ਚੰਡੀਗੜ੍ਹ, 12 ਅਗਸਤ 2024: ਨਵੀਂ ਹਿੰਡਨਬਰਗ ਰਿਪੋਰਟ (Hindenburg Report) ਨੂੰ ਲੈ ਕੇ ਭਾਰਤ ‘ਚ ਹੰਗਾਮਾ ਹੋ ਰਿਹਾ ਹੈ | ਭਾਜਪਾ ਨੇ ਹਾਲ ਹੀ ‘ਚ ਜਾਰੀ ਕੀਤੀ ਹਿੰਡਨਬਰਗ ਰਿਪੋਰਟ ਉੱਤੇ ਸਵਾਲ ਚੁੱਕੇ ਹਨ। ਇਸ ਦੌਰਾਨ ਭਾਜਪਾ ਸੰਸਦ ਰਵੀਸ਼ੰਕਰ ਪ੍ਰਸਾਦ ਨੇ ਕਿਹਾ ਕਿ ਇਹ ਕਾਂਗਰਸ, ਉਸ ਦੇ ਸਹਿਯੋਗੀਆਂ ਅਤੇ ਟੂਲਕਿੱਟ ਗੈਂਗ ਦੀ ਸਾਜ਼ਿਸ਼ ਹੈ ਤਾਂ ਜੋ ਭਾਰਤ ਦੇ ਲੋਕਾਂ ਦੁਆਰਾ ਨਕਾਰੇ ਜਾਣ ਤੋਂ ਬਾਅਦ ਦੇਸ਼ ‘ਚ ਆਰਥਿਕ ਅਰਾਜਕਤਾ ਅਤੇ ਅਸਥਿਰਤਾ ਲਿਆਉਣ ਦੀ ਕੋਸ਼ਿਸ਼ ਕੀਤੀ ਜਾ ਸਕੇ।

ਉਨ੍ਹਾਂ ਕਿਹਾ ਕਿ ਸ਼ਨੀਵਾਰ ਨੂੰ ਜਦੋਂ ਹਿੰਡਨਬਰਗ ਰਿਪੋਰਟ (Hindenburg Report) ਜਾਰੀ ਕੀਤੀ ਗਈ ਤਾਂ ਐਤਵਾਰ ਨੂੰ ਹੰਗਾਮਾ ਹੋ ਗਿਆ। ਇਸ ਤੋਂ ਬਾਅਦ ਸੋਮਵਾਰ ਨੂੰ ਪੂੰਜੀ ਬਾਜ਼ਾਰ ਅਸਥਿਰ ਹੋ ਗਿਆ। ਜਦੋਂ ਸਟਾਕਾਂ ਦੀ ਗੱਲ ਆਉਂਦੀ ਹੈ ਤਾਂ ਭਾਰਤ ਇੱਕ ਸੁਰੱਖਿਅਤ, ਸਥਿਰ ਅਤੇ ਆਸ਼ਾਵਾਦੀ ਬਾਜ਼ਾਰ ਹੈ। ਇਸ ਮਾਰਕੀਟ ਦੀ ਨਿਗਰਾਨੀ ਕਰਨਾ ਸੇਬੀ ਦੀ ਕਾਨੂੰਨੀ ਜ਼ਿੰਮੇਵਾਰੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਜਦੋਂ ਸੇਬੀ ਨੇ ਜੁਲਾਈ ‘ਚ ਸੁਪਰੀਮ ਕੋਰਟ ਦੀ ਨਿਗਰਾਨੀ ਹੇਠ ਜਾਂਚ ਤੋਂ ਬਾਅਦ ਹਿੰਡਨਬਰਗ ਨੂੰ ਨੋਟਿਸ ਜਾਰੀ ਕੀਤਾ, ਤਾਂ ਇਸ ਨੇ ਕੋਈ ਜਵਾਬ ਨਹੀਂ ਦਿੱਤਾ, ਸਗੋਂ ਬੇਬੁਨਿਆਦ ਹਮਲਾ ਕੀਤਾ ਹੈ।

ਉਨ੍ਹਾਂ ਸਵਾਲ ਕੀਤਾ ਕਿ ਹਿੰਡਨਬਰਗ ‘ਚ ਕਿਸਦਾ ਨਿਵੇਸ਼ ਹੈ? ਉਨ੍ਹਾਂ ਕਿਹਾ ਕਿ ਜਾਰਜ ਸੋਰੋਸ ਭਾਰਤ ਦੇ ਖਿਲਾਫ਼ ਨਿਯਮਿਤ ਤੌਰ ‘ਤੇ ਪ੍ਰਚਾਰ ਕਰਦੇ ਹਨ। ਉਹ ਇਸਦੇ ਮੁੱਖ ਨਿਵੇਸ਼ਕ ਹਨ। ਨਰਿੰਦਰ ਮੋਦੀ ਖ਼ਿਲਾਫ ਨਫਰਤ ਫੈਲਾ ਕੇ ਕਾਂਗਰਸ ਨੇ ਭਾਰਤ ਖ਼ਿਲਾਫ ਨਫਰਤ ਪੈਦਾ ਕੀਤੀ ਹੈ। ਜੇਕਰ ਭਾਰਤ ਦਾ ਸ਼ੇਅਰ ਬਾਜ਼ਾਰ ਪਰੇਸ਼ਾਨ ਹੁੰਦਾ ਹੈ ਤਾਂ ਛੋਟੇ ਨਿਵੇਸ਼ਕ ਪ੍ਰੇਸ਼ਾਨ ਹੋਣਗੇ। ਪਰ ਕਾਂਗਰਸ ਦਾ ਇਸ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ।