ਹਰਿਆਣਾ, 14 ਜੁਲਾਈ 2025: ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਅੱਜ ਮੁਜ਼ੱਫਰਨਗਰ ਵਿਖੇ ਸ਼ੁਕਦੇਵ ਆਸ਼ਰਮ ਵਿਖੇ ਸਵਾਮੀ ਕਲਿਆਣਦੇਵ ਮਹਾਰਾਜ ਜੀ ਦੀ 21ਵੀਂ ਬਰਸੀ ‘ਤੇ ਉਨ੍ਹਾਂ ਦੀ ਸਮਾਧੀ ‘ਤੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਇਸ ਮੌਕੇ ਮੁੱਖ ਮੰਤਰੀ ਨੇ ਸਵਾਮੀ ਕਲਿਆਣ ਦੇਵ ਜੀ ਮਹਾਰਾਜ ਦੀ ਮੂਰਤੀ ਦਾ ਵੀ ਉਦਘਾਟਨ ਕੀਤਾ।
ਸ਼ਰਧਾਲੂਆਂ ਨੂੰ ਸੰਬੋਧਨ ਕਰਦਿਆਂ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਅੱਜ ਅਸੀਂ ਮਾਂ ਗੰਗਾ ਦੇ ਪਵਿੱਤਰ ਕੰਢੇ ਸਥਿਤ ਮਹਾਨ ਮਹਾਰਿਸ਼ੀ ਸ਼ੁਕਦੇਵ ਦੀ ਧਰਤੀ ‘ਤੇ ਇਕੱਠੇ ਹੋਏ ਹਾਂ। ਭਾਗਵਤ ਪੀਠ ਸ਼੍ਰੀ ਸ਼ੁਕਦੇਵ ਆਸ਼ਰਮ ਇੱਕ ਵਿਸ਼ੇਸ਼ ਸਥਾਨ ਹੈ। ਇਹ ਆਸ਼ਰਮ ਨਾ ਸਿਰਫ਼ ਇੱਕ ਅਧਿਆਤਮਿਕ ਕੇਂਦਰ ਹੈ ਬਲਕਿ ਸਿੱਖਿਆ, ਸੇਵਾ ਅਤੇ ਸੱਭਿਆਚਾਰ ਦਾ ਪ੍ਰਤੀਕ ਵੀ ਹੈ। ਸਵਾਮੀ ਜੀ ਦੀ ਮੂਰਤੀ ਨਵੀਂ ਪੀੜ੍ਹੀ ਨੂੰ ਸਵਾਮੀ ਜੀ ਦੇ ਕੰਮਾਂ, ਸਿਧਾਂਤਾਂ ਅਤੇ ਆਦਰਸ਼ਾਂ ਦੀ ਹਮੇਸ਼ਾ ਯਾਦ ਦਿਵਾਏਗੀ।
ਉਨ੍ਹਾਂ ਕਿਹਾ ਕਿ ਸਵਾਮੀ ਓਮਾਨੰਦ ਜੀ ਮਹਾਰਾਜ ਇਸ ਆਸ਼ਰਮ ਦੀ ਪਰੰਪਰਾ ਨੂੰ ਅੱਗੇ ਵਧਾ ਰਹੇ ਹਨ ਅਤੇ ਸ਼ੁਕਦੇਵ ਜੀ ਦੁਆਰਾ ਦਰਸਾਏ ਮਾਰਗ ‘ਤੇ ਚੱਲਦੇ ਹੋਏ, ਸੇਵਾ ਦੀ ਭਾਵਨਾ ਨਾਲ ਸਮਾਜ ਸੇਵਾ ਦੇ ਕੰਮ ਕਰ ਰਹੇ ਹਨ। ਸਵਾਮੀ ਜੀ ਦੀ ਅਗਵਾਈ ਹੇਠ, ਇਸ ਆਸ਼ਰਮ ਨੇ ਸਿੱਖਿਆ, ਸਿਹਤ ਅਤੇ ਪੇਂਡੂ ਵਿਕਾਸ ਦੇ ਖੇਤਰ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ। ਉਨ੍ਹਾਂ ਕਿਹਾ ਕਿ ਹਜ਼ਾਰਾਂ ਸਾਲ ਪਹਿਲਾਂ ਇਸ ਧਰਤੀ ‘ਤੇ, ਮਹਾਰਿਸ਼ੀ ਸ਼ੁਕਦੇਵ ਜੀ ਮਹਾਰਾਜ ਨੇ ਭਾਗਵਤ ਕਥਾ ਸੁਣਾ ਕੇ ਪਰੀਕਸ਼ਿਤ ਨੂੰ ਮੁਕਤੀ ਦਾ ਰਸਤਾ ਦਿਖਾਇਆ। ਸੰਤ ਕਲਿਆਣਦੇਵ ਮਹਾਰਾਜ ਨੇ ਆਪਣਾ ਪੂਰਾ ਜੀਵਨ ਇਸ ਮਹਾਨ ਤੀਰਥ ਦੀ ਮੁਕਤੀ ਲਈ ਸਮਰਪਿਤ ਕਰ ਦਿੱਤਾ।
ਮੁੱਖ ਮੰਤਰੀ ਨੇ ਕਿਹਾ ਕਿ ਸਵਾਮੀ ਕਲਿਆਣ ਦੇਵ ਜੀ ਨੇ ਆਪਣੇ 129 ਸਾਲਾਂ ਦੇ ਲੰਬੇ ਜੀਵਨ ‘ਚ ਗਿਆਨ, ਸਿੱਖਿਆ ਅਤੇ ਸਮਾਜ ਸੇਵਾ ਨੂੰ ਆਪਣਾ ਧਰਮ ਬਣਾਇਆ। ਇਸ ਮਹਾਨ ਸੰਤ ਨੇ ਸਾਲ 2004 ‘ਚ ਆਪਣਾ ਨਸ਼ਵਰ ਸਰੀਰ ਤਿਆਗਿਆ। ਉਨ੍ਹਾਂ ਨੇ ਕਈ ਸਕੂਲ, ਕਾਲਜ ਅਤੇ ਗੁਰੂਕੁਲ ਸਥਾਪਿਤ ਕੀਤੇ। ਸਿੱਖਿਆ ਦੇ ਨਾਲ-ਨਾਲ ਉਨ੍ਹਾਂ ਨੇ ਛੂਤ-ਛਾਤ, ਜਾਤੀ ਭੇਦਭਾਵ ਅਤੇ ਹੋਰ ਸਮਾਜਿਕ ਬੁਰਾਈਆਂ ਵਿਰੁੱਧ ਆਵਾਜ਼ ਬੁਲੰਦ ਕੀਤੀ, ਅਤੇ ਭਾਈਚਾਰੇ ਅਤੇ ਪਿਆਰ ਦਾ ਸੰਦੇਸ਼ ਵੀ ਦਿੱਤਾ। ਸਵਾਮੀ ਕਲਿਆਣਦੇਵ ਜੀ ਮਹਾਰਾਜ ਨੂੰ ਸਮਾਜ ਪ੍ਰਤੀ ਉਨ੍ਹਾਂ ਦੀਆਂ ਬੇਮਿਸਾਲ ਅਤੇ ਵਿਸ਼ੇਸ਼ ਸੇਵਾਵਾਂ ਲਈ ਭਾਰਤ ਸਰਕਾਰ ਦੁਆਰਾ ਸਾਲ 1982 ‘ਚ ਪਦਮਸ਼੍ਰੀ ਅਤੇ ਸਾਲ 2000 ‘ਚ ਪਦਮ ਭੂਸ਼ਣ ਨਾਲ ਸਨਮਾਨਿਤ ਕੀਤਾ ਗਿਆ ਸੀ।
ਮੁੱਖ ਮੰਤਰੀ ਨੇ ਕਿਹਾ ਕਿ ਆਸ਼ਰਮ ‘ਚ ਸਵਾਮੀ ਕਲਿਆਣ ਦੇਵ ਸੇਵਾ ਟਰੱਸਟ ਦੀ ਸਥਾਪਨਾ ਕੀਤੀ ਹੈ। ਇਹ ਟਰੱਸਟ ਵੱਖ-ਵੱਖ ਭਲਾਈ ਯੋਜਨਾਵਾਂ ਰਾਹੀਂ ਗਰੀਬਾਂ, ਬਿਮਾਰਾਂ ਅਤੇ ਲੋੜਵੰਦਾਂ ਦੀ ਮੱਦਦ ਕਰਦਾ ਹੈ। ਇਹ ਸਿੱਖਿਆ, ਦਵਾਈ ਅਤੇ ਸਮਾਜਿਕ ਉੱਨਤੀ ਦੇ ਖੇਤਰਾਂ ‘ਚ ਸਰਗਰਮੀ ਨਾਲ ਕੰਮ ਕਰ ਰਿਹਾ ਹੈ। ਉਨ੍ਹਾਂ ਨੇ ਸਾਨੂੰ ਸਾਰਿਆਂ ਨੂੰ ਸਵਾਮੀ ਜੀ ਦੇ ਸੁਪਨਿਆਂ ਦੇ ਭਾਰਤ ਦੇ ਨਿਰਮਾਣ ਲਈ ਪ੍ਰਣ ਲੈਣ ਦਾ ਸੱਦਾ ਦਿੱਤਾ।
ਮੁੱਖ ਮੰਤਰੀ ਨੇ ਸ਼ੁਕਦੇਵ ਤੀਰਥ ਵਿਖੇ ਉੜੀਆ ਦੀ ਕਿਤਾਬ ਰਿਲੀਜ਼ ਕੀਤੀ। ਇਸ ਤੋਂ ਇਲਾਵਾ, ਮੁੱਖ ਮੰਤਰੀ ਨੇ ਸ਼ੁਕਦੇਵ ਤੀਰਥ ਵਿਖੇ ਹਰਿਆਣਾ ਭਵਨ ਦੇ ਨਿਰਮਾਣ ਲਈ 11 ਲੱਖ ਰੁਪਏ ਦਾਨ ਦੇਣ ਦਾ ਐਲਾਨ ਕੀਤਾ।
Read More: CM ਨਾਇਬ ਸਿੰਘ ਸੈਣੀ ਵੱਲੋਂ ਪ੍ਰਧਾਨ ਮੰਤਰੀ ਸੂਰਿਆ ਘਰ ਮੁਫ਼ਤ ਬਿਜਲੀ ਯੋਜਨਾ ਦਾ ਲਾਭ ਲੈਣ ਦੀ ਅਪੀਲ
