ਦੇਸ਼ , 29 ਨਵੰਬਰ 2025: ਬੱਚਿਆਂ ਦੀਆਂ ਕਈ ਮੌਤਾਂ ਅਤੇ ਖੰਘ ਦੋ ਦਵਾਈ ਦੇ ਮਾੜੇ ਪ੍ਰਭਾਵਾਂ ਨੂੰ ਦੇਖਦੇ ਹੋਏ ਕੇਂਦਰ ਸਰਕਾਰ ਨੇ ਇਸਦੀ ਮਨਮਾਨੀ ਵਿਕਰੀ ਨੂੰ ਰੋਕਣ ਲਈ ਸਖ਼ਤ ਕਦਮ ਚੁੱਕੇ ਹਨ। ਜ਼ਿਆਦਾਤਰ ਖੰਘ ਦੇ ਸਿਰਪ ਹੁਣ ਡਾਕਟਰ ਦੀ ਪਰਚੀ ਤੋਂ ਬਿਨਾਂ ਮੈਡੀਕਲ ਸਟੋਰਾਂ ‘ਚ ਨਹੀਂ ਵੇਚੇ ਜਾਣਗੇ। ਉਨ੍ਹਾਂ ਨੂੰ ਹਰੇਕ ਪਰਚੀ ਦਾ ਰਿਕਾਰਡ ਰੱਖਣ ਦੀ ਲੋੜ ਹੋਵੇਗੀ। ਇਸ ਤੋਂ ਇਲਾਵਾ, ਖੰਘ ਦੀ ਦਵਾਈ ਨੂੰ ਸਖ਼ਤ ਗੁਣਵੱਤਾ ਨਿਯੰਤਰਣ ਨਿਯਮਾਂ ਦੀ ਪਾਲਣਾ ਕਰਨੀ ਪਵੇਗੀ।
ਕੇਂਦਰ ਸਰਕਾਰ ਦੀ ਰੈਗੂਲੇਟਰੀ ਸੰਸਥਾ, ਡਰੱਗਜ਼ ਐਡਵਾਈਜ਼ਰੀ ਕਮੇਟੀ, ਨੇ ਖੰਘ ਸਿਰਪ ਨੂੰ ਉਸ ਸ਼ਡਿਊਲ ਤੋਂ ਹਟਾਉਣ ਦੀ ਪ੍ਰਵਾਨਗੀ ਦੇ ਦਿੱਤੀ ਹੈ ਜੋ ਪਹਿਲਾਂ ਉਹਨਾਂ ਨੂੰ ਲਾਇਸੈਂਸਿੰਗ ਅਤੇ ਵਿਸ਼ੇਸ਼ ਨਿਗਰਾਨੀ ਨਿਯਮਾਂ ਤੋਂ ਛੋਟ ਦਿੰਦੀ ਸੀ। ਇਸਦਾ ਮਤਲਬ ਹੈ ਕਿ ਉਹਨਾਂ ਦੀ ਖਰੀਦ ਲਈ ਡਾਕਟਰ ਦੀ ਸਲਾਹ ਲਾਜ਼ਮੀ ਹੋਵੇਗੀ |
ਇੱਕ ਕਮੇਟੀ ਮੈਂਬਰ ਨੇ ਕਿਹਾ ਕਿ ਇਹ ਪ੍ਰਸਤਾਵ ਇਸ ਲਈ ਪੇਸ਼ ਕੀਤਾ ਗਿਆ ਸੀ ਕਿਉਂਕਿ ਪਿਛਲੇ ਤਿੰਨ ਸਾਲਾਂ ‘ਚ ਭਾਰਤ ਤੋਂ ਨਿਰਯਾਤ ਕੀਤੇ ਗਏ ਕਈ ਖੰਘ ਦੀ ਦਵਾਈ ‘ਚ ਡਾਈਥਾਈਲੀਨ ਗਲਾਈਕੋਲ (DEG) ਅਤੇ ਈਥੀਲੀਨ ਗਲਾਈਕੋਲ (EG) ਵਰਗੇ ਹਾਨੀਕਾਰਕ ਰਸਾਇਣ ਪਾਏ ਗਏ ਸਨ। ਇਨ੍ਹਾਂ ਰਸਾਇਣਾਂ ਕਾਰਨ ਗੈਂਬੀਆ, ਉਜ਼ਬੇਕਿਸਤਾਨ ਅਤੇ ਕੈਮਰੂਨ ‘ਚ ਕਈ ਬੱਚਿਆਂ ਦੀ ਮੌਤ ਹੋਈ ਹੈ। ਹਾਲ ਹੀ ‘ਚ ਮੱਧ ਪ੍ਰਦੇਸ਼ ‘ਚ ਵੀ ਕਈ ਬੱਚਿਆਂ ਦੀ ਮੌਤ ਹੋ ਗਈ ਹੈ। ਕਮੇਟੀ ਦੇ ਅਨੁਸਾਰ, ਸਰਕਾਰ ਲੋਕਾਂ ਨੂੰ ਖੰਘ ਅਤੇ ਜ਼ੁਕਾਮ ਵਰਗੀਆਂ ਆਮ ਬਿਮਾਰੀਆਂ ਲਈ ਵੀ ਸਵੈ-ਦਵਾਈ ਲੈਣ ਦੀ ਬਜਾਏ ਡਾਕਟਰ ਦੀ ਸਲਾਹ ਲੈਣ ਲਈ ਉਤਸ਼ਾਹਿਤ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ।
ਕੇਂਦਰੀ ਸਿਹਤ ਮੰਤਰਾਲੇ ਦੇ ਇੱਕ ਉੱਚ ਅਧਿਕਾਰੀ ਨੇ ਕਿਹਾ ਕਿ ਬੱਚਿਆਂ ਦੀ ਸੁਰੱਖਿਆ ਇੱਕ ਪ੍ਰਮੁੱਖ ਤਰਜੀਹ ਹੈ। ਇਸ ਨਾਲ ਦੁਰਵਰਤੋਂ ਅਤੇ ਮਾੜੇ ਪ੍ਰਭਾਵਾਂ ਨੂੰ ਰੋਕਿਆ ਜਾ ਸਕੇਗਾ। ਹਾਲ ਹੀ ‘ਚ, ਇਹ ਗੱਲ ਸਾਹਮਣੇ ਆਈ ਹੈ ਕਿ ਕੁਝ ਲੋਕ ਨਸ਼ਾ ਕਰਨ ਲਈ ਖੰਘ ਦੇ ਸਿਰਪ ਦੀ ਵਰਤੋਂ ਕਰ ਰਹੇ ਹਨ। ਇਸ ਦੌਰਾਨ, ਬਹੁਤ ਸਾਰੇ ਮਾਪੇ ਡਾਕਟਰ ਦੀ ਸਲਾਹ ਲਏ ਬਿਨਾਂ ਆਪਣੇ ਬੱਚਿਆਂ ਨੂੰ ਖੰਘ ਦੀ ਦਵਾਈ ਦੇ ਰਹੇ ਹਨ।
Read More: Cough Syrup: ਖੰਘ ਦੀ ਦਵਾਈ ਪੀਣ ਤੋਂ ਬਾਅਦ 16 ਬੱਚਿਆਂ ਦੀ ਮੌ.ਤ, ਜਾਂਚ ਲਈ SIT ਦਾ ਗਠਨ
