ਐੱਸ ਏ ਐੱਸ ਨਗਰ, 12 ਜੂਨ, 2024: ਸੰਯੁਕਤ ਰਾਸ਼ਟਰ ਵੱਲੋਂ 11 ਜੂਨ ਨੂੰ ਬੱਚਿਆਂ ਦੇ ਖੇਡਣ ਦੇ ਮੌਲਿਕ ਅਧਿਕਾਰ ਦੀ ਰਾਖੀ ਲਈ ਸਮਰਪਿਤ ਦਿਨ ਵਜੋਂ ਮਨਾਏ ਜਾਣ ਦਾ ਫ਼ੈਸਲਾ ਲਏ ਜਾਣ ਉਪਰੰਤ ਅੰਬੇਦਕਰ ਇੰਸਟੀਚਿਊਟ ਆਫ਼ ਮੈਡੀਕਲ ਸਾਇੰਸ ਮੋਹਾਲੀ (AIMS Mohali) ਨੇ ਹਸਪਤਾਲ ਵਿੱਚ ਦਾਖਲ ਬੱਚਿਆਂ ਲਈ ਪਹਿਲਾ ਅੰਤਰਰਾਸ਼ਟਰੀ ਖੇਡ ਦਿਵਸ ਮਨਾਇਆ।
ਬੱਚਿਆਂ ਦੇ ਖੇਡਣ ਦੇ ਇਸ ਅੰਤਰਰਾਸ਼ਟਰੀ ਦਿਵਸ ਦੇ ਸਨਮਾਨ ਵਿੱਚ, ਡਾ. ਭਵਨੀਤ ਭਾਰਤੀ, ਡਾਇਰੈਕਟਰ ਪ੍ਰਿੰਸੀਪਲ ਜੋ ਕਿ ਖੁਦ ਇੱਕ ਬਾਲ ਰੋਗ ਵਿਗਿਆਨੀ ਹਨ, ਨੇ ਬੱਚਿਆਂ ਦੇ ਸਿਹਤਮੰਦ ਵਿਕਾਸ ਵਿੱਚ ਖੇਡ ਦੀ ਮਹੱਤਵਪੂਰਨ ਭੂਮਿਕਾ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਕਿਹਾ ਕਿ 11 ਜੂਨ ‘ਖੇਡ ਦੀ ਮਹੱਤਤਾ ਨੂੰ ਉੱਚਾ ਚੁੱਕਣ ਲਈ ਗਲੋਬਲ, ਰਾਸ਼ਟਰੀ ਅਤੇ ਸਥਾਨਕ ਪੱਧਰ ‘ਤੇ ਇਕਜੁੱਟਤਾ ਬਣਾਉਣ ਦੇ ਨਾਲ ਨਾਲ ‘ਹਰ ਇੱਕ, ਖਾਸ ਕਰਕੇ ਬੱਚਿਆਂ ਲਈ ਖੇਡ ਨੂੰ ਯਕੀਨੀ ਬਣਾਉਣ, ਉਤਸ਼ਾਹਿਤ ਕਰਨ ਅਤੇ ਤਰਜੀਹ ਦੇਣ ਲਈ ਸਮਰਪਿਤ ਮੌਕਾ ਹੈ।
ਉਨ੍ਹਾਂ ਕਿਹਾ ਕਿ ਬੱਚਿਆਂ ਚ, ਖਾਸ ਤੌਰ ‘ਤੇ, ਰਿਸ਼ਤੇ ਬਣਾਉਣ, ਭਾਵਨਾਤਮਕ ਨਿਯੰਤਰਣ ਨੂੰ ਬਿਹਤਰ ਬਣਾਉਣ, ਸਦਮੇ ‘ਤੇ ਕਾਬੂ ਪਾਉਣ ਅਤੇ ਸਮੱਸਿਆ ਹੱਲ ਕਰਨ ਦੇ ਹੁਨਰਾਂ ਨੂੰ ਵਿਕਸਤ ਕਰਨ ਲਈ ਖੇਡਣਾ ਮਹੱਤਵਪੂਰਨ ਹੈ। ਇਹ ਉਨ੍ਹਾਂ ਨੂੰ ਬੋਧਾਤਮਕ, ਸਰੀਰਕ, ਰਚਨਾਤਮਕ, ਸਮਾਜਿਕ, ਅਤੇ ਭਾਵਨਾਤਮਕ ਕਾਬਲੀਅਤਾਂ ਨੂੰ ਹਾਸਲ ਕਰਨ ਵਿੱਚ ਮਦਦ ਕਰਦਾ ਹੈ, ਜਿਹਨਾਂ ਦੀ ਉਹਨਾਂ ਨੂੰ ਸਾਡੀ ਤੇਜ਼ੀ ਨਾਲ ਬਦਲ ਰਹੀ ਦੁਨੀਆਂ ਵਿੱਚ ਵਧਣ-ਫੁੱਲਣ ਲਈ ਲੋੜ ਹੁੰਦੀ ਹੈ।
ਹਸਪਤਾਲ ਵਿੱਚ ਦਾਖਲ ਬੱਚਿਆਂ ਦੀਆਂ ਲੋੜਾਂ ਅਤੇ ਯੋਗਤਾਵਾਂ ਦੇ ਅਨੁਸਾਰ ਖੇਡ ਗਤੀਵਿਧੀਆਂ ਖਿਡੌਣਿਆਂ, ਬਲਾਕਾਂ, ਜੀਵਨ ਆਕਾਰ ਦੇ ਖਿਡੌਣਿਆਂ, ਕਲਾਵਾਂ ਤੋਂ ਲੈ ਕੇ ਇੰਟਰਐਕਟਿਵ ਕਠਪੁਤਲੀ ਸ਼ੋਅ ਸੈਸ਼ਨਾਂ ਤੱਕ ਦੀ ਇੱਕ ਲੜੀ ਪੇਸ਼ ਕੀਤੀ ਗਈ। ਇਸ ਦਾ ਉਦੇਸ਼ ਹਸਪਤਾਲ ਦੇ ਰੁਟੀਨ ਵਾਤਾਵਰਣ ਤੋਂ ਹਟ ਕੇ ਇੱਕ ਖੁਸ਼ਹਾਲ ਵਾਤਾਵਰਣ ਪ੍ਰਦਾਨ ਕਰਨਾ ਅਤੇ ਭਾਈਚਾਰੇ ਅਤੇ ਸਹਾਇਤਾ ਦੀ ਭਾਵਨਾ ਨੂੰ ਵਧਾਉਣਾ ਸੀ।
ਡਾ: ਅਦਿਤੀ ਦੁਆਰਾ “ਅਸੋਸੀਏਸ਼ਨ ਆਫ਼ ਸਕ੍ਰੀਨ ਟਾਈਮ ਵਿਦ ਲੈਂਗੂਏਜ ਡਿਲੇ ਇਨ ਚਿਲਡਰਨ” ਸਿਰਲੇਖ ਤਹਿਤ ਚੱਲ ਰਹੇ ਥੀਸਿਸ ਦੇ ਹਿੱਸੇ ਵਜੋਂ ਸਕ੍ਰੀਨ-ਅਧਾਰਿਤ ਗਤੀਵਿਧੀਆਂ ਉੱਤੇ ਇੰਟਰਐਕਟਿਵ ਅਤੇ ਸਰੀਰਕ ਖੇਡ ਦੇ ਮਹੱਤਵ ਨੂੰ ਰੇਖਾਂਕਿਤ ਕੀਤਾ ਗਿਆ। ਬਾਲ ਰੋਗ ਵਿਭਾਗ ਦੇ ਮੁਖੀ, ਡਾ. ਅਮਰਪ੍ਰੀਤ, ਨੇ ਕਿਹਾ, “ਇਸ ਅੰਤਰਰਾਸ਼ਟਰੀ ਖੇਡ ਦਿਵਸ ‘ਤੇ, ਅਸੀਂ ਸਾਰੇ ਆਪਣੇ ਬੱਚਿਆਂ ਦੇ ਸੰਪੂਰਨ ਵਿਕਾਸ ਅਤੇ ਤੰਦਰੁਸਤੀ ਦਾ ਸਮਰਥਨ ਕਰਨ ਲਈ ਉਨ੍ਹਾਂ ਦੇ ਉੱਜਵਲ ਅਤੇ ਸਿਹਤਮੰਦ ਭਵਿੱਖ ਨੂੰ ਯਕੀਨੀ ਬਣਾਉਣ ਲਈ ਭਰਪੂਰ ਵਾਤਾਵਰਣ ਬਣਾਉਣ ਲਈ ਵਚਨਬੱਧ ਬਣੀਏ।
ਡਾ. ਅਮਰਪ੍ਰੀਤ ਦੇ ਨਾਲ ਡਾ. ਜੈਸਮੀਨ, ਜ਼ਿਲ੍ਹਾ ਹਸਪਤਾਲ ਮੋਹਾਲੀ ਦੀ ਡਾ. ਰਵਿਕਾ, ਸਮਾਜ ਸੇਵੀਆਂ ਅਤੇ ਨਰਸਾਂ ਨੇ ਵੱਖ-ਵੱਖ ਖੇਡ ਗਤੀਵਿਧੀਆਂ ਵਿੱਚ ਹਿੱਸਾ ਲੈਂਦੇ ਹੋਏ ਬੱਚਿਆਂ ਦੀਆਂ ਖੁਸ਼ੀਆਂ ਚ ਸ਼ਮੂਲੀਅਤ ਕੀਤੀ। ਇਸ ਸਮਾਗਮ ਦਾ ਮਰੀਜ਼ਾਂ ਅਤੇ ਸਟਾਫ਼ ਦੁਆਰਾ ਨਿੱਘਾ ਸਵਾਗਤ ਕੀਤਾ ਗਿਆ, ਬਹੁਤ ਸਾਰੇ ਲੋਕਾਂ ਨੇ ਆਨੰਦਦਾਇਕ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਦੇ ਮੌਕੇ ਲਈ ਧੰਨਵਾਦ ਪ੍ਰਗਟ ਕੀਤਾ।
