ਗੁਜਰਾਤ, 03 ਦਸੰਬਰ 2025: Fire Incident in Bhavnagar: ਬੁੱਧਵਾਰ ਸਵੇਰੇ ਗੁਜਰਾਤ ਦੇ ਭਾਵਨਗਰ ‘ਚ ਇੱਕ ਕੰਪਲੈਕਸ ‘ਚ ਅੱਗ ਲੱਗ ਗਈ। ਬੇਸਮੈਂਟ ਤੋਂ ਸ਼ੁਰੂ ਹੋਈ ਅੱਗ ਤੇਜ਼ੀ ਨਾਲ ਪੂਰੀ ਇਮਾਰਤ ‘ਚ ਫੈਲ ਗਈ, ਇਸ ਕੰਪਲੈਕਸ ‘ਚ ਚਾਰ ਹਸਪਤਾਲ ਅਤੇ ਕਈ ਦੁਕਾਨਾਂ ਹਨ। ਅੱਗ ਫੈਲਦੇ ਹੀ ਪਹਿਲੀ ਮੰਜ਼ਿਲ ਦੇ ਹਸਪਤਾਲ ਦੀ ਇੱਕ ਖਿੜਕੀ ਤੋੜ ਕੇ ਅਤੇ ਚਾਦਰਾਂ ‘ਚ ਲਪੇਟੇ ਹੋਏ ਨਵਜੰਮੇ ਬੱਚਿਆਂ ਨੂੰ ਬਾਹਰ ਕੱਢਿਆ ਗਿਆ।
ਇਸਦੇ ਨਾਲ ਹੀ ਮਰੀਜ਼ਾਂ ਨੂੰ ਇੱਕ ਹੋਰ ਹਸਪਤਾਲ ਤੋਂ ਵੀ ਬਚਾਇਆ ਗਿਆ। ਪ੍ਰਸ਼ਾਸਨ ਦੇ ਮੁਤਾਬਕ ਇਸ ਘਟਨਾ ‘ਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਇਮਾਰਤ ‘ਚੋਂ ਧੂੰਆਂ ਫੈਲਣ ਕਾਰਨ ਮਰੀਜ਼ਾਂ ਨੂੰ ਹੋਰ ਥਾਵਾਂ ‘ਤੇ ਤਬਦੀਲ ਕਰ ਦਿੱਤਾ ਗਿਆ। ਅੱਗ ਲੱਗਣ ਦੇ ਕਾਰਨਾਂ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
ਫਾਇਰ ਅਫਸਰ ਪ੍ਰਦੁਮਨ ਸਿੰਘ ਦੇ ਮੁਤਾਬਕ ਹੁਣ ਤੱਕ 19-20 ਲੋਕਾਂ ਨੂੰ ਬਚਾਇਆ ਗਿਆ ਹੈ। ਪੰਜ ਫਾਇਰਫਾਈਟਰ ਅਤੇ 50 ਤੋਂ ਵੱਧ ਕਰਮਚਾਰੀ ਅੱਗ ਬੁਝਾਉਣ ਵਿੱਚ ਸ਼ਾਮਲ ਸਨ। ਇਮਾਰਤ ਦੇ ਅੰਦਰ ਹਸਪਤਾਲ ਤੋਂ ਨਵਜੰਮੇ ਬੱਚਿਆਂ ਨੂੰ ਵੀ ਬਚਾਇਆ ਗਿਆ। ਉਨ੍ਹਾਂ ਨੂੰ ਚਾਦਰਾਂ ‘ਚ ਲਪੇਟ ਕੇ ਡਰਿੱਪਾਂ ਨਾਲ ਬਾਹਰ ਕੱਢਿਆ ਗਿਆ।
ਨਗਰ ਨਿਗਮ ਕਮਿਸ਼ਨਰ ਐਨ.ਵੀ. ਮੀਨਾ ਨੇ ਦੱਸਿਆ ਕਿ ਅੱਗ ਜ਼ਮੀਨੀ ਮੰਜ਼ਿਲ ‘ਤੇ ਇਕੱਠੇ ਹੋਏ ਕੂੜੇ ਤੋਂ ਲੱਗੀ ਸੀ ਅਤੇ ਅੱਗ ਦਾ ਧੂੰਆਂ ਹਸਪਤਾਲਾਂ ਤੱਕ ਪਹੁੰਚਿਆ। ਅੱਗ ਦੇ ਕਾਰਨਾਂ ਦੀ ਜਾਂਚ ਦੇ ਆਦੇਸ਼ ਦਿੱਤੇ ਗਏ ਹਨ।
Read More: ਬ੍ਰਾਜ਼ੀਲ ‘ਚ UN ਜਲਵਾਯੂ ਸੰਮੇਲਨ ਵਾਲੀ ਥਾਂ ‘ਤੇ ਲੱਗੀ ਅੱ.ਗ, ਭਾਰਤ ਦੇ ਵਾਤਾਵਰਣ ਮੰਤਰੀ ਭੂਪੇਂਦਰ ਯਾਦਵ ਵੀ ਸਨ ਮੌਜੂਦ
