ਚੰਡੀਗੜ੍ਹ, 02 ਅਕਤੂਬਰ 2026: ਵਿਕਸਤ ਭਾਰਤ ਦਾ ਸੁਪਨਾ ਲੋਕਾਂ ਦੇ ਜੀਵਨ ਦੀ ਗੁਣਵੱਤਾ ਨਾਲ ਜੁੜਿਆ ਹੈ। ਸਾਫ਼ ਗਲੀਆਂ, ਸਿਹਤਮੰਦ ਬਾਜ਼ਾਰ ਅਤੇ ਸਵੱਛ ਵਾਤਾਵਰਣ ਇਸ ਗੁਣਵੱਤਾ ਦੀ ਬੁਨਿਆਦ ਹਨ। ਸਵੱਛਤਾ ਸਰਕਾਰ ਵੱਲੋਂ ਬਣਾਏ ਢਾਂਚੇ ਅਤੇ ਹਰ ਨਾਗਰਿਕ ਦੀ ਰੋਜ਼ਾਨਾ ਭਾਗੀਦਾਰੀ ਨਾਲ ਹੀ ਜੀਵਨ ਸ਼ੈਲੀ ਬਣ ਸਕਦੀ ਹੈ, ਇਹ ਗੱਲ ਰਾਜ ਸਭਾ ਮੈਂਬਰ ਸਤਨਾਮ ਸਿੰਘ ਸੰਧੂ ਨੇ ਕਹੀ।
ਮਹਾਤਮਾ ਗਾਂਧੀ ਦੀ ਜਯੰਤੀ ਮੌਕੇ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਮਦਿਨ ਨੂੰ ਸਮਰਪਿਤ ਸੇਵਾ ਸੰਕਲਪ ਅਭਿਆਨ ਦੇ ਹਿੱਸੇ ਵਜੋਂ ਸੈਕਟਰ 26 ਸਬਜ਼ੀ ਮੰਡੀ, ਚੰਡੀਗੜ੍ਹ ਵਿਖੇ ਸਵੱਛਤਾ ਮੁਹਿੰਮ ਚਲਾਈ ਗਈ। ਇਹ ਮੁਹਿੰਮ ਭਾਜਪਾ ਦੇ ਚੰਡੀਗੜ੍ਹ ਇੰਚਾਰਜ ਅਤੇ ਸਾਬਕਾ ਕੇਂਦਰੀ ਮੰਤਰੀ ਮਹਿੰਦਰ ਨਾਥ ਪਾਂਡੇ ਦੀ ਅਗਵਾਈ ਹੇਠ ਹੋਈ।
ਇਸ ਵਿੱਚ ਰਾਜ ਸਭਾ ਮੈਂਬਰ ਸਤਨਾਮ ਸਿੰਘ ਸੰਧੂ, ਚੰਡੀਗੜ੍ਹ ਭਾਜਪਾ ਪ੍ਰਧਾਨ ਜਤਿੰਦਰ ਪਾਲ ਮਲਹੋਤਰਾ, ਸਾਬਕਾ ਪ੍ਰਧਾਨ ਅਰੁਣ ਸੂਦ, ਮੇਅਰ ਸੌਰਭ ਜੋਸ਼ੀ, ਪਾਰਟੀ ਆਗੂਆਂ, ਕਾਰਕੁਨਾਂ ਅਤੇ ਸ਼ਹਿਰ ਵਾਸੀਆਂ ਨੇ ਭਾਗ ਲਿਆ।
ਸੰਧੂ ਨੇ ਕਿਹਾ ਕਿ ਪਿਛਲੇ ਬਾਰਾਂ ਸਾਲਾਂ ਵਿੱਚ ਸਵੱਛ ਭਾਰਤ ਮਿਸ਼ਨ ਸਿਰਫ਼ ਇੱਕ ਨਾਅਰਾ ਬਣ ਕੇ ਨਹੀਂ ਰਿਹਾ, ਸਗੋਂ ਜਨ ਭਾਗੀਦਾਰੀ ਨਾਲ ਇੱਕ ਵਿਸ਼ਾਲ ਜਨ ਅੰਦੋਲਨ ਬਣਿਆ ਹੈ। ਸਰਕਾਰ ਨੇ ਪਖਾਨਿਆਂ ਦੇ ਨਿਰਮਾਣ ਅਤੇ ਪਿੰਡਾਂ ਤੇ ਸ਼ਹਿਰਾਂ ‘ਚ ਸਫ਼ਾਈ ਦਾ ਬੁਨਿਆਦੀ ਢਾਂਚਾ ਖੜ੍ਹਾ ਕਰਨ ਦੀ ਆਪਣੀ ਜ਼ਿੰਮੇਵਾਰੀ ਨਿਭਾਈ ਹੈ। ਹੁਣ ਇਸ ਢਾਂਚੇ ਨੂੰ ਸਾਫ਼ ਸੁਥਰੇ ਵਿਹਾਰ ਅਤੇ ਨਾਗਰਿਕ ਜ਼ਿੰਮੇਵਾਰੀ ਨਾਲ ਕਾਇਮ ਰੱਖਣਾ ਸਾਰਿਆਂ ਦਾ ਸਾਂਝਾ ਫ਼ਰਜ਼ ਹੈ।
ਉਨ੍ਹਾਂ ਕਿਹਾ ਕਿ ਮਿਸ਼ਨ ਤਹਿਤ ਪੇਂਡੂ ਭਾਰਤ ਵਿੱਚ 12.22 ਕਰੋੜ ਤੋਂ ਵੱਧ ਘਰੇਲੂ ਪਖਾਨੇ ਬਣਾਏ ਗਏ ਹਨ। ਦੇਸ਼ ਦੇ 5.69 ਲੱਖ ਤੋਂ ਵੱਧ ਪਿੰਡ ਓਡੀਐੱਫ ਪਲੱਸ ਦਰਜੇ ਤੱਕ ਪਹੁੰਚੇ ਹਨ। 5.38 ਲੱਖ ਤੋਂ ਵੱਧ ਪਿੰਡਾਂ ‘ਚ ਠੋਸ ਕੂੜਾ ਪ੍ਰਬੰਧਨ ਅਤੇ 5.65 ਲੱਖ ਤੋਂ ਵੱਧ ਪਿੰਡਾਂ ‘ਚ ਤਰਲ ਕੂੜਾ ਪ੍ਰਬੰਧਨ ਦੇ ਪ੍ਰਬੰਧ ਕੀਤੇ ਗਏ ਹਨ। ਇਹ ਦਰਸਾਉਂਦਾ ਹੈ ਕਿ ਸਵੱਛਤਾ ਨਾਲ ਜੁੜੀਆਂ ਸਹੂਲਤਾਂ ਪਿੰਡਾਂ ਤੱਕ ਪਹੁੰਚਾਉਣ ਉੱਤੇ ਵੀ ਧਿਆਨ ਦਿੱਤਾ ਗਿਆ ਹੈ। ਸ਼ਹਿਰਾਂ ‘ਚ ਵੀ ਘਰ ਘਰ ਕੂੜਾ ਇਕੱਠਾ ਕਰਨ ਅਤੇ ਕੂੜੇ ਨੂੰ ਸਰੋਤ ਉੱਤੇ ਵੱਖ ਕਰਨ ਦੇ ਪ੍ਰਬੰਧਾਂ ਦਾ ਵਿਸਥਾਰ ਹੋਇਆ ਹੈ।
ਸਤਨਾਮ ਸੰਧੂ ਨੇ ਕਿਹਾ ਕਿ ਸਵੱਛਤਾ ਵਿਕਸਤ ਭਾਰਤ ‘ਚ ਹਰ ਨਾਗਰਿਕ ਦੇ ਜੀਵਨ ਪੱਧਰ ਦਾ ਅਹਿਮ ਪੱਖ ਹੈ। ਸਰਕਾਰ ਸਹੂਲਤਾਂ ਅਤੇ ਬੁਨਿਆਦੀ ਢਾਂਚਾ ਤਿਆਰ ਕਰ ਸਕਦੀ ਹੈ, ਪਰ ਉਨ੍ਹਾਂ ਨੂੰ ਸਾਫ਼ ਸੁਥਰਾ ਰੱਖਣ ਲਈ ਨਾਗਰਿਕਾਂ ਦੀ ਸੂਝ ਅਤੇ ਭਾਗੀਦਾਰੀ ਲਾਜ਼ਮੀ ਹੈ। ਸਵੱਛਤਾ ਕਿਸੇ ਇੱਕ ਦਿਨ ਦਾ ਕੰਮ ਨਹੀਂ, ਸਗੋਂ ਰੋਜ਼ਾਨਾ ਜੀਵਨ ਦੀ ਆਦਤ ਬਣਨੀ ਚਾਹੀਦੀ ਹੈ।
ਉਨ੍ਹਾਂ ਕਿਹਾ ਕਿ ਸਵੱਛ ਭਾਰਤ ਮਿਸ਼ਨ ਤਹਿਤ ਪੁਰਾਣੇ ਕੂੜੇ ਦੇ ਵੱਡੇ ਢੇਰਾਂ ਨੂੰ ਵਿਗਿਆਨਕ ਤਰੀਕੇ ਨਾਲ ਹਟਾਉਣ ਅਤੇ ਉਸ ਜ਼ਮੀਨ ਨੂੰ ਮੁੜ ਵਰਤੋਂ ‘ਚ ਲਿਆਉਣ ਦਾ ਕੰਮ ਵੀ ਅੱਗੇ ਵਧਿਆ ਹੈ। ਕੇਂਦਰੀ ਸ਼ਹਿਰੀ ਵਿਕਾਸ ਮੰਤਰਾਲੇ ਅਨੁਸਾਰ ਮਈ 2026 ਤੱਕ ਦੇਸ਼ ਭਰ ਦੇ 2,482 ਕੂੜਾ ਸਥਾਨਾਂ ਉੱਤੇ ਜਮ੍ਹਾਂ 26 ਕਰੋੜ ਮੈਟ੍ਰਿਕ ਟਨ ਪੁਰਾਣੇ ਕੂੜੇ ‘ਚੋਂ 65 ਫ਼ੀਸਦੀ ਦੀ ਪ੍ਰਕਿਰਿਆ ਕੀਤੀ ਜਾ ਚੁੱਕੀ ਸੀ ਅਤੇ ਲਗਭਗ 9,000 ਏਕੜ ਜ਼ਮੀਨ ਮੁੜ ਪ੍ਰਾਪਤ ਕੀਤੀ ਗਈ ਸੀ। ਚੰਡੀਗੜ੍ਹ ਦੇ ਡੱਡੂਮਾਜਰਾ ਅਤੇ ਦਿੱਲੀ ਦੇ ਭਲਸਵਾ ‘ਚ ਵੀ ਪੁਰਾਣੇ ਕੂੜੇ ਦੀ ਵਿਗਿਆਨਕ ਪ੍ਰਕਿਰਿਆ ਦਾ ਕੰਮ ਹੋ ਰਿਹਾ ਹੈ। ਦਿੱਲੀ ਦੇ ਭਲਸਵਾ ਸਥਾਨ ਉੱਤੇ ਜੁਲਾਈ 2026 ਤੱਕ 99.07 ਲੱਖ ਮੈਟ੍ਰਿਕ ਟਨ ਪੁਰਾਣੇ ਕੂੜੇ ਦੀ ਪ੍ਰਕਿਰਿਆ ਕੀਤੀ ਗਈ ਸੀ।
ਸਤਨਾਮ ਸੰਧੂ ਨੇ ਕਿਹਾ ਕਿ ਸੈਕਟਰ 26 ਵਰਗੀ ਰੁਝੇਵਿਆਂ ਵਾਲੀ ਸਬਜ਼ੀ ਮੰਡੀ ‘ਵਿੱਚ ਸਫ਼ਾਈ ਦਾ ਸਿੱਧਾ ਸਬੰਧ ਜਨਤਕ ਸਿਹਤ, ਵਪਾਰੀਆਂ ਅਤੇ ਰੇਹੜੀ ਫੜ੍ਹੀ ਵਾਲਿਆਂ ਦੀ ਰੋਜ਼ੀ ਰੋਟੀ ਅਤੇ ਖਰੀਦਦਾਰੀ ਲਈ ਆਉਣ ਵਾਲੇ ਲੋਕਾਂ ਦੀ ਸਹੂਲਤ ਨਾਲ ਹੈ। ਉਨ੍ਹਾਂ ਨੇ ਨਾਗਰਿਕਾਂ ਅਤੇ ਦੁਕਾਨਦਾਰਾਂ ਨੂੰ ਕੂੜੇ ਦਾ ਢੁੱਕਵਾਂ ਨਿਪਟਾਰਾ ਕਰਨ ਅਤੇ ਆਪਣੇ ਆਲੇ ਦੁਆਲੇ ਨੂੰ ਸਾਫ਼ ਰੱਖਣ ‘ਚ ਸਰਗਰਮ ਭੂਮਿਕਾ ਨਿਭਾਉਣ ਦੀ ਅਪੀਲ ਕੀਤੀ। ਉਨ੍ਹਾਂ ਕਿਹਾ ਕਿ ਲੋਕਾਂ ਦੀ ਭਾਗੀਦਾਰੀ ਨਾਲ ਚੰਡੀਗੜ੍ਹ ਨੂੰ ਹੋਰ ਸਾਫ਼, ਸਿਹਤਮੰਦ ਅਤੇ ਰਹਿਣਯੋਗ ਸ਼ਹਿਰ ਬਣਾਇਆ ਜਾ ਸਕਦਾ ਹੈ।
Read More: ਚੰਡੀਗੜ੍ਹੁ ‘ਚ “ਈ-ਸੰਪਦਾ ਸੀਐਚਡੀ” ਐੱਪ ਲਾਂਚ, ਹੁਣ ਘਰ ਬੈਠੇ ਹੋਣਗੇ ਜਾਇਦਾਦ ਸਬੰਧੀ ਕੰਮ
