ਜੀਂਦ, 25 ਅਪ੍ਰੈਲ 2025: ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਅੱਜ ਨਸ਼ਾ ਮੁਕਤ ਹਰਿਆਣਾ ਦੇ ਸੰਕਲਪ ਤਹਿਤ ਜੀਂਦ ਤੋਂ ਰਾਜ ਪੱਧਰੀ ਸਾਈਕਲੋਥੌਨ 2.0 (Cyclothon 2.0) ਨੂੰ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ। ਇਸ ਮੌਕੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਨਸ਼ਿਆਂ ਵਿਰੁੱਧ ਇਸ ਲੜਾਈ ਨੂੰ ਖਾਪ ਪੰਚਾਇਤਾਂ, ਨੌਜਵਾਨਾਂ, ਔਰਤਾਂ, ਅਧਿਆਪਕਾਂ ਅਤੇ ਸਮਾਜ ਦੇ ਸਾਰੇ ਵਰਗਾਂ ਦੇ ਸਾਂਝੇ ਯਤਨਾਂ ਨਾਲ ਸਫਲ ਬਣਾਉਣਾ ਹੋਵੇਗਾ।
ਉਨ੍ਹਾਂ ਕਿਹਾ ਕਿ ਸਾਡਾ ਉਦੇਸ਼ ਨਸ਼ਾ ਮੁਕਤ, ਸਿਹਤਮੰਦ ਅਤੇ ਸਸ਼ਕਤ ਹਰਿਆਣਾ ਬਣਾਉਣਾ ਹੈ। ਇਹ ਸਾਈਕਲ ਯਾਤਰਾ ਨਸ਼ਿਆਂ ਵਿਰੁੱਧ ਲੜਨ, ਜਾਗਰੂਕਤਾ ਪੈਦਾ ਕਰਨ ਅਤੇ ਏਕਤਾ ਨਾਲ ਸਮਾਜ ‘ਚੋਂ ਇਸਨੂੰ ਖਤਮ ਕਰਨ ਦੇ ਸੰਕਲਪ ਦਾ ਪ੍ਰਤੀਕ ਹੈ।
ਉਨ੍ਹਾਂ ਕਿਹਾ ਕਿ ਖਾਪ ਪੰਚਾਇਤਾਂ ਪ੍ਰਾਚੀਨ ਸਮੇਂ ਤੋਂ ਹੀ ਸਾਡੇ ਸਮਾਜਿਕ ਤਾਣੇ-ਬਾਣੇ ਦਾ ਇੱਕ ਅਨਿੱਖੜਵਾਂ ਅੰਗ ਰਹੀਆਂ ਹਨ। ਹਰਿਆਣਾ ‘ਚ, ਰਾਜ ਦੀ ਗਣਧਰਮੀ ਪਰੰਪਰਾ ਖਾਪ ਅਤੇ ਸਰਵਖਾਪ ਪੰਚਾਇਤਾਂ ਦੇ ਰੂਪ ‘ਚ ਮੌਜੂਦ ਰਹੀ ਹੈ। ਇਤਿਹਾਸ ਗਵਾਹ ਹੈ ਕਿ ਹਰਿਆਣਾ ਦੀ ਇਸ ਪੰਚਾਇਤੀ ਪਰੰਪਰਾ ਨੇ ਕਈ ਵਾਰ ਵਿਦੇਸ਼ੀ ਤਾਕਤਾਂ ਵਿਰੁੱਧ ਲੜਾਈ ਲੜੀ। ਖਾਪਾਂ ਵੱਲੋਂ ਕਈ ਵੱਡੇ ਫੈਸਲੇ ਲਏ ਗਏ ਹਨ।
ਅੱਜ ਜਦੋਂ ਅਸੀਂ ਨਸ਼ੇ ਵਰਗੀ ਸਮਾਜਿਕ ਬੁਰਾਈ ਵਿਰੁੱਧ ਲੜ ਰਹੇ ਹਾਂ, ਤਾਂ ਇਸ ਸਾਈਕਲੋਥੌਨ ‘ਚ ਹਿੱਸਾ ਲੈ ਕੇ ਖਾਪਾਂ ਨੇ ਸਾਬਤ ਕਰ ਦਿੱਤਾ ਹੈ ਕਿ ਖਾਪ ਪੰਚਾਇਤਾਂ ਨਾ ਸਿਰਫ਼ ਪਰੰਪਰਾ ਦੀਆਂ ਰੱਖਿਅਕ ਹਨ, ਸਗੋਂ ਸਮਾਜਿਕ ਤਬਦੀਲੀ ਦੀਆਂ ਵੀ ਪੁਜਾਰੀ ਹਨ। ਖਾਪਾਂ ਨੇ ਪਹਿਲਾਂ ਵੀ ਸਮਾਜ ਨੂੰ ਇਹ ਸੰਦੇਸ਼ ਦਿੱਤਾ ਹੈ ਕਿ ਜੋ ਕੋਈ ਵੀ ਨਸ਼ੇ ਦੀ ਦੁਰਵਰਤੋਂ ਨੂੰ ਉਤਸ਼ਾਹਿਤ ਕਰੇਗਾ, ਉਸਦਾ ਸਮਾਜਿਕ ਬਾਈਕਾਟ ਕੀਤਾ ਜਾਵੇਗਾ ਅਤੇ ਜੋ ਕੋਈ ਵੀ ਨਸ਼ੇ ਦੀ ਦੁਰਵਰਤੋਂ ਛੱਡ ਦੇਵੇਗਾ, ਉਸਦਾ ਸਵਾਗਤ ਕੀਤਾ ਜਾਵੇਗਾ। ਇਸ ਸਾਈਕਲੋਥੋਨ (Cyclothon 2.0) ਨੂੰ ਖਾਪਾਂ ਦਾ ਸਮਰਥਨ ਪ੍ਰਾਪਤ ਹੈ ਅਤੇ ਉਨ੍ਹਾਂ ਦੇ ਸਮਰਥਨ ਨਾਲ, ਹਰਿਆਣਾ ਯਕੀਨੀ ਤੌਰ ‘ਤੇ ਨਸ਼ਾ ਮੁਕਤ ਹੋ ਜਾਵੇਗਾ।
ਉਨ੍ਹਾਂ ਕਿਹਾ ਕਿ 5 ਅਪ੍ਰੈਲ ਨੂੰ ਹਿਸਾਰ ਤੋਂ ਸ਼ੁਰੂ ਹੋਈ ਸਾਈਕਲ ਰੈਲੀ ਵੱਖ-ਵੱਖ ਜ਼ਿਲ੍ਹਿਆਂ ‘ਚੋਂ ਹੁੰਦੀ ਹੋਈ ਜੀਂਦ ਪਹੁੰਚੀ ਹੈ। ਅੱਜ ਇਹ ਬਰਵਾਲਾ ਲਈ ਰਵਾਨਾ ਹੋਵੇਗੀ। ਇਹ 27 ਅਪ੍ਰੈਲ ਨੂੰ ਬਰਵਾਲਾ ਫਤਿਹਾਬਾਦ ਹੁੰਦੇ ਹੋਏ ਸਿਰਸਾ ‘ਚ ਸਮਾਪਤ ਹੋਵੇਗੀ।
ਉਨ੍ਹਾਂ ਕਿਹਾ ਕਿ ਇਹ ਸਾਈਕਲੋਥੌਨ ਸਿਰਫ਼ ਇੱਕ ਸਾਈਕਲ ਯਾਤਰਾ ਨਹੀਂ ਹੈ, ਸਗੋਂ ਨਸ਼ਿਆਂ ਵਿਰੁੱਧ ਇੱਕ ਲਹਿਰ ਹੈ, ਜਨਤਕ ਜਾਗਰੂਕਤਾ ਦਾ ਸੰਕਲਪ ਹੈ। ਅੱਜ ਸਾਡੇ ਨੌਜਵਾਨ, ਸਾਡੀਆਂ ਖਾਪ ਪੰਚਾਇਤਾਂ, ਬਜ਼ੁਰਗ ਅਤੇ ਮਾਵਾਂ ਸਾਰੇ ਇੱਕਜੁੱਟ ਹੋ ਕੇ ‘ਨਸ਼ਾ ਛੱਡੋ, ਜ਼ਿੰਦਗੀ ਬਚਾਓ’ ਦਾ ਸੰਦੇਸ਼ ਦੇ ਰਹੇ ਹਨ, ਇਸ ਲਈ ਸਮਾਜ ‘ਚ ਜ਼ਰੂਰ ਬਦਲਾਅ ਆਵੇਗਾ।
ਮੁੱਖ ਮੰਤਰੀ ਨੇ ਕਿਹਾ ਕਿ ਇਸ ਤੋਂ ਪਹਿਲਾਂ ਸਾਲ 2023 ‘ਚ ਪੂਰੇ ਸੂਬੇ ਵਿੱਚ ਅਜਿਹੀ ਹੀ ਰੈਲੀ ਕੱਢੀ ਗਈ ਸੀ। ਇਹ ਸਾਈਕਲੋਥੋਨ 25 ਦਿਨ ਚੱਲੀ । ਇਸ ‘ਚ 1 ਲੱਖ 77 ਹਜ਼ਾਰ 200 ਸਾਈਕਲ ਸਵਾਰ ਸ਼ਾਮਲ ਹੋਏ ਅਤੇ 5 ਲੱਖ 25 ਹਜ਼ਾਰ 800 ਹੋਰ ਲੋਕਾਂ ਨੇ ਵੀ ਹਿੱਸਾ ਲਿਆ। ਇਸਦੀ ਸਫਲਤਾ ਨੂੰ ਦੇਖਦੇ ਹੋਏ, ਇਹ ਸਾਈਕਲੋਥੌਨ 2.0 ਆਯੋਜਿਤ ਕੀਤਾ ਗਿਆ ਹੈ।
Read More: CM ਨਾਇਬ ਸਿੰਘ ਸੈਣੀ ਨੇ ਖਾਪ ਪ੍ਰਤੀਨਿਧੀਆਂ ਨਾਲ ਸਮਾਜਿਕ ਸਮੱਸਿਆਵਾਂ ‘ਤੇ ਕੀਤੀ ਚਰਚਾ
