ ਮੀਟਿੰਗ ‘ਚ ਸ਼ਾਮਲ ਹੋਣਗੇ। ਮੀਟਿੰਗ ਤੋਂ ਬਾਅਦ ਯੋਗੀ ਆਦਿੱਤਿਆਨਾਥ ਇੱਕ ਪ੍ਰੈਸ ਕਾਨਫਰੰਸ ਵੀ ਕਰਨਗੇ। ਮੁੱਖ ਮੰਤਰੀ ਯੋਗੀ ਅੱਜ ਆਪਣੇ ਮੰਤਰੀ ਮੰਡਲ ਨਾਲ ਪਵਿੱਤਰ ਇਸ਼ਨਾਨ ਕਰਨਗੇ।
ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਅੱਜ ਦੁਪਹਿਰ 1 ਵਜੇ ਮਹਾਕੁੰਭ ਨਗਰ ਦੇ ਤ੍ਰਿਵੇਣੀ ਕੰਪਲੈਕਸ ਅਰੈਲ ਵਿਖੇ ਪ੍ਰੈਸ ਕਾਨਫਰੰਸ ਕਰਨਗੇ। ਕੈਬਨਿਟ ਮੀਟਿੰਗ ਤੋਂ ਬਾਅਦ ਮੁੱਖ ਮੰਤਰੀ ਯੋਗੀ ਮੀਡੀਆ ਨਾਲ ਗੱਲਬਾਤ ਕਰਨਗੇ ਅਤੇ ਮਹਾਂਕੁੰਭ ਨਾਲ ਸਬੰਧਤ ਮਹੱਤਵਪੂਰਨ ਜਾਣਕਾਰੀ ਸਾਂਝੀ ਕਰਨਗੇ।
21 ਜਨਵਰੀ 2024 ਅਪਡੇਟ
ਪ੍ਰਯਾਗਰਾਜ ‘ਚ ਜੂਨਾ ਅਖਾੜਾ ਵੱਲੋਂ ਪੰਚਕੋਸੀ ਪਰਿਕਰਮਾ ਸ਼ੁਰੂ
ਜੂਨਾ ਅਖਾੜੇ ਦੇ ਪ੍ਰਧਾਨ ਹਰੀ ਗਿਰੀ ਦੀ ਅਗਵਾਈ ਹੇਠ ਅਖਾੜੇ ਦੇ ਸੰਤਾਂ ਅਤੇ ਰਿਸ਼ੀਆਂ ਨੇ ਗੰਗਾ ਦੀ ਪੂਜਾ ਕਰਕੇ ਪੰਚਕੋਸੀ ਪਰਿਕਰਮਾ ਦੀ ਸ਼ੁਰੂਆਤ ਕੀਤੀ। ਇਹ ਪੰਚਕੋਸੀ ਪਰਿਕਰਮਾ 5 ਦਿਨਾਂ ਤੱਕ ਚੱਲੇਗੀ ਅਤੇ 24 ਜਨਵਰੀ ਨੂੰ ਪ੍ਰਯਾਗਰਾਜ ਦੇ ਸਾਰੇ ਮੁੱਖ ਤੀਰਥ ਸਥਾਨਾਂ ਦੇ ਦਰਸ਼ਨ ਅਤੇ ਪੂਜਾ ਕਰਨ ਤੋਂ ਬਾਅਦ ਸੰਪੂਰਨ ਹੋਵੇਗੀ।
ਮਹਾਂਕੁੰਭ ਦੇ ਅੱਠਵੇਂ ਦਿਨ 53 ਲੱਖ ਸ਼ਰਧਾਲੂਆਂ ਨੇ ਪਵਿੱਤਰ ਡੁਬਕੀ ਲਗਾਈ
ਮਹਾਂਕੁੰਭ ਦੇ ਅੱਠਵੇਂ ਦਿਨ ਯਾਨੀ ਸੋਮਵਾਰ ਨੂੰ ਸ਼ਾਮ 6 ਵਜੇ ਤੱਕ 53 ਲੱਖ ਸ਼ਰਧਾਲੂਆਂ ਨੇ ਪਵਿੱਤਰ ਡੁਬਕੀ ਲਗਾਈ। ਇਸ ਵਿੱਚ 10 ਲੱਖ ਤੋਂ ਵੱਧ ਕਲਪਵਾਸੀ ਅਤੇ 43 ਲੱਖ ਤੋਂ ਵੱਧ ਸ਼ਰਧਾਲੂ ਸ਼ਾਮਲ ਹਨ। ਹੁਣ ਤੱਕ, 8.26 ਕਰੋੜ ਤੋਂ ਵੱਧ ਲੋਕ ਮਹਾਂਕੁੰਭ ਇਸ਼ਨਾਨ ਕਰ ਚੁੱਕੇ ਹਨ।
ਮਹਾਕੁੰਭ ਦੌਰਾਨ ਮੋਬਾਈਲ ਨੈੱਟਵਰਕ ਹੋਰ ਮਜ਼ਬੂਤ ਹੋਵੇਗਾ
ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਮਹਾਕੁੰਭ ‘ਚ ਮੋਬਾਈਲ ਨੈੱਟਵਰਕ ਨੂੰ ਹੋਰ ਬਿਹਤਰ ਬਣਾਉਣ ਦੇ ਨਿਰਦੇਸ਼ ਦਿੱਤੇ ਹਨ। ਸੀਐਮ ਯੋਗੀ ਨੇ ਕਿਹਾ ਕਿ ਮਹਾਂਕੁੰਭ ਖੇਤਰ ਵਿੱਚ ਮੋਬਾਈਲ ਨੈੱਟਵਰਕ ਨੂੰ ਬਿਹਤਰ ਬਣਾਇਆ ਜਾਣਾ ਚਾਹੀਦਾ ਹੈ।
ਪ੍ਰਯਾਗਰਾਜ ਮਹਾਂਕੁੰਭ ’ਚ ਅੱਗ ਲੱਗਣ ਦੀ ਘਟਨਾ ‘ਤੇ ਡੀਜੀ ਫਾਇਰ ਅਵਿਨਾਸ਼ ਚੰਦਰ ਨੇ ਕਿਹਾ, ਅਸੀਂ ਲੋਕਾਂ ਨੂੰ ਅੱਗ ਤੋਂ ਸਾਵਧਾਨ ਰਹਿਣ ਲਈ ਜਾਗਰੂਕ ਕਰ ਰਹੇ ਹਾਂ। ਕੁੰਭ ਮੇਲਾ ਖੇਤਰ ਵਿੱਚ 53 ਫਾਇਰ ਸਟੇਸ਼ਨ ਬਣਾਏ ਗਏ ਹਨ। ਇੱਥੇ 1400 ਫਾਇਰਫਾਈਟਰ ਤਾਇਨਾਤ ਹਨ। ਪੁਲਿਸ ਨੂੰ ਇਸ ਘਟਨਾ ਦੀ ਜਾਂਚ ਕਰਨ ਦਾ ਅਧਿਕਾਰ ਹੈ। ਸਥਾਨਕ ਪੁਲਿਸ ਅਧਿਕਾਰੀ ਮਾਮਲੇ ਦੀ ਜਾਂਚ ਕਰ ਰਹੇ ਹਨ। ਕਈ ਤਰ੍ਹਾਂ ਦੀਆਂ ਅਫਵਾਹਾਂ ਹਨ, ਪਰ ਅਸਲ ਕਾਰਨ ਜਾਂਚ ਤੋਂ ਬਾਅਦ ਹੀ ਪਤਾ ਲੱਗੇਗਾ।
20 ਜਨਵਰੀ 2024 ਅਪਡੇਟ
ਪ੍ਰਯਾਗਰਾਜ ‘ਚ ਚੱਲ ਰਹੇ ਮਹਾਕੁੰਭ ਮੇਲੇ ਦਾ ਅੱਜ ਅੱਠਵਾਂ ਦਿਨ ਹੈ, ਸੋਮਵਾਰ ਨੂੰ ਕਿੰਨਰ ਅਖਾੜੇ ਦੇ ਸਾਹਮਣੇ ਇੱਕ ਤੰਬੂ ਨੂੰ ਅੱਗ ਲੱਗਣ ਦੀ ਲੱਗਣ ਦੀ ਖ਼ਬਰ ਸਾਹਮਣੇ ਆਈ ਹੈ, ਹਾਲਾਂਕਿ ਅੱਗ ‘ਤੇ ਤੁਰੰਤ ‘ਤੇ ਕਾਬੂ ਪਾ ਲਿਆ ਗਿਆ। ਰਾਹਤ ਦੀ ਗੱਲ ਹੈ ਕਿ ਇਸ ਘਟਨਾ ‘ਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਹੈ। ਸੋਮਵਾਰ ਤੋਂ ਕਵੀ ਕੁਮਾਰ ਵਿਸ਼ਵਾਸ ਸ਼ਰਧਾਲੂਆਂ ਨੂੰ ਰਾਮ ਕਥਾ ‘ਆਪਣੇ-ਆਪਣੇ ਰਾਮ’ ਸੁਣਾਉਣਗੇ। ਇਹ ਰਾਮ ਕਥਾ ਸ਼ਾਮ 5:00 ਵਜੇ ਤੋਂ ਰਾਤ 8:00 ਵਜੇ ਤੱਕ ਗੰਗਾ ਪੰਡਾਲ ਵਿੱਚ ਚੱਲੇਗੀ।
ਸੀਐਮ ਯੋਗੀ ਵੱਲੋਂ ਘਟਨਾ ਸਥਾਨ ਦਾ ਦੌਰਾ
ਉੱਤਰ ਪ੍ਰਦੇਸ਼ ਦੇ ਰਾਜਪਾਲ ਆਨੰਦੀਬੇਨ ਪਟੇਲ ਵੀ ਮਹਾਕੁੰਭ ਨਗਰ ‘ਚ ਕਈ ਪ੍ਰੋਗਰਾਮਾਂ ‘ਚ ਹਿੱਸਾ ਲੈਣਗੇ। ਐਤਵਾਰ ਨੂੰ ਮੇਲਾ ਖੇਤਰ ‘ਚ ਲੱਗੀ ਅੱਗ ਦੀ ਮੈਜਿਸਟ੍ਰੇਟ ਜਾਂਚ ਹੋਵੇਗੀ। ਅੱਗ ‘ਚ 200 ਟੈਂਟ ਸੜ ਕੇ ਸੁਆਹ ਹੋ ਗਏ। ਸੀਐਮ ਯੋਗੀ ਨੇ ਮੌਕੇ ‘ਤੇ ਘਟਨਾ ਸਥਾਨ ਦਾ ਦੌਰਾ ਕੀਤਾ ਅਤੇ ਨਿਰੀਖਣ ਕੀਤਾ। ਅੱਗ ਦੀਆਂ ਲਪਟਾਂ ਇੰਨੀਆਂ ਉੱਚੀਆਂ ਸਨ ਕਿ ਪੰਜ ਕਿਲੋਮੀਟਰ ਦੂਰ ਤੋਂ ਵੀ ਦ੍ਰਿਸ਼ ਸਾਫ਼ ਦਿਖਾਈ ਦੇ ਰਹੀਆਂ ਸਨ।
ਪ੍ਰਯਾਗਰਾਜ ਕੁੰਭ ਮੇਲੇ ‘ਚ ਲੱਕੜ ਦਾ ਵਿਸ਼ੇਸ਼ ਪ੍ਰਬੰਧ
ਪ੍ਰਯਾਗਰਾਜ ਮਹਾਕੁੰਭ ‘ਚ ਸ਼ਰਧਾਲੂਆਂ ਨੂੰ ਠੰਡ ਤੋਂ ਬਚਾਉਣ ਲਈ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਹਨ। ਮਹਾਂਕੁੰਭ ਵਿੱਚ ਅੱਗ ਬਾਲਣ ਲਈ ਲੱਕੜ ਔਨਲਾਈਨ ਉਪਲਬਧ ਹੋਵੇਗੀ। ਇਸ ਲਈ 16 ਡਿਪੂ ਬਣਾਏ ਗਏ ਹਨ। ਤੁਸੀਂ ਇੰਟਰਨੈੱਟ ‘ਤੇ ਫਾਇਰਵੁੱਡ ਡਿਪੋ ਪ੍ਰਯਾਗਰਾਜ ਟਾਈਪ ਕਰਕੇ ਉਹਨਾਂ ਨੂੰ ਖੋਜ ਸਕਦੇ ਹੋ। ਸ਼ਰਧਾਲੂਆਂ ਲਈ ਡਿਜੀਟਲ ਮਾਧਿਅਮ ਰਾਹੀਂ ਅੱਗ ਬਾਲਣ ਲਈ ਲੱਕੜੀ ਦਾ ਪ੍ਰਬੰਧ ਕੀਤਾ ਗਿਆ ਹੈ।
18 ਜਨਵਰੀ 2024 ਅਪਡੇਟ
IIT ਬਾਬਾ ਮਹਾਂਕੁੰਭ ਤੋਂ ਹੋਏ ਗਾਇਬ
ਪ੍ਰਯਾਗਰਾਜ ‘ਚ ਚੱਲ ਰਹੇ ਮਹਾਂਕੁੰਭ ਦੌਰਾਨ ਸੁਰਖੀਆਂ ‘ਚ ਆਏ IIT ਬਾਬਾ ਭਾਵ ਅਭੈ ਸਿੰਘ ਅਚਾਨਕ ਕੁੰਭ ਤੋਂ ਲਾਪਤਾ ਹੋ ਗਏ ਹਨ। ਕੋਈ ਨਹੀਂ ਜਾਣਦਾ ਕਿ ਉਹ ਕਿੱਥੇ ਚਲਾ ਗਿਆ ਹੈ। ਉਸਨੂੰ ਲੱਭਦੇ ਹੋਏ ਉਸਦੇ ਮਾਪੇ ਕੁੰਭ ਮੇਲਾ ‘ਚ ਪਹੁੰਚ ਗਏ ਪਰ ਉਨ੍ਹਾਂ ਨੂੰ ਅਭੈ ਸਿੰਘ ਨਹੀਂ ਮਿਲਿਆ। ਬਾਬਾ ਜੂਨਾ ਅਖਾੜੇ ਦੇ 16ਵੇਂ ਜੂਨਾਂ ਅਖਾੜੇ ‘ਚ ਰਹਿ ਰਿਹਾ ਸੀ।
ਯੂਪੀ ਬੋਰਡ ਦੀ ਪ੍ਰੀਖਿਆ ਟਲੀ
ਪ੍ਰਯਾਗਰਾਜ ਵਿੱਚ ਮਹਾਂਕੁੰਭ ਮੇਲੇ ਅਤੇ ਯੂਪੀ ਬੋਰਡ ਦੀਆਂ ਪ੍ਰੀਖਿਆਵਾਂ ਦੇ ਮੱਦੇਨਜ਼ਰ, 28 ਫਰਵਰੀ ਤੱਕ ,ਮੁਲਤਵੀ ਦੇ ਹੁਕਮ ਲਾਗੂ ਕਰ ਦਿੱਤੇ ਹਨ। ਇਹ ਹੁਕਮ ਪ੍ਰਯਾਗਰਾਜ ਦੇ ਜ਼ਿਲ੍ਹਾ ਮੈਜਿਸਟ੍ਰੇਟ ਨੇ ਜਾਰੀ ਕੀਤਾ ਹੈ। ਅਗਲੇ ਇੱਕ ਮਹੀਨੇ ‘ਚ ਪ੍ਰਯਾਗਰਾਜ ‘ਚ ਦੋ ਵੱਡੇ ਸ਼ਾਹੀ ਇਸ਼ਨਾਨ ਹਨ, ਮੌਨੀ ਮੱਸਿਆ ਅਤੇ ਮਹਾਂਸ਼ਿਵਰਾਤਰੀ।
ਪ੍ਰਯਾਗਰਾਜ ਦੇ ਕੁੰਭ ਖੇਤਰ ‘ਚ ਪ੍ਰਸਤਾਵਿਤ ਯੂਪੀ ਕੈਬਨਿਟ ਮੀਟਿੰਗ 21 ਜਨਵਰੀ ਨੂੰ ਨਹੀਂ ਹੋਵੇਗੀ। ਸਰਕਾਰ ਨੇ ਇਸ ਮੀਟਿੰਗ ਨੂੰ ਫਿਲਹਾਲ ਮੁਲਤਵੀ ਕਰ ਦਿੱਤਾ ਹੈ। ਹੁਣ ਇਹ ਮੀਟਿੰਗ ਫਰਵਰੀ ਦੇ ਪਹਿਲੇ ਹਫ਼ਤੇ ਹੋਣ ਦੀ ਸੰਭਾਵਨਾ ਹੈ।
17 ਜਨਵਰੀ 2024 ਅਪਡੇਟ
ਮਹਾਕੁੰਭ ਮੇਲੇ 2025 ‘ਚ ਸਰਕਾਰ ਲਈ ਅਗਲਾ ਇਮਤਿਹਾਨ ਮੌਨੀ ਮੱਸਿਆ ਮੇਲਾ ਹੈ। ਇਸ ਸਬੰਧੀ ਡੀਜੀਪੀ ਪ੍ਰਸ਼ਾਂਤ ਕੁਮਾਰ ਅਤੇ ਹੋਰ ਉੱਚ ਅਧਿਕਾਰੀਆਂ ਨੇ ਤਿਆਰੀਆਂ ਦੀ ਜਾਂਚ ਕੀਤੀ ਹੈ। ਉਸ ਦਿਨ 8 ਤੋਂ 10 ਕਰੋੜ ਸ਼ਰਧਾਲੂ ਆ ਸਕਦੇ ਹਨ।
25 ਲੱਖ ਲੋਕ ਮਹਾਂਕੁੰਭ ਕਲਪਾਵਾਸ ਕਰਨ ਲਈ ਪਹੁੰਚੇ
ਮਹਾਂਕੁੰਭ ’ਚ ਕਲਪਾਵਾਸ ਕਰਨ ਲਈ ਲਗਭਗ 25 ਲੱਖ ਸ਼ਰਧਾਲੂ ਪਹੁੰਚੇ ਹਨ। ਇਸ ਵਿੱਚ ਵਾਰਾਣਸੀ ਦੇ ਬਾਬਾ ਸ਼ਿਵਾਨੰਦ ਵੀ ਸ਼ਾਮਲ ਹਨ ਜੋ 126 ਸਾਲ ਪੁਰਾਣੇ ਹੋਣ ਦਾ ਦਾਅਵਾ ਕਰਦੇ ਹਨ। ਜੋ ਲੰਬੇ ਸਮੇਂ ਤੋਂ ਕਲਪਾਵਸ ਵਰਤ ਰੱਖ ਰਹੇ ਹਨ।
ਮਹਾਂਕੁੰਭ ਇਸ਼ਨਾਨ ਦਾ ਅੰਕੜਾ 50 ਕਰੋੜ ਤੱਕ ਪਹੁੰਚ ਸਕਦਾ ਹੈ |
ਉੱਤਰ ਪ੍ਰਦੇਸ਼ ਦੀ ਯੋਗੀ ਆਦਿੱਤਿਆਨਾਥ ਸਰਕਾਰ ਦਾ ਅੰਦਾਜ਼ਾ ਹੈ ਕਿ ਇਸ ਵਾਰ ਮਹਾਂਕੁੰਭ ’ਚ ਲਗਭਗ 45 ਕਰੋੜ ਸ਼ਰਧਾਲੂ ਆ ਸਕਦੇ ਹਨ। ਮਹਾਂਕੁੰਭ ਮੇਲੇ ਦੇ ਸਿਰਫ਼ ਛੇ ਦਿਨਾਂ ‘ਚ, 7 ਕਰੋੜ ਇਸ਼ਨਾਨ ਕਰਨ ਵਾਲੇ ਪਹੁੰਚੇ ਹਨ। ਅਜਿਹੀ ਸਥਿਤੀ ‘ਚ ਇਹ ਗਿਣਤੀ 50 ਕਰੋੜ ਤੱਕ ਵੀ ਪਹੁੰਚ ਸਕਦੀ ਹੈ।
ਰਾਹੁਲ ਗਾਂਧੀ-ਪ੍ਰਿਯੰਕਾ ਗਾਂਧੀ ਮਹਾਂਕੁੰਭ ਜਾਣਗੇ
ਕਾਂਗਰਸ ਬੁਲਾਰੇ ਅੰਸ਼ੂ ਅਵਸਥੀ ਨੇ ਕਿਹਾ, ਸੰਤ ਅਤੇ ਰਿਸ਼ੀ ਰਾਹੁਲ ਗਾਂਧੀ ਅਤੇ ਪ੍ਰਿਯੰਕਾ ਗਾਂਧੀ ਦੇ ਮਹਾਂਕੁੰਭ ਦੇ ਦੌਰੇ ਦਾ ਸਵਾਗਤ ਕਰ ਰਹੇ ਹਨ, ਪਰ ਸੌੜੀ ਮਾਨਸਿਕਤਾ ਵਾਲੇ ਭਾਜਪਾ ਆਗੂ ਇਸਦਾ ਵਿਰੋਧ ਕਰਕੇ ਸਨਾਤਨ ਧਰਮ ਦਾ ਅਪਮਾਨ ਕਰ ਰਹੇ ਹਨ।
16 ਜਨਵਰੀ 2024 ਅਪਡੇਟ
ਦੂਜਾ ਸ਼ਾਹੀ ਇਸ਼ਨਾਨ
ਮਹਾਕੁੰਭ ਦਾ ਦੂਜਾ ਸ਼ਾਹੀ ਇਸ਼ਨਾਨ ਮੌਨੀ ਮੱਸਿਆ ਵਾਲੇ ਦਿਨ ਹੋਵੇਗਾ। ਮੌਨੀ ਮੱਸਿਆ 29 ਜਨਵਰੀ 2025 ਨੂੰ ਹੈ। ਭਾਵੇਂ ਮੱਸਿਆ 28 ਜਨਵਰੀ ਨੂੰ ਸ਼ਾਮ 7:35 ਵਜੇ ਸ਼ੁਰੂ ਹੋਵੇਗੀ, ਪਰ ਮੌਨੀ ਮੱਸਿਆ ਦਾ ਸ਼ਾਹੀ ਇਸ਼ਨਾਨ 29 ਜਨਵਰੀ ਨੂੰ ਹੀ ਕੀਤਾ ਜਾਵੇਗਾ। ਮੌਨੀ ਮੱਸਿਆ 29 ਜਨਵਰੀ ਨੂੰ ਸ਼ਾਮ 6:05 ਵਜੇ ਸਮਾਪਤ ਹੋਵੇਗੀ। ਇਸ ਤੋਂ ਬਾਅਦ ਤੀਜਾ ਸ਼ਾਹੀ ਇਸ਼ਨਾਨ 3 ਫਰਵਰੀ ਨੂੰ ਬਸੰਤ ਪੰਚਮੀ ਵਾਲੇ ਦਿਨ ਹੋਵੇਗਾ।
ਸ਼ੰਕਰਾਚਾਰੀਆ ਮੌਨੀ ਮੱਸਿਆ ‘ਤੇ ਇਸ਼ਨਾਨ ਕਰਨਗੇ।
2025 ਦੇ ਮਹਾਕੁੰਭ ਦੇ ਪਹਿਲੇ ਅੰਮ੍ਰਿਤ ਇਸ਼ਨਾਨ ਦੇ ਮੌਕੇ ‘ਤੇ ਸ਼ੰਕਰਾਚਾਰੀਆ ਨੇ ਇਸ਼ਨਾਨ ਨਹੀਂ ਕੀਤਾ। ਸਾਰੇ ਸ਼ੰਕਰਾਚਾਰੀਆ ਮੌਨੀ ਮੱਸਿਆ ਨੂੰ ਇਸ਼ਨਾਨ ਕਰਨਗੇ। ਸ਼ੰਕਰਾਚਾਰੀਆ ਸਵਾਮੀ ਅਵਿਮੁਕਤੇਸ਼ਵਰਾਨੰਦ ਸਰਸਵਤੀ ਪ੍ਰਯਾਗਰਾਜ ਵਿੱਚ ਮੌਜੂਦ ਹਨ।
15 ਜਨਵਰੀ 2024 ਅਪਡੇਟ
ਮਕਰ ਸੰਕ੍ਰਾਂਤੀ ਵਾਲੇ ਦਿਨ ਸਾਰੇ 13 ਅਖਾੜਿਆਂ ਦੇ ਸੰਤਾਂ ਨੇ ਇਸ਼ਨਾਨ ਕੀਤਾ। ਸ਼੍ਰੀ ਪੰਚਾਇਤੀ ਅਖਾੜਾ ਮਹਾਂਨਿਰਵਾਣੀ ਨੇ ਸਭ ਤੋਂ ਪਹਿਲਾਂ ਅੰਮ੍ਰਿਤ ਇਸ਼ਨਾਨ ਕੀਤਾ ਅਤੇ ਅੰਤ ‘ਚ, ਸ਼੍ਰੀ ਪੰਚਾਇਤੀ ਅਖਾੜਾ ਨਿਰਮਲ ਇਸ਼ਨਾਨ ਕੀਤਾ। ਸਾਰੇ ਅਖਾੜਿਆਂ ਨੂੰ 40-40 ਮਿੰਟ ਦਿੱਤੇ ਗਏ। ਸ਼ਾਮ 5.30 ਵਜੇ ਤੱਕ, ਕੁੰਭ ਵਿੱਚ ਇਸ਼ਨਾਨ ਕਰਨ ਵਾਲੇ ਲੋਕਾਂ ਦੀ ਗਿਣਤੀ 3.5 ਕਰੋੜ ਨੂੰ ਪਾਰ ਕਰ ਗਈ ਸੀ।
ਮਕਰ ਸੰਕ੍ਰਾਂਤੀ ਦੇ ਮੌਕੇ ‘ਤੇ ਪ੍ਰਯਾਗਰਾਜ ਇੱਕ ਦਿਨ ਲਈ ਦੁਨੀਆ ਦਾ ਸਭ ਤੋਂ ਵੱਧ ਆਬਾਦੀ ਵਾਲਾ ਸ਼ਹਿਰ ਬਣ ਗਿਆ। ਇਹ ਪ੍ਰਾਪਤੀ ਪ੍ਰਯਾਗਰਾਜ ਦੇ ਖਾਤੇ ‘ਚ ਮਹਾਕੁੰਭ ਦੇ ਪਹਿਲੇ ਅੰਮ੍ਰਿਤ ਇਸ਼ਨਾਨ ਉਤਸਵ ‘ਤੇ ਦੇਸ਼-ਵਿਦੇਸ਼ ਤੋਂ ਆਏ ਲੱਖਾਂ ਸ਼ਰਧਾਲੂਆਂ ਕਾਰਨ ਦਰਜ ਹੋਈ।
ਇੱਕ ਦਿਨ ਲਈ ਪ੍ਰਯਾਗਰਾਜ ਦੀ ਆਬਾਦੀ ਚਾਰ ਕਰੋੜ ਦਾ ਅੰਕੜਾ ਪਾਰ ਕਰ ਗਈ। ਮਕਰ ਸੰਕ੍ਰਾਂਤੀ ‘ਤੇ, 3.50 ਕਰੋੜ ਸੰਗਤਾਂ ਨੇ ਇੱਥੇ ਪਵਿੱਤਰ ਡੁਬਕੀ ਲਗਾਈ। ਪ੍ਰਯਾਗਰਾਜ ਜ਼ਿਲ੍ਹੇ ਦੀ ਆਬਾਦੀ ਲਗਭਗ 70 ਲੱਖ ਹੈ।
14 ਜਨਵਰੀ 2024 ਅਪਡੇਟ
ਮਹਾਂਕੁੰਭ 2025 ਤੋਂ ਪਹਿਲਾਂ ‘ਅੰਮ੍ਰਿਤ ਇਸ਼ਨਾਨ’ ਲਈ ਸਾਰੀਆਂ ਤਿਆਰੀਆਂ ਮੁਕੰਮਲ ਹੋ ਗਈਆਂ ਹਨ। ਦੱਸ ਦੇਈਏ ਕਿ ਪਹਿਲਾ ਅੰਮ੍ਰਿਤ ਇਸ਼ਨਾਨ 14 ਜਨਵਰੀ ਯਾਨੀ ਕਿ ਅੱਜ ਨੂੰ ਮਕਰ ਸੰਕ੍ਰਾਂਤੀ ਦੇ ਮੌਕੇ ਕੀਤਾ ਜਾਵੇਗਾ, ‘ਤੇ, ਦੂਜਾ 29 ਜਨਵਰੀ ਨੂੰ ਮੌਨੀ ਅਮਾਵਸਯ ‘ਤੇ ਅਤੇ ਤੀਜਾ 12 ਫਰਵਰੀ ਨੂੰ ਬਸੰਤ ਪੰਚਮੀ ‘ਤੇ ਹੋਵੇਗਾ।
ਉਥੇ ਹੀ ਦੱਸ ਦੇਈਏ ਕਿ ਸੋਮਵਾਰ (13 ਜਨਵਰੀ, 2025) ਨੂੰ, ਲੱਖਾਂ ਸ਼ਰਧਾਲੂਆਂ ਨੇ ਪ੍ਰਯਾਗਰਾਜ ਦੇ ਸੰਗਮ ਕੰਢੇ ‘ਤੇ ਪਵਿੱਤਰ ਡੁਬਕੀ ਲਗਾਈ। ਸਵੇਰੇ 9:30 ਵਜੇ ਤੱਕ, ਲਗਭਗ 60 ਲੱਖ ਲੋਕ ਇਸ਼ਨਾਨ ਕਰ ਚੁੱਕੇ ਸਨ। ਮਹਾਂਕੁੰਭ ਦੌਰਾਨ ਕੁੱਲ ਛੇ ਸ਼ਾਹੀ ਇਸ਼ਨਾਨ ਹੋਣਗੇ, ਜਿਨ੍ਹਾਂ ਵਿੱਚੋਂ ਤਿੰਨ ‘ਅੰਮ੍ਰਿਤ ਇਸ਼ਨਾਨ’ ਹਨ।
ਮਕਰ ਸੰਕ੍ਰਾਂਤੀ ‘ਤੇ ਪਹਿਲਾ ਅੰਮ੍ਰਿਤ ਇਸ਼ਨਾਨ ਮੌਕੇ ਸਭ ਤੋਂ ਪਹਿਲਾਂ ਮਹਾਂਨਿਰਵਾਣੀ ਅਤੇ ਅਟਲ ਅਖਾੜੇ ਦੇ ਸੰਤਾਂ-ਮਹੰਤਾਂ ਅਤੇ ਮਹਾਂਮੰਡਲੇਸ਼ਵਰਾਂ ਨੇ ਅੰਮ੍ਰਿਤ ਇਸ਼ਨਾਨ ਕੀਤਾ ਹੈ ।
ਦੱਸ ਦੇਈਏ ਕਿ ਇਸ ਸਾਲ ਯਾਨੀ ਕਿ 2025 ਦਾ ਮਹਾਂਕੁੰਭ ਮੇਲਾ ਵਿਸ਼ਵਾਸ, ਸ਼ਰਧਾ ਅਤੇ ਅਧਿਆਤਮਿਕ ਏਕਤਾ ਦੇ ਜ਼ਬਰਦਸਤ ਪ੍ਰਦਰਸ਼ਨ ਨਾਲ ਸ਼ੁਰੂ ਹੋਇਆ। ਜਿਸਨੇ ਅੱਜ 144 ਸਾਲਾਂ ਵਿੱਚ ਇੱਕ ਵਾਰ ਦੇਖੀ ਗਈ ਅਧਿਆਤਮਿਕ ਸ਼ਾਨ ਦੀਆਂ ਯਾਦਾਂ ਵਾਪਸ ਲਿਆ ਦਿੱਤੀਆਂ ਹਨ । ਇੱਥੇ ਦੇਸ਼ ਅਤੇ ਦੁਨੀਆ ਭਰ ਦੇ ਸ਼ਰਧਾਲੂਆਂ ਦਾ ਇਕੱਠ ਨਾ ਸਿਰਫ਼ ਜਾਪ, ਧਿਆਨ ਅਤੇ ਅਧਿਆਤਮਿਕ ਪੂਰਤੀ ਲਈ ਇਕੱਠਾ ਹੁੰਦਾ ਹੈ, ਸਗੋਂ ਮਹਾਂਕੁੰਭ ਦੀ ਬੇਮਿਸਾਲ ਸੱਭਿਆਚਾਰਕ ਵਿਰਾਸਤ ਦਾ ਅਨੁਭਵ ਕਰਨ ਲਈ ਵੀ ਇਕੱਠਾ ਹੁੰਦਾ ਹੈ।
ਦੱਸ ਦੇਈਏ ਕਿ ਅੱਜ ਯਾਨੀ ਕਿ ਮੰਗਲਵਾਰ ਨੂੰ ਮਕਰ ਸੰਕ੍ਰਾਂਤੀ ਦੇ ਤਿਉਹਾਰ ਦੇ ਮੌਕੇ ‘ਤੇ, ਅਖਾੜਿਆਂ ਦਾ ਅੰਮ੍ਰਿਤ ਇਸ਼ਨਾਨ ਲਗਭਗ ਸਾਢੇ ਨੌਂ ਘੰਟੇ ਜਾਰੀ ਰਹੇਗਾ। ਕੈਂਪ ਛੱਡਣ ਅਤੇ ਵਾਪਸ ਆਉਣ ਵਿੱਚ 12 ਘੰਟੇ ਤੋਂ ਵੱਧ ਸਮਾਂ ਲੱਗੇਗਾ। ਅਖਾੜਿਆਂ ਦੇ ਸੰਤਾਂ ਅਤੇ ਨਾਗਾਂ ਦੇ ਇਸ਼ਨਾਨ ਦਾ ਸਮਾਂ ਨਿਸ਼ਚਿਤ ਕੀਤਾ ਗਿਆ ਹੈ।
ਸਭ ਤੋਂ ਪਹਿਲਾਂ, ਮਹਾਂਨਿਰਵਾਣੀ ਅਤੇ ਅਟਲ ਅਖਾੜੇ ਦੇ ਸੰਤ ਇਸ਼ਨਾਨ ਕਰਨਗੇ। ਸੰਤ ਸਵੇਰੇ 6:15 ਵਜੇ ਸੰਗਮ ਪਹੁੰਚਣਗੇ ਅਤੇ ਅੰਮ੍ਰਿਤ ਇਸ਼ਨਾਨ ਲਗਭਗ 40 ਮਿੰਟ ਤੱਕ ਹੋਵੇਗਾ। ਇਸ ਤੋਂ ਬਾਅਦ, ਨਿਰੰਜਨੀ ਅਤੇ ਆਨੰਦ ਅਖਾੜੇ ਦੇ ਸੰਤ ਸ਼ਾਮ 7:05 ਵਜੇ ਇਸ਼ਨਾਨ ਕਰਨਗੇ।
ਜੂਨਾ, ਆਵਾਹਨ ਅਤੇ ਪੰਚਗਨੀ ਅਖਾੜੇ ਦੇ ਸੰਤ ਸਵੇਰੇ 8 ਵਜੇ ਇਸ਼ਨਾਨ ਕਰਨਗੇ। ਨਿਰਵਾਣੀ, ਦਿਗੰਬਰ, ਨਿਰਮੋਹੀ ਅਖਾੜੇ ਦੇ ਸੰਤ ਕ੍ਰਮਵਾਰ 10:40, 11:20 ਅਤੇ 12:20 ਵਜੇ ਇਸ਼ਨਾਨ ਕਰਨਗੇ। ਨਵਾਂ ਪੰਚਾਇਤੀ ਅਖਾੜਾ ਦੇ ਸੰਤ ਦੁਪਹਿਰ 1:15 ਵਜੇ ਅਤੇ ਵੱਡਾ ਪੰਚਾਇਤੀ 2:20 ਵਜੇ ਇਸ਼ਨਾਨ ਕਰਨਗੇ, ਜਦੋਂ ਕਿ ਨਿਰਮਲ ਪੰਚਾਇਤੀ ਅਖਾੜਾ ਦੇ ਸੰਤ ਸ਼ਾਮ 3:40 ਤੋਂ 4:20 ਵਜੇ ਤੱਕ ਇਸ਼ਨਾਨ ਕਰਨਗੇ।
‘ਅੱਜ ਲਗਭਗ 3-4 ਕਰੋੜ ਲੋਕ ਪਵਿੱਤਰ ਇਸ਼ਨਾਨ ਕਰਨਗੇ’
ਆਚਾਰੀਆ ਮਹਾਮੰਡਲੇਸ਼ਵਰ, ਸ਼੍ਰੀਪੰਚਾਇਤ ਨਿਰੰਜਨੀ ਅਖਾੜਾ ਸਵਾਮੀ ਕੈਲਾਸ਼ਾਨੰਦ ਗਿਰੀ ਨੇ ਕਿਹਾ, ‘ਸ਼ਾਹੀ ਇਸ਼ਨਾਨ ਦੁਰਲੱਭ ਹੈ, ਦੇਵਤਿਆਂ ਲਈ ਵੀ ਦੁਰਲੱਭ ਹੈ।’ ਅੱਜ ਸੂਰਜ ਉੱਤਰਾਇਣ ਵਿੱਚ ਹੋਵੇਗਾ। ਦੇਸ਼ ਦੇ ਸਾਰੇ ਸੰਤ ਇਸ ਤਾਰੀਖ਼ ਦੀ ਉਡੀਕ ਕਰਦੇ ਹਨ। ਭਾਰਤੀ ਪਰੰਪਰਾ ਵਿੱਚ, ਇਸ ਇਸ਼ਨਾਨ ਬਾਰੇ ਬਹੁਤ ਉਤਸੁਕਤਾ ਹੈ। ਦੇਵਤੇ ਵੀ ਇਸ ਇਸ਼ਨਾਨ ਨੂੰ ਦੇਖਣ ਲਈ ਤਰਸਦੇ ਹਨ। ਅੱਜ ਲਗਭਗ 3-4 ਕਰੋੜ ਲੋਕ ਪਵਿੱਤਰ ਇਸ਼ਨਾਨ ਕਰਨਗੇ।
12 ਜਨਵਰੀ 2024 ਅਪਡੇਟ
ਪ੍ਰਯਾਗਰਾਜ ‘ਚ ਮਹਾਂਕੁੰਭ ਦਾ ਪਹਿਲਾ ਸ਼ਾਹੀ ਇਸ਼ਨਾਨ ਕੱਲ੍ਹ ਹੋਵੇਗਾ। ਇਸ ਦੇ ਨਾਲ ਹੀ, ਲੱਖਾਂ ਸ਼ਰਧਾਲੂ ਸੰਗਮ ਪਹੁੰਚ ਰਹੇ ਹਨ। ਸ਼ਨੀਵਾਰ ਨੂੰ ਪ੍ਰਦੋਸ਼ ਤਾਰੀਖ਼ ‘ਤੇ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂਆਂ ਨੇ ਸੰਗਮ ਵਿੱਚ ਪਵਿੱਤਰ ਡੁਬਕੀ ਲਗਾਈ। ਇਸ਼ਨਾਨ ਅਤੇ ਦਾਨ ਦਾ ਸਿਲਸਿਲਾ ਸ਼ਾਮ ਤੱਕ ਜਾਰੀ ਰਿਹਾ। ਮਹਾਂਕੁੰਭ ਵਿੱਚ ਤਿੰਨ ਦਿਨਾਂ ਦੀ ਤਪੱਸਿਆ ਤੋਂ ਬਾਅਦ, 12 ਹਜ਼ਾਰ ਨਾਗ ਸੰਤ ਬਣ ਜਾਣਗੇ। ਜੂਨਾ, ਨਿਰੰਜਨੀ ਅਤੇ ਮਹਾਂਨਿਰਵਾਣੀ ਅਖਾੜਿਆਂ ਨੇ ਵੀ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਹਨ।
ਮਹਾਂਕੁੰਭ ਤੋਂ ਦੋ ਦਿਨ ਪਹਿਲਾਂ 25 ਲੱਖ ਸ਼ਰਧਾਲੂਆਂ ਨੇ ਸੰਗਮ ‘ਚ ਪਵਿੱਤਰ ਡੁਬਕੀ ਲਗਾਈ
ਮਹਾਂਕੁੰਭ ਇਸ਼ਨਾਨ ਤਿਉਹਾਰ ਤੋਂ ਦੋ ਦਿਨ ਪਹਿਲਾਂ ਸ਼ਨੀਵਾਰ ਨੂੰ ਲਗਭਗ 25 ਲੱਖ ਲੋਕਾਂ ਨੇ ਗੰਗਾ ਅਤੇ ਸੰਗਮ ਵਿੱਚ ਡੁਬਕੀ ਲਗਾਈ। ਅਧਿਕਾਰੀਆਂ ਨੇ ਇਹ ਜਾਣਕਾਰੀ ਦਿੱਤੀ। ਸਵੇਰੇ ਸੰਘਣੀ ਧੁੰਦ ਦੇ ਬਾਵਜੂਦ, ਸਵੇਰ ਤੋਂ ਹੀ ਸ਼ਰਧਾਲੂਆਂ ਦੀ ਭੀੜ ਮੇਲਾ ਖੇਤਰ ਵੱਲ ਵਧਦੀ ਦੇਖੀ ਗਈ। ਮਹਾਂਕੁੰਭ ਇਸ਼ਨਾਨ 13 ਜਨਵਰੀ ਨੂੰ ਸ਼ੁਰੂ ਹੁੰਦਾ ਹੈ ਅਤੇ ਅਗਲਾ ਇਸ਼ਨਾਨ ਤਿਉਹਾਰ 14 ਜਨਵਰੀ ਨੂੰ ਮਕਰ ਸੰਕ੍ਰਾਂਤੀ ਵਾਲੇ ਦਿਨ ਹੈ।
11 ਜਨਵਰੀ 2025 ਅਪਡੇਟ:
ਡਿਜੀਟਲ ਸੁਰੱਖਿਆ ਦੀ ਸਮੀਖਿਆ ਆਈਆਈਟੀ ਕਾਨਪੁਰ ਨਿਭਾਏਗਾ
ਪ੍ਰਯਾਗਰਾਜ ‘ਚ ਸ਼ੁਰੂ ਹੋ ਰਹੇ ਮਹਾਂਕੁੰਭ ’ਚ ਸ਼ਾਮਲ ਹੋਣ ਵਾਲੇ ਰਾਸ਼ਟਰਪਤੀ ਦ੍ਰੋਪਦੀ ਮੁਰਮੂ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਹੋਰ ਬਹੁਤ ਸਾਰੇ ਪਤਵੰਤਿਆਂ ਦੀ ਸੁਰੱਖਿਆ ‘ਚ ਆਈਆਈਟੀ ਕਾਨਪੁਰ ਮਹੱਤਵਪੂਰਨ ਭੂਮਿਕਾ ਨਿਭਾਏਗਾ। ਸੂਬਾ ਸਰਕਾਰ ਨੇ ਡਿਜੀਟਲ ਸੁਰੱਖਿਆ ਦੀ ਸਮੀਖਿਆ ਕਰਨ ਦੀ ਜ਼ਿੰਮੇਵਾਰੀ ਆਈਆਈਟੀ ਨੂੰ ਸੌਂਪੀ ਹੈ।
ਆਈਆਈਟੀ ਆਰਟੀਫੀਸ਼ੀਅਲ ਇੰਟੈਲੀਜੈਂਸ, ਮਸ਼ੀਨ ਲਰਨਿੰਗ, ਇੰਟਰਨੈੱਟ ਆਫ਼ ਥਿੰਗਜ਼ ਅਤੇ ਸਾਈਬਰ ਸੁਰੱਖਿਆ ਸਮੇਤ ਅਤਿ-ਆਧੁਨਿਕ ਤਕਨਾਲੋਜੀ ਦੀ ਵਰਤੋਂ ਕਰਦੇ ਹੋਏ ਸੁਰੱਖਿਆ ਢਾਂਚੇ ਦੀ ਸਮੀਖਿਆ ਕਰੇਗਾ। ਭਾਰਤ ਅਤੇ ਵਿਦੇਸ਼ਾਂ ਤੋਂ ਕਰੋੜਾਂ ਸ਼ਰਧਾਲੂਆਂ ਤੋਂ ਇਲਾਵਾ, ਕਈ ਵੱਡੀਆਂ ਰਾਜਨੀਤਿਕ ਅਤੇ ਗੈਰ-ਰਾਜਨੀਤਿਕ ਸ਼ਖਸੀਅਤਾਂ ਵੀ ਇਸ ਤਿਉਹਾਰ ‘ਚ ਹਿੱਸਾ ਲੈਣ ਲਈ ਆਉਣਗੀਆਂ।
ਬਾਰ੍ਹਵਾਂ ਅਖਾੜੇ ਦਾ 11 ਜਨਵਰੀ ਨੂੰ ਮਹਾਂਕੁੰਭ ’ਚ ਪ੍ਰਵੇਸ਼
ਬਾਰ੍ਹਵਾਂ ਅਖਾੜਾ 11 ਜਨਵਰੀ ਨੂੰ ਪ੍ਰਯਾਗਰਾਜ ਮਹਾਂਕੁੰਭ ‘ਚ ਪ੍ਰਵੇਸ਼ ਕਰੇਗਾ। ਨਿਰਮਲ ਅਖਾੜਾ ਸ਼ਨੀਵਾਰ ਨੂੰ ਪੂਰੇ ਸ਼ਾਨੋ-ਸ਼ੌਕਤ ਨਾਲ ਮੇਲੇ ‘ਚ ਦਾਖਲ ਹੋਵੇਗਾ। ਨਿਰਮਲ ਅਖਾੜੇ ਦੀ ਵਿਸ਼ਾਲ ਯਾਤਰਾ ਕਿਡਗੰਜ ਸਥਿਤ ਆਸ਼ਰਮ ਤੋਂ ਸ਼ੁਰੂ ਹੋਵੇਗੀ। ਯਾਤਰੀ ‘ਚ ਨਿਰਮਲ ਅਖਾੜੇ ਦੇ ਸੰਤ, ਮਹੰਤ, ਮਹਾਂਮੰਡਲੇਸ਼ਵਰ ਅਤੇ ਆਚਾਰੀਆ ਹਿੱਸਾ ਲੈਣਗੇ। ਨਿਰਮਲ ਅਖਾੜੇ ਦੇ ਸੰਤ ਰੱਥਾਂ ਅਤੇ ਪਾਲਕੀਆਂ ‘ਤੇ ਸਵਾਰ ਹੋ ਕੇ ਮਹਾਂਕੁੰਭ ’ਚ ਪਹੁੰਚਣਗੇ।
ਮਹਾਂਕੁੰਭ ‘ਚ ਇਸ਼ਨਾਨ ਅਤੇ ਸ਼ਾਹੀ ਇਸ਼ਨਾਨ ਦੀਆਂ ਤਾਰੀਖਾਂ
13 ਜਨਵਰੀ (ਸੋਮਵਾਰ) – ਇਸ਼ਨਾਨ, ਪੌਸ਼ ਪੂਰਨਿਮਾ
14 ਜਨਵਰੀ (ਮੰਗਲਵਾਰ) – ਸ਼ਾਹੀ ਇਸ਼ਨਾਨ, ਮਕਰ ਸਕ੍ਰਾਂਤੀ
29 ਜਨਵਰੀ (ਬੁੱਧਵਾਰ) – ਸ਼ਾਹੀ ਇਸ਼ਨਾਨ, ਮੌਨੀ ਅਮਾਵਸਿਆ
3 ਫਰਵਰੀ (ਸੋਮਵਾਰ) – ਸ਼ਾਹੀ ਇਸ਼ਨਾਨ, ਬਸੰਤ ਪੰਚਮੀ
12 ਫਰਵਰੀ (ਬੁੱਧਵਾਰ) – ਇਸ਼ਨਾਨ, ਮਾਘੀ ਪੂਰਨਿਮਾ
26 ਫਰਵਰੀ (ਬੁੱਧਵਾਰ) – ਇਸ਼ਨਾਨ, ਮਹਾਂਸ਼ਿਵਰਾਤਰੀ
10 ਜਨਵਰੀ 2025 ਅਪਡੇਟ:
ਸਾਰੀਆਂ ਰੇਲਗੱਡੀਆਂ ਦੀ ਹੋਵੇਗੀ ਤਲਾਸ਼ੀ
ਦਿੱਲੀ ਵਿਧਾਨ ਸਭਾ ਚੋਣਾਂ 2025 ਅਤੇ ਗਣਤੰਤਰ ਦਿਵਸ ਤੋਂ ਇਲਾਵਾ, ਪ੍ਰਯਾਗਰਾਜ ‘ਚ ਹੋਣ ਵਾਲੇ ਮਹਾਂਕੁੰਭ ਨੂੰ ਲੈ ਕੇ ਦੇਸ਼ ਭਰ ਦੀਆਂ ਸੁਰੱਖਿਆ ਏਜੰਸੀਆਂ ਅਲਰਟ ‘ਤੇ ਹਨ। ਇਸ ਸਬੰਧ ‘ਚ ਕੇਂਦਰੀ ਸੁਰੱਖਿਆ ਏਜੰਸੀਆਂ ਅਤੇ 11 ਸੂਬਿਆਂ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਦੇ ਪੁਲਿਸ ਅਧਿਕਾਰੀਆਂ ਵਿਚਕਾਰ ਹੋਈ ਬੈਠਕ ‘ਚ ਫੈਸਲਾ ਲਿਆ ਗਿਆ ਕਿ 13 ਜਨਵਰੀ ਤੋਂ 26 ਫਰਵਰੀ ਤੱਕ ਹੋਣ ਵਾਲੇ ਮਹਾਂਕੁੰਭ ਲਈ ਆਉਣ ਵਾਲੀਆਂ ਸਾਰੀਆਂ ਰੇਲਗੱਡੀਆਂ ਦੀ ਪੂਰੀ ਤਰ੍ਹਾਂ ਤਲਾਸ਼ੀ ਲਈ ਜਾਵੇਗੀ। ਇਸ ਦੇ ਮੱਦੇਨਜ਼ਰ, ਰਾਜਧਾਨੀ ਦਿੱਲੀ, ਲਖਨਊ ਅਤੇ ਪ੍ਰਯਾਗਰਾਜ ਸਮੇਤ ਯੂਪੀ ਦੇ ਜ਼ਿਆਦਾਤਰ ਰੇਲਵੇ ਸਟੇਸ਼ਨਾਂ ‘ਤੇ ਸੁਰੱਖਿਆ ਵਧਾ ਦਿੱਤੀ ਹੈ।
ਵਿਸ਼ੇਸ਼ ਰੇਡੀਓ ਚੈਨਲ ਕੁੰਭਬਾਣੀ ਦਾ ਉਦਘਾਟਨ
ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਆਕਾਸ਼ਵਾਣੀ ਦੇ ਵਿਸ਼ੇਸ਼ ਰੇਡੀਓ ਚੈਨਲ, ਕੁੰਭਬਾਣੀ ਦਾ ਉਦਘਾਟਨ ਕੀਤਾ ਹੈ। ਪ੍ਰਯਾਗਰਾਜ ਮਹਾਂਕੁੰਭ ’ਚ ਨਯਾ ਉਦਾਸੀਨ ਅਖਾੜੇ ਦੇ ਸੰਤ ਮਹਾਂਕੁੰਭ ਕੈਂਪ ਵਿੱਚ ਬਹੁਤ ਸ਼ਾਨੋ-ਸ਼ੌਕਤ ਨਾਲ ਪ੍ਰਵੇਸ਼ ਕਰਨਗੇ।
ਸ਼ੰਕਰਾਚਾਰੀਆ ਸਵਾਮੀ ਸਦਾਨੰਦ ਸਰਸਵਤੀ ਨੇ ਮਹਾਂਕੁੰਭ ’ਚ ਗੈਰ-ਹਿੰਦੂਆਂ ਦੇ ਦਾਖਲੇ ਦੇ ਮੁੱਦੇ ‘ਤੇ ਵੱਡਾ ਬਿਆਨ ਦਿੱਤਾ ਅਤੇ ਕਿਹਾ ਕਿ ਜਿਨ੍ਹਾਂ ਨੂੰ ਵੰਦੇ ਮਾਤਰਮ ਕਹਿਣ ‘ਚ ਮੁਸ਼ਕਿਲ ਆਉਂਦੀ ਹੈ, ਉਨ੍ਹਾਂ ਨੂੰ ਮਹਾਂਕੁੰਭ ‘ਚ ਦਾਖਲੇ ਦੀ ਇਜਾਜ਼ਤ ਕਿਉਂ ਦਿੱਤੀ ਜਾਵੇ।
ਰਾਮਬਾਗ ਅਤੇ ਝੁੰਸੀ ਸਟੇਸ਼ਨਾਂ ‘ਤੇ 46 ਰੇਲ ਗੱਡੀਆਂ ਦਾ ਅਸਥਾਈ ਠਹਿਰਾਅ
ਮਹਾਂਕੁੰਭ ਮੇਲੇ ਦੌਰਾਨ ਸ਼ਰਧਾਲੂਆਂ ਦੀ ਸਹੂਲਤ ਲਈ, ਰੇਲਵੇ ਨੇ ਰਾਮਬਾਗ ਅਤੇ ਝੁੰਸੀ ਸਟੇਸ਼ਨਾਂ ‘ਤੇ 46 ਟ੍ਰੇਨਾਂ ਨੂੰ ਪੰਜ ਮਿੰਟ ਲਈ ਅਸਥਾਈ ਤੌਰ ‘ਤੇ ਰੋਕਣ ਦਾ ਫੈਸਲਾ ਕੀਤਾ ਹੈ। ਇਨ੍ਹਾਂ ਵਿੱਚੋਂ 32 ਰੇਲਗੱਡੀਆਂ ਝੁੰਸੀ ਅਤੇ 14 ਰੇਲਗੱਡੀਆਂ ਰਾਮਬਾਗ ਸਟੇਸ਼ਨ ‘ਤੇ ਰੁਕਣਗੀਆਂ।
ਮਹਾਂਕੁੰਭ ਮੇਲੇ ‘ਚ ਪਖਾਨਿਆਂ ਅਤੇ ਪਾਰਕਿੰਗ ਦੇ ਪ੍ਰਬੰਧ
ਮਹਾਂਕੁੰਭ ਮੇਲੇ 2025 ਲਈ 1.5 ਲੱਖ ਪਖਾਨੇ, 30 ਪੋਂਟੂਨ ਪੁਲ ਅਤੇ 13 ਅਖਾੜੇ ਸਥਾਪਤ ਕੀਤੇ ਗਏ ਹਨ। 5,000 ਏਕੜ ਪਾਰਕਿੰਗ, 550 ਸ਼ਟਲ ਬੱਸਾਂ, 300 ਇਲੈਕਟ੍ਰਿਕ ਬੱਸਾਂ, 3,000 ਵਿਸ਼ੇਸ਼ ਰੇਲਗੱਡੀਆਂ ਅਤੇ 14 ਨਵੀਆਂ ਉਡਾਣਾਂ ਪ੍ਰਦਾਨ ਕੀਤੀਆਂ ਜਾ ਰਹੀਆਂ ਹਨ।
ਮਹਾਂਕੁੰਭ ’ਚ ਕਾਲ ਸੈਂਟਰ ਦੀ ਵਿਵਸਥਾ
ਮਹਾਂਕੁੰਭ ਲਈ ਇੱਕ ਕਾਲ ਸੈਂਟਰ ਸਿਸਟਮ ਦਾ ਪ੍ਰਬੰਧ ਕੀਤਾ ਹੈ | ਇਸ ਸੰਬੰਧੀ ਜਾਣਕਾਰੀ ਸੋਸ਼ਲ ਮੀਡੀਆ ਰਾਹੀਂ ਵੀ ਸਾਂਝੀ ਕੀਤੀ ਜਾਵੇਗੀ ਅਤੇ ਜਾਣਕਾਰੀ ਨੂੰ ਵਿਸ਼ਾਲ ਸਕ੍ਰੀਨਾਂ ‘ਤੇ ਫਲੈਸ਼ ਕੀਤਾ ਜਾਵੇਗਾ | ਸ਼ਰਧਾਲੂ ਕਿਸੇ ਵੀ ਸਮੱਸਿਆ ਦਾ ਤੁਰੰਤ ਹੱਲ ਪ੍ਰਾਪਤ ਕਰ ਸਕਣਗੇ, ਜਿਸ ਨਾਲ ਮਹਾਂਕੁੰਭ ’ਚ ਉਨ੍ਹਾਂ ਦੀ ਯਾਤਰਾ ਸੁਚਾਰੂ ਹੋ ਸਕੇਗੀ।
