ਸਪੋਰਟਸ, 04 ਦਸੰਬਰ 2025: AUS ਬਨਾਮ ENG Ashes Series: ਇੰਗਲੈਂਡ ਦੇ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਖਿਡਾਰੀ ਜੋ ਰੂਟ ਨੇ ਆਖਰਕਾਰ ਆਸਟ੍ਰੇਲੀਆ ‘ਚ ਟੈਸਟ ਸੈਂਕੜਾ ਲਗਾਇਆ। ਵੀਰਵਾਰ ਨੂੰ ਬ੍ਰਿਸਬੇਨ ਦੇ ਗਾਬਾ ਸਟੇਡੀਅਮ ‘ਚ ਉਨ੍ਹਾਂ ਨੇ 181 ਗੇਂਦਾਂ ‘ਚ ਆਪਣਾ ਸੈਂਕੜਾ ਪੂਰਾ ਕੀਤਾ। ਇਹ ਰੂਟ ਦਾ 40ਵਾਂ ਟੈਸਟ ਸੈਂਕੜਾ ਸੀ, ਪਰ ਆਸਟ੍ਰੇਲੀਆ ਦੀ ਧਰਤੀ ‘ਤੇ ਉਨ੍ਹਾਂ ਦਾ ਪਹਿਲਾ ਸੈਂਕੜਾ ਹੈ।
ਜਿਕਰਯੋਗ ਹੈ ਕਿ ਰੂਟ ਨੇ 59 ਅੰਤਰਰਾਸ਼ਟਰੀ ਸੈਂਕੜੇ ਲਗਾਏ ਹਨ। ਦੂਜੇ ਐਸ਼ੇਜ਼ ਟੈਸਟ ਦੇ ਪਹਿਲੇ ਦਿਨ ਇੰਗਲੈਂਡ ਨੇ 9 ਵਿਕਟਾਂ ‘ਤੇ 325 ਦੌੜਾਂ ਬਣਾਈਆਂ। ਰੂਟ ਤੋਂ ਇਲਾਵਾ, ਓਪਨਰ ਜ਼ੈਕ ਕ੍ਰਾਲੀ ਨੇ 76 ਦੌੜਾਂ ਬਣਾਈਆਂ। ਖੱਬੇ ਹੱਥ ਦੇ ਤੇਜ਼ ਗੇਂਦਬਾਜ਼ ਮਿਸ਼ੇਲ ਸਟਾਰਕ ਨੇ ਘਰੇਲੂ ਟੀਮ ਲਈ ਛੇ ਵਿਕਟਾਂ ਲਈਆਂ।
ਇੰਗਲੈਂਡ ਦੀ ਖ਼ਰਾਬ ਸ਼ੁਰੂਆਤ
ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕਰਦੇ ਹੋਏ, ਇੰਗਲੈਂਡ ਟੀਮ ਨੇ ਪੰਜ ਦੌੜਾਂ ‘ਤੇ ਦੋ ਵਿਕਟਾਂ ਗੁਆ ਦਿੱਤੀਆਂ। ਬੇਨ ਡਕੇਟ ਅਤੇ ਓਲੀ ਪੋਪ ਬਿਨਾਂ ਕੋਈ ਸਕੋਰ ਬਣਾਏ ਆਊਟ ਹੋ ਗਏ। ਦੋਵਾਂ ਨੂੰ ਮਿਸ਼ੇਲ ਸਟਾਰਕ ਨੇ ਆਊਟ ਕੀਤਾ। ਫਿਰ ਜ਼ੈਕ ਕ੍ਰਾਲੀ ਨੇ ਜੋ ਰੂਟ ਨਾਲ ਸੈਂਕੜਾ ਸਾਂਝੇਦਾਰੀ ਕੀਤੀ। ਕ੍ਰਾਲੀ 76 ਦੌੜਾਂ ਬਣਾ ਕੇ ਆਊਟ ਹੋ ਗਿਆ, ਜਿਸ ਨਾਲ ਦੋਵਾਂ ਵਿਚਲਾ 117 ਦੌੜਾਂ ਦੀ ਸਾਂਝੇਦਾਰੀ ਟੁੱਟ ਗਈ।
ਤਿੰਨ ਵਿਕਟਾਂ ਡਿੱਗਣ ਤੋਂ ਬਾਅਦ, ਰੂਟ ਨੇ ਇੱਕ ਸਿਰੇ ਤੋਂ ਪਾਰੀ ਸੰਭਾਲੀ। ਉਸ ਤੋਂ ਬਾਅਦ ਹੈਰੀ ਬਰੂਕ (31), ਕਪਤਾਨ ਬੇਨ ਸਟੋਕਸ (19) ਅਤੇ ਜੈਮੀ ਸਮਿਥ (10) ਆਏ। ਵਿਲ ਜੈਕਸ ਕੁਝ ਦੇਰ ਲਈ ਟਿਕਿਆ ਰਿਹਾ, ਪਰ ਉਹ ਵੀ 19 ਦੌੜਾਂ ਬਣਾਉਣ ਤੋਂ ਬਾਅਦ ਪਿੱਛੇ ਕੈਚ ਹੋ ਗਿਆ। ਰੂਟ ਨੇ ਫਿਰ ਸਕਾਟ ਬੋਲੈਂਡ ਦੀ ਗੇਂਦ ‘ਤੇ ਫਾਈਨ ਲੈੱਗ ਵੱਲ ਚੌਕਾ ਮਾਰ ਕੇ ਆਪਣਾ 40ਵਾਂ ਟੈਸਟ ਸੈਂਕੜਾ ਪੂਰਾ ਕੀਤਾ। ਆਸਟ੍ਰੇਲੀਆ ‘ਚ ਟੈਸਟ ਸੈਂਕੜਾ ਹਾਸਲ ਕਰਨ ਲਈ ਰੂਟ ਨੂੰ 30 ਪਾਰੀਆਂ ਲੱਗੀਆਂ ਸਨ।
Read More: AUS ਬਨਾਮ ENG: ਜੈਕ ਕ੍ਰਾਲੀ ਨੇ 68 ਗੇਂਦਾਂ ‘ਚ ਜੜਿਆ ਅਰਧ ਸੈਂਕੜਾ, ਜੋ ਰੂਟ ਨਾਲ ਸਾਂਝੇਦਾਰੀ ਜਾਰੀ
