ਚੰਡੀਗੜ੍ਹ, 30 ਸਤੰਬਰ 2024: ਨਵੇਂ ਏਅਰ ਫੋਰਸ ਚੀਫ ਏਅਰ ਮਾਰਸ਼ਲ ਅਮਰ ਪ੍ਰੀਤ ਸਿੰਘ (Amar Preet Singh) ਨੇ ਅੱਜ ਚੀਫ਼ ਆਫ਼ ਏਅਰ ਸਟਾਫ਼ (Chief of Air Staff) ਦਾ ਚਾਰਜ ਸੰਭਾਲ ਲਿਆ ਹੈ | ਏਅਰ ਚੀਫ ਮਾਰਸ਼ਲ ਵਿਵੇਕ ਰਾਮ ਚੌਧਰੀ ਸੇਵਾਮੁਕਤ ਹੋ ਗਏ ਹਨ । ਭਾਰਤ ਸਰਕਾਰ ਨੇ ਹਵਾਈ ਫੌਜ (Air Force) ਦੇ ਡਿਪਟੀ ਚੀਫ਼ ਏਅਰ ਮਾਰਸ਼ਲ ਅਮਰ ਪ੍ਰੀਤ ਸਿੰਘ ਨੂੰ ਅਗਲਾ ਏਅਰ ਚੀਫ਼ ਨਿਯੁਕਤ ਕਰਨ ਦਾ ਪਹਿਲਾਂ ਹੀ ਐਲਾਨ ਕੀਤਾ ਸੀ |
ਏਅਰ ਮਾਰਸ਼ਲ ਅਮਰ ਪ੍ਰੀਤ ਸਿੰਘ (Amar Preet Singh) ਇੱਕ ਸ਼ਾਨਦਾਰ ਲੜਾਕੂ ਪਾਇਲਟ ਰਹੇ ਹਨ। ਉਹ ਇੱਕ ਯੋਗਤਾ ਪ੍ਰਾਪਤ ਫਲਾਈਟ ਇੰਸਟ੍ਰਕਟਰ ਅਤੇ ਪ੍ਰਯੋਗਾਤਮਕ ਟੈਸਟ ਪਾਇਲਟ ਹਨ। ਸੇਵਾਮੁਕਤੀ ਤੋਂ ਪਹਿਲਾਂ ਹਵਾਈ ਫੌਜ ਮੁਖੀ ਵਿਵੇਕ ਰਾਮ ਚੌਧਰੀ ਸੋਮਵਾਰ ਸਵੇਰੇ ਸ਼ਹੀਦਾਂ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕਰਨਗੇ। ਦੁਪਹਿਰ ਬਾਅਦ ਉਨ੍ਹਾਂ ਨੂੰ ਵਿਦਾਇਗੀ ਦੇਣ ਲਈ ‘ਗਾਰਡ ਆਫ਼ ਆਨਰ’ ਦਿੱਤਾ ਜਾਵੇਗਾ। ਏਅਰ ਮਾਰਸ਼ਲ ਅਮਰ ਪ੍ਰੀਤ ਸਿੰਘ ਹਵਾਈ ਫੌਜ ਦੇ ਉਪ ਮੁਖੀ ਦਾ ਅਹੁਦਾ ਸੰਭਾਲਣ ਤੋਂ ਪਹਿਲਾਂ ਕੇਂਦਰੀ ਹਵਾਈ ਕਮਾਂਡ ਦੇ ਏਅਰ ਅਫਸਰ ਕਮਾਂਡਿੰਗ-ਇਨ-ਚੀਫ਼ ਸਨ।
Read More: ਖੜਗੇ ਦੇ ਬਿਆਨ ‘ਤੇ ਅਮਿਤ ਸ਼ਾਹ ਦਾ ਪਲਟਵਾਰ, ਕਿਹਾ-“ਖੜਗੇ ਨੇ ਆਪਣੀ ਪਾਰਟੀ ਆਗੂਆਂ ਤੋਂ ਵੀ ਮਾੜੀ ਗੱਲ ਕਹੀ”
ਅਮਰ ਪ੍ਰੀਤ ਸਿੰਘ (Amar Preet Singh) ਨੂੰ ਦਸੰਬਰ 1984 ‘ਚ ਭਾਰਤੀ ਹਵਾਈ ਫੌਜ (Air Force) ਦੇ ਲੜਾਕੂ ਪਾਇਲਟ ਸਟਰੀਮ ‘ਚ ਨਿਯੁਕਤ ਕੀਤਾ ਗਿਆ ਸੀ। 27 ਅਕਤੂਬਰ 1964 ਨੂੰ ਜਨਮੇ ਏਅਰ ਮਾਰਸ਼ਲ ਅਮਰ ਪ੍ਰੀਤ ਸਿੰਘ ਨੇ ਭਾਰਤੀ ਹਵਾਈ ਫੌਜ ‘ਚ ਲਗਪਗ 40 ਸਾਲ ਲੰਮੀ ਅਤੇ ਸ਼ਾਨਦਾਰ ਸੇਵਾਵਾਂ ਦਿੱਤੀਆਂ ਹਨ। ਆਪਣੀ ਵਿਲੱਖਣ ਸੇਵਾ ਦੌਰਾਨ, ਉਨ੍ਹਾਂ ਨੇ ਕਈ ਕਮਾਂਡ, ਸਟਾਫ ਅਤੇ ਵਿਦੇਸ਼ੀ ਨਿਯੁਕਤੀਆਂ ‘ਤੇ ਸੇਵਾ ਕੀਤੀ ਹੈ।
ਅਮਰ ਪ੍ਰੀਤ ਸਿੰਘ ਨੇ ਕਈ ਤਰ੍ਹਾਂ ਦੇ ਫਿਕਸਡ ਅਤੇ ਰੋਟਰੀ ਵਿੰਗ ਏਅਰਕ੍ਰਾਫਟ ‘ਤੇ 5,000 ਘੰਟੇ ਤੋਂ ਵੱਧ ਉਡਾਣ ਭਰੀ ਹੈ। 5,000 ਘੰਟਿਆਂ ਤੋਂ ਵੱਧ ਦੀ ਉਡਾਣ ਭਰਨਾ ਆਪਣੇ ਆਪ ‘ਚ ਇੱਕ ਸ਼ਾਨਦਾਰ ਅਨੁਭਵ ਹੈ। ਚੀਫ ਏਅਰ ਮਾਰਸ਼ਲ ਅਮਰ ਪ੍ਰੀਤ ਸਿੰਘ ਨਾਮੀ ਨੈਸ਼ਨਲ ਡਿਫੈਂਸ ਅਕੈਡਮੀ, ਡਿਫੈਂਸ ਸਰਵਿਸਿਜ਼ ਸਟਾਫ ਕਾਲਜ ਅਤੇ ਨੈਸ਼ਨਲ ਡਿਫੈਂਸ ਕਾਲਜ ਦੇ ਸਾਬਕਾ ਵਿਦਿਆਰਥੀ ਹਨ। ਆਪਣੀ ਲੰਮੀ ਸੇਵਾ ਦੌਰਾਨ, ਏਅਰ ਮਾਰਸ਼ਲ ਅਮਰ ਪ੍ਰੀਤ ਸਿੰਘ ਨੇ ਇੱਕ ਸੰਚਾਲਨ ਲੜਾਕੂ ਸਕੁਐਡਰਨ ਅਤੇ ਇੱਕ ਫਰੰਟਲਾਈਨ ਏਅਰ ਬੇਸ ਦੀ ਕਮਾਂਡ ਕੀਤੀ ਹੈ।
