ਸਪੋਰਟਸ, 05 ਸਤੰਬਰ 2025: ਨਿਊਜ਼ੀਲੈਂਡ ਦੇ ਸਾਬਕਾ ਕਪਤਾਨ ਰੌਸ ਟੇਲਰ ਨੇ ਆਪਣੀ ਰਿਟਾਇਰਮੈਂਟ ਵਾਪਸ ਲੈ ਲਈ ਹੈ। ਹਾਲਾਂਕਿ, ਹੁਣ ਰੌਸ ਟੇਲਰ ਨਿਊਜ਼ੀਲੈਂਡ ਦੀ ਬਜਾਏ ਸਮੋਆ ਲਈ ਖੇਡਣਗੇ। 41 ਸਾਲਾ ਮੱਧ ਕ੍ਰਮ ਦਾ ਬੱਲੇਬਾਜ਼ ਟੇਲਰ ਆਉਣ ਵਾਲੇ ਪੂਰਬੀ ਏਸ਼ੀਆ-ਪ੍ਰਸ਼ਾਂਤ ਟੀ-20 ਵਿਸ਼ਵ ਕੱਪ 2026 ਕੁਆਲੀਫਾਇਰ ਟੂਰਨਾਮੈਂਟ ‘ਚ ਸਮੋਆ ਲਈ ਖੇਡੇਗਾ।
ਨਿਊਜ਼ੀਲੈਂਡ ਦੇ ਇਸ ਬੱਲੇਬਾਜ਼ ਦੀ ਮਾਂ ਸਮੋਆ ਤੋਂ ਹੈ, ਜਿਸ ਕਾਰਨ ਰੌਸ ਟੇਲਰ ਨੂੰ ਉੱਥੇ ਪਾਸਪੋਰਟ ਮਿਲ ਗਿਆ ਹੈ। ਟੇਲਰ ਨੇ ਸਾਲ 2022 ‘ਚ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈ ਲਿਆ ਸੀ। ਟੇਲਰ ਆਖਰੀ ਵਾਰ ਅਪ੍ਰੈਲ 2022 ‘ਚ ਨਿਊਜ਼ੀਲੈਂਡ ਲਈ ਖੇਡਿਆ ਸੀ। ਅਜਿਹੀ ਸਥਿਤੀ ‘ਚ ਉਨ੍ਹਾਂ ਦਾ ਤਿੰਨ ਸਾਲਾਂ ਦਾ ਕੂਲਿੰਗ ਆਫ ਪੀਰੀਅਡ ਵੀ ਖਤਮ ਹੋ ਗਿਆ ਹੈ ਅਤੇ ਹੁਣ ਉਹ ਸਮੋਆ ਲਈ ਯੋਗ ਹੈ।
ਟੇਲਰ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਇਹ ਜਾਣਕਾਰੀ ਦਿੱਤੀ ਹੈ। ਰੌਸ ਟੇਲਰ ਨੇ ਲਿਖਿਆ, ਹੁਣ ਇਹ ਅਧਿਕਾਰਤ ਹੈ। ਮੈਨੂੰ ਮਾਣ ਹੈ ਕਿ ਮੈਂ ਕ੍ਰਿਕਟ ‘ਚ ਨੀਲੀ ਜਰਸੀ ਪਾ ਕੇ ਸਮੋਆ ਦੀ ਨੁਮਾਇੰਦਗੀ ਕਰਨ ਜਾ ਰਿਹਾ ਹਾਂ। ਇਹ ਨਾ ਸਿਰਫ਼ ਮੇਰੇ ਮਨਪਸੰਦ ਖੇਡ ‘ਚ ਮੇਰੀ ਵਾਪਸੀ ਹੈ, ਸਗੋਂ ਆਪਣੀ ਵਿਰਾਸਤ, ਸੱਭਿਆਚਾਰ, ਪਿੰਡ ਅਤੇ ਪਰਿਵਾਰ ਦੀ ਨੁਮਾਇੰਦਗੀ ਕਰਨਾ ਵੀ ਇੱਕ ਵੱਡਾ ਸਨਮਾਨ ਹੈ। ਮੈਂ ਇਸ ਮੌਕੇ ਲਈ ਉਤਸ਼ਾਹਿਤ ਹਾਂ।
ਟੇਲਰ ਨੇ ਨਿਊਜ਼ੀਲੈਂਡ ਲਈ 110 ਟੈਸਟ ਮੈਚ ਖੇਡੇ ਹਨ। ਉਨ੍ਹਾਂ ਨੇ ਆਪਣੇ ਨਾਮ 7584 ਦੌੜਾਂ ਬਣਾਈਆਂ ਹਨ। ਵਨਡੇ ਮੈਚਾਂ ‘ਚ ਉਨ੍ਹਾਂ ਨੇ 223 ਮੈਚਾਂ ‘ਚ 8581 ਦੌੜਾਂ ਬਣਾਈਆਂ ਹਨ। ਟੇਲਰ ਨੇ ਨਿਊਜ਼ੀਲੈਂਡ ਲਈ ਟੀ-20 ‘ਚ 102 ਮੈਚ ਖੇਡੇ ਹਨ। ਉਨ੍ਹਾਂ ਨੇ ਇਨ੍ਹਾਂ ‘ਚ 1909 ਦੌੜਾਂ ਬਣਾਈਆਂ ਹਨ। ਟੇਲਰ ਕੀਵੀ ਟੀਮ ਲਈ ਟੈਸਟ ‘ਚ ਦੂਜੇ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਖਿਡਾਰੀ ਹੈ।
ਉਹ ਵਨਡੇ ਮੈਚਾਂ ਵਿੱਚ ਟੀਮ ਲਈ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਖਿਡਾਰੀ ਹੈ। ਵਨਡੇ ਮੈਚਾਂ ‘ਚ ਉਸਦਾ ਸਭ ਤੋਂ ਵੱਧ ਸਕੋਰ 181 ਨਾਬਾਦ ਹੈ ਜਦੋਂ ਕਿ ਟੈਸਟ ‘ਚ ਉਸਦਾ ਸਭ ਤੋਂ ਵਧੀਆ ਸਕੋਰ 290 ਦੌੜਾਂ ਹੈ। ਟੇਲਰ ਨੇ ਮਾਰਚ 2006 ‘ਚ ਵੈਸਟਇੰਡੀਜ਼ ਵਿਰੁੱਧ ਆਪਣਾ ਵਨਡੇ ਡੈਬਿਊ ਕੀਤਾ ਸੀ। ਇੱਕ ਸਾਲ ਬਾਅਦ ਉਨ੍ਹਾਂ ਨੇ ਦੱਖਣੀ ਅਫਰੀਕਾ ਵਿਰੁੱਧ ਆਪਣਾ ਪਹਿਲਾ ਟੈਸਟ ਮੈਚ ਖੇਡਿਆ।
Read More: SA ਬਨਾਮ ENG: ਦੱਖਣੀ ਅਫਰੀਕਾ ਨੇ ਦੂਜੇ ਵਨਡੇ ਮੈਚ ‘ਚ ਇੰਗਲੈਂਡ ਨੂੰ 5 ਦੌੜਾਂ ਨਾਲ ਹਰਾਇਆ
