ਸਪੋਰਟਸ, 03 ਅਪ੍ਰੈਲ 2026: KKR ਬਨਾਮ SRH: ਸਨਰਾਈਜ਼ਰਜ਼ ਹੈਦਰਾਬਾਦ ਦੇ ਸਲਾਮੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ (Abhishek Sharma) ਨੂੰ ਆਈਪੀਐਲ ਮੈਚ ਦੌਰਾਨ ਆਈਪੀਐਲ ਜ਼ਾਬਤੇ ਦੀ ਉਲੰਘਣਾ ਕਰਨ ਲਈ ਜੁਰਮਾਨਾ ਲਗਾਇਆ ਹੈ। ਵੀਰਵਾਰ ਨੂੰ ਈਡਨ ਗਾਰਡਨਜ਼ ਵਿਖੇ ਕੋਲਕਾਤਾ ਨਾਈਟ ਰਾਈਡਰਜ਼ (ਕੇਕੇਆਰ) ਖ਼ਿਲਾਫ ਮੈਚ ਦੌਰਾਨ ਆਈਪੀਐਲ ਜ਼ਾਬਤੇ ਦੀ ਉਲੰਘਣਾ ਕਰਨ ਲਈ ਉਨ੍ਹਾਂ ਦੀ ਮੈਚ ਫੀਸ ਦਾ 25% ਜੁਰਮਾਨਾ ਲਗਾਇਆ ਸੀ ਅਤੇ ਇੱਕ ਡੀਮੈਰਿਟ ਪੁਆਇੰਟ ਦਿੱਤਾ ਗਿਆ ਸੀ।
ਆਈਪੀਐਲ ਦੁਆਰਾ ਜਾਰੀ ਇੱਕ ਬਿਆਨ ਮੁਤਾਬਕ, ਅਭਿਸ਼ੇਕ (Abhishek Sharma) ਨੇ ਆਪਣੀ ਗਲਤੀ ਸਵੀਕਾਰ ਕੀਤੀ ਹੈ ਅਤੇ ਮੈਚ ਰੈਫਰੀ ਦੁਆਰਾ ਲੈਵਲ 1 ਦੇ ਅਪਰਾਧ ਦੇ ਤਹਿਤ ਲਗਾਈ ਗਈ ਸਜ਼ਾ ਨੂੰ ਸਵੀਕਾਰ ਕਰ ਲਿਆ ਹੈ। ਅਭਿਸ਼ੇਕ ਸ਼ਰਮਾ ਨੂੰ ਆਈਪੀਐਲ ਜ਼ਾਬਤੇ ਦੀ ਧਾਰਾ 2.3 ਦੀ ਉਲੰਘਣਾ ਕਰਨ ਦਾ ਦੋਸ਼ੀ ਪਾਇਆ ਗਿਆ ਹੈ। ਇਹ ਲੇਖ ਆਮ ਤੌਰ ‘ਤੇ ਮੈਚ ਦੌਰਾਨ “ਅਣਉਚਿਤ ਵਿਵਹਾਰ” ਜਾਂ ਖੇਡ ਦੀ ਭਾਵਨਾ ਦੇ ਉਲਟ ਟਿੱਪਣੀਆਂ ਜਾਂ ਇਸ਼ਾਰਿਆਂ ਨਾਲ ਸਬੰਧਤ ਹੈ। ਅਭਿਸ਼ੇਕ ਸ਼ਰਮਾ ਨੇ ਕੈਚ ਪਿੱਛੇ ਆਊਟ ਦਿੱਤੇ ਜਾਣ ਤੋਂ ਬਾਅਦ ਤੀਜੇ ਅੰਪਾਇਰ ਦੇ ਫੈਸਲੇ ‘ਤੇ ਅਸਹਿਮਤੀ ਪ੍ਰਗਟ ਕੀਤੀ ਸੀ।
ਦਰਅਸਲ, ਅਭਿਸ਼ੇਕ ਸ਼ਰਮਾ ਨੂੰ 8.4ਵੇਂ ਓਵਰ ‘ਚ ਆਊਟ ਕਰ ਦਿੱਤਾ ਗਿਆ ਸੀ। ਬਲੇਸਿੰਗ ਮੁਜ਼ਾਰਾਬਾਨੀ ਨੇ 112 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਇੱਕ ਹੌਲੀ, ਸ਼ਾਰਟ-ਆਫ-ਲੈਂਥ ਡਿਲੀਵਰੀ ਸੁੱਟੀ, ਜਿਸ ‘ਤੇ ਅਭਿਸ਼ੇਕ ਨੇ ਪੁੱਲ ਸ਼ਾਟ ਖੇਡਿਆ। ਗੇਂਦ ਡੀਪ ਸਕੁਏਅਰ ਲੈੱਗ ਵੱਲ ਗਈ, ਜਿੱਥੇ ਵਰੁਣ ਚੱਕਰਵਰਤੀ, ਜੋ ਕਿ ਬਾਊਂਡਰੀ ‘ਤੇ ਸੀ, ਤੇਜ਼ੀ ਨਾਲ ਆਪਣੇ ਸੱਜੇ ਪਾਸੇ ਭੱਜਿਆ, ਕੈਚ ਫੜ ਲਿਆ।
ਹਾਲਾਂਕਿ ਰੀਪਲੇਅ ‘ਚ ਸਪੱਸ਼ਟ ਕੈਚ ਨਹੀਂ ਦਿਖਾਈ ਦਿੱਤਾ, ਤੀਜੇ ਅੰਪਾਇਰ ਨੇ ਵੱਖ-ਵੱਖ ਕੋਣਾਂ ਤੋਂ ਕੈਚ ਦੀ ਜਾਂਚ ਕਰਨ ਤੋਂ ਬਾਅਦ, ਅਭਿਸ਼ੇਕ ਨੂੰ ਆਊਟ ਘੋਸ਼ਿਤ ਕਰ ਦਿੱਤਾ। ਫੈਸਲੇ ਤੋਂ ਅਸੰਤੁਸ਼ਟ, ਅਭਿਸ਼ੇਕ ਨੂੰ ਗੁੱਸੇ ‘ਚ ਮੈਦਾਨ ਤੋਂ ਬਾਹਰ ਜਾਂਦੇ ਹੋਏ ਦੇਖਿਆ ਗਿਆ। ਅਭਿਸ਼ੇਕ 21 ਗੇਂਦਾਂ ‘ਤੇ 48 ਦੌੜਾਂ ਬਣਾ ਕੇ ਆਪਣਾ ਅਰਧ ਸੈਂਕੜਾ ਪੂਰਾ ਨਹੀਂ ਕਰ ਸਕਿਆ।
ਅਭਿਸ਼ੇਕ ਸ਼ਰਮਾ ਦੇ ਖਾਤੇ ;ਚ ਇੱਕ ਡੀਮੈਰਿਟ ਪੁਆਇੰਟ ਜੋੜਨ ਦਾ ਮਤਲਬ ਹੈ ਕਿ ਉਸਨੂੰ ਹੁਣ ਆਪਣੇ ਆਉਣ ਵਾਲੇ ਮੈਚਾਂ ;ਚ ਸਾਵਧਾਨ ਰਹਿਣਾ ਪਵੇਗਾ। ਆਈਪੀਐਲ ਨਿਯਮਾਂ ਦੇ ਮੁਤਾਬਕ, ਜੇਕਰ ਕੋਈ ਖਿਡਾਰੀ ਇੱਕ ਨਿਸ਼ਚਿਤ ਸਮਾਂ ਸੀਮਾ ਦੇ ਅੰਦਰ ਚਾਰ ਜਾਂ ਵੱਧ ਡੀਮੈਰਿਟ ਪੁਆਇੰਟ ਇਕੱਠੇ ਕਰਦਾ ਹੈ, ਤਾਂ ਉਸਨੂੰ ਇੱਕ ਜਾਂ ਵੱਧ ਮੈਚਾਂ ਲਈ ਪਾਬੰਦੀ ਲਗਾਈ ਜਾ ਸਕਦੀ ਹੈ।
Read More: KKR ਬਨਾਮ SRH Result: ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਕੋਲਕਾਤਾ ਨੂੰ ਘਰੇਲੂ ਮੈਦਾਨ ‘ਤੇ 65 ਦੌੜਾਂ ਨਾਲ ਹਰਾਇਆ
