ਚੰਡੀਗੜ੍ਹ, 20 ਸਤੰਬਰ 2024: ਹਿਮਾਚਲ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਸੁਖਵਿੰਦਰ ਸਿੰਘ ਸੁੱਖੂ ਦੀ ਅਗਵਾਈ ਹੇਠ ਹੋਈ ਮੰਤਰੀ ਮੰਡਲ (Himachal Cabinet) ਦੀ ਬੈਠਕ ‘ਚ ਕਈ ਅਹਿਮ ਫੈਸਲਿਆਂ ‘ਤੇ ਮੋਹਰ ਲੱਗੀ ਹੈ | ਹਿਮਾਚਲ ਮੰਤਰੀ ਮੰਡਲ ਇਸ ਅਹਿਮ ਬੈਠਕ ‘ਚ ਲਏ ਫੈਸਲਿਆਂ ਬਾਰੇ ਜਾਣਕਾਰੀ ਦਿੰਦਿਆਂ ਉਦਯੋਗ ਮੰਤਰੀ ਹਰਸ਼ਵਰਧਨ ਚੌਹਾਨ ਨੇ ਦੱਸਿਆ ਕਿ ਵਣ ਵਿਭਾਗ ‘ਚ ਸਹਾਇਕ ਵਣ ਗਾਰਡਾਂ ਦੀਆਂ 100 ਅਸਾਮੀਆਂ ਅਤੇ ਪ੍ਰਿੰਟਿੰਗ ਅਤੇ ਸਟੇਸ਼ਨਰੀ ਵਿਭਾਗ ‘ਚ ਵੱਖ-ਵੱਖ ਸ਼੍ਰੇਣੀਆਂ ਦੀਆਂ 33 ਅਸਾਮੀਆਂ ਭਰਨ ਦੀ ਮਨਜ਼ੂਰੀ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਦੀ ਮੰਤਰੀ ਮੰਡਲ ਬੈਠਕ ‘ਚ 200 ਦੇ ਕਰੀਬ ਅਸਾਮੀਆਂ ਭਰਨ ਦਾ ਫੈਸਲਾ ਲਿਆ ਗਿਆ ਹੈ ।
ਉਨ੍ਹਾਂ ਕਿਹਾ ਕਿ ਲਾਹੌਲ-ਸਪੀਤੀ ਦੇ ਸੀਸੂ ਵਿਖੇ ਨਵੇਂ ਪੁਲਿਸ ਸਟੇਸ਼ਨ ਦੇ ਉਦਘਾਟਨ ਅਤੇ ਸੰਚਾਲਨ ਲਈ ਵੱਖ-ਵੱਖ ਸ਼੍ਰੇਣੀਆਂ ਦੀਆਂ 18 ਅਸਾਮੀਆਂ ਬਣਾਉਣ ਅਤੇ ਭਰਨ ਅਤੇ ਚੰਬਾ ਜ਼ਿਲ੍ਹੇ ਦੇ ਹਥਲੀ ਵਿਖੇ ਨਵੀਂ ਪੁਲਿਸ ਚੌਕੀ ਲਈ ਵੱਖ-ਵੱਖ ਸ਼੍ਰੇਣੀਆਂ ਦੀਆਂ 6 ਅਸਾਮੀਆਂ ਬਣਾਉਣ ਅਤੇ ਭਰਨ ਦੀ ਵੀ ਪ੍ਰਵਾਨਗੀ ਦਿੱਤੀ ਗਈ ਹੈ।
ਮੰਤਰੀ ਮੰਡਲ (Himachal Cabinet) ਨੇ ਹੋਣਹਾਰ ਵਿਦਿਆਰਥੀਆਂ ਨੂੰ ਲਾਭ ਪਹੁੰਚਾਉਣ ਦੇ ਮੰਤਵ ਨਾਲ ਡਾ: ਯਸ਼ਵੰਤ ਸਿੰਘ ਪਰਮਾਰ ਲੋਨ ਸਕੀਮ ਨੂੰ ਅੱਗੇ ਵਧਾਉਣ ਦਾ ਫੈਸਲਾ ਕੀਤਾ ਹੈ। ਇਸ ਤਹਿਤ ਵਿਦੇਸ਼ਾਂ ਦੀਆਂ ਵਿੱਦਿਅਕ ਸੰਸਥਾਵਾਂ ‘ਚ ਪੇਸ਼ੇਵਰ ਅਤੇ ਕਿੱਤਾਮੁਖੀ ਕੋਰਸ ਕਰਨ ਦੇ ਚਾਹਵਾਨ ਯੋਗ ਹੋਣਹਾਰ ਵਿਦਿਆਰਥੀਆਂ ਨੂੰ ਇਸ ਸਕੀਮ ਦਾ ਲਾਭ ਦਿੱਤਾ ਜਾਵੇਗਾ । ਇਸ ਸਕੀਮ ਤਹਿਤ ਹਿਮਾਚਲ ਸਰਕਾਰ ਇੱਕ ਫੀਸਦੀ ਦੀ ਵਿਆਜ ਦਰ ‘ਤੇ ਵਿਦਿਅਕ ਲੋਨ ਦਿੰਦੀ ਹੈ।
SCERT-DIET ਨੂੰ ਮਜ਼ਬੂਤ ਕਰਨਾ
ਸੁੱਖੂ ਮੰਤਰੀ ਮੰਡਲ ਨੇ ਸੋਲਨ ‘ਚ ਕੰਮ ਕਰ ਰਹੀ ਸਟੇਟ ਕੌਂਸਲ ਆਫ਼ ਐਜੂਕੇਸ਼ਨਲ ਰਿਸਰਚ ਐਂਡ ਟ੍ਰੇਨਿੰਗ (ਐਸਸੀਈਆਰਟੀ) ਨੂੰ ਰਾਜ ਪੱਧਰ ‘ਤੇ ਸਕੂਲ ਅਤੇ ਅਧਿਆਪਕਾਂ ਦੀ ਸਿਖਲਾਈ ਲਈ ਸਿਖਰ ਸੰਸਥਾ ਵਿੱਚ ਅੱਪਗ੍ਰੇਡ ਕਰਨ ਨੂੰ ਵੀ ਪ੍ਰਵਾਨਗੀ ਦੇ ਦਿੱਤੀ ਹੈ। ਇਸਦਾ ਉਦੇਸ਼ ਅਕਾਦਮਿਕ ਖੋਜ ਨੂੰ ਉਤਸ਼ਾਹਿਤ ਕਰਨਾ ਅਤੇ ਸਿੱਖਿਆ ਦੀ ਗੁਣਵੱਤਾ ‘ਚ ਸੁਧਾਰ ਕਰਨਾ ਹੈ। ਇਸ ਤੋਂ ਇਲਾਵਾ, ਅਧਿਆਪਕਾਂ ਦੀ ਕਾਰਜਸ਼ੈਲੀ ‘ਚ ਹੋਰ ਗੁਣਵੱਤਾ ਲਿਆਉਣ ਲਈ 12 ਜ਼ਿਲ੍ਹਾ ਸਿੱਖਿਆ ਅਤੇ ਸਿਖਲਾਈ ਸੰਸਥਾਵਾਂ (DIETs) ਨੂੰ ਮਜ਼ਬੂਤ ਕਰਨ ਦਾ ਫੈਸਲਾ ਕੀਤਾ ਗਿਆ।
Read More: IND vs BAN: ਭਾਰਤੀ ਗੇਂਦਬਾਜ਼ਾਂ ਅੱਗੇ ਬੰਗਲਾਦੇਸ਼ ਟੀਮ 149 ਦੌੜਾਂ ‘ਤੇ ਸਿਮਟੀ, ਭਾਰਤ ਦੀ ਦੂਜੀ ਪਾਰੀ ਸ਼ੁਰੂ
ਮੰਤਰੀ ਮੰਡਲ (Himachal Cabinet) ਨੇ 780 ਮੈਗਾਵਾਟ ਜੰਗੀ ਥੋਪਨ ਹਾਈਡ੍ਰੋਇਲੈਕਟ੍ਰਿਕ ਪ੍ਰੋਜੈਕਟ ਹਿਮਾਚਲ ਪ੍ਰਦੇਸ਼ ਪਾਵਰ ਕਾਰਪੋਰੇਸ਼ਨ ਨੂੰ ਦੇਣ ਦਾ ਫੈਸਲਾ ਕੀਤਾ ਹੈ। ਬੈਠਕ ‘ਚ ਪਾਵਰ ਕਾਰਪੋਰੇਸ਼ਨ ਨੂੰ 1610 ਮੈਗਾਵਾਟ ਰੇਣੁਕਾਜੀ ਅਤੇ 270 ਮੈਗਾਵਾਟ ਥਾਨਾ ਪਲੋਨ ਪੰਪ ਸਟੋਰੇਜ ਹਾਈਡਰੋ ਪਾਵਰ ਪ੍ਰੋਜੈਕਟ ਵੀ ਅਲਾਟ ਕੀਤੇ ਜਾਣਗੇ।
ਮੰਤਰੀ ਮੰਡਲ ਨੇ ਹਿਮਾਚਲ ਪ੍ਰਦੇਸ਼ ਰਾਜ ਚੋਣ ਕਮਿਸ਼ਨ ਨੂੰ ਪੋਸਟ ਕੋਡ 903 ਅਤੇ 939 ਦੇ ਨਤੀਜੇ ਘੋਸ਼ਿਤ ਕਰਨ ਲਈ ਅਧਿਕਾਰਤ ਕੀਤਾ ਹੈ। ਜਾਂਚ ਅਤੇ ਅਦਾਲਤੀ ਕਾਰਵਾਈ ਦੇ ਅੰਤਿਮ ਨਤੀਜੇ ਦੇ ਮੱਦੇਨਜ਼ਰ ਪੋਸਟ ਕੋਡ 903 ਅਧੀਨ 5 ਅਸਾਮੀਆਂ ਅਤੇ ਪੋਸਟ ਕੋਡ 939 ਅਧੀਨ 6 ਅਸਾਮੀਆਂ ਖਾਲੀ ਰੱਖੀਆਂ ਗਈਆਂ ਹਨ।
ਦੇਹਰਾ-ਪਾਉਂਟਾ ਸਾਹਿਬ ਨੂੰ ਮਿਲਿਆ ਕ੍ਰਿਟੀਕਲ ਕੇਅਰ ਬਲਾਕ
ਮੰਤਰੀ ਮੰਡਲ ਨੇ ਕਾਂਗੜਾ ਦੇ ਸਿਵਲ ਹਸਪਤਾਲ ਦੇਹਰਾ ਅਤੇ ਸਿਰਮੌਰ ਜ਼ਿਲ੍ਹੇ ਦੇ ਸਿਵਲ ਹਸਪਤਾਲ ਪਾਉਂਟਾ ਸਾਹਿਬ ਵਿਖੇ 50-50 ਬਿਸਤਰਿਆਂ ਵਾਲੇ ਕ੍ਰਿਟੀਕਲ ਕੇਅਰ ਬਲਾਕ ਸਥਾਪਤ ਕਰਨ ਨੂੰ ਵੀ ਪ੍ਰਵਾਨਗੀ ਦੇ ਦਿੱਤੀ ਹੈ। ਇਸੇ ਤਰ੍ਹਾਂ ਦੇਹਰਾ ‘ਚ ਹਿਮਾਚਲ ਪ੍ਰਦੇਸ਼ ਰਾਜ ਬਿਜਲੀ ਬੋਰਡ ਲਿਮਟਿਡ ਦੇ ਸੁਪਰਡੈਂਟ ਇੰਜਨੀਅਰ (ਐਸਈ) ਅਤੇ ਬਲਾਕ ਮੈਡੀਕਲ ਅਫਸਰ (ਬੀਐਮਓ) ਦੇ ਦਫ਼ਤਰ ਸਥਾਪਤ ਕਰਨ ਲਈ ਵੀ ਪ੍ਰਵਾਨਗੀ ਦਿੱਤੀ ਗਈ |
ਮੰਤਰੀ ਮੰਡਲ ਨੇ ਸੰਚਾਲਨ ਕੁਸ਼ਲਤਾ ਨੂੰ ਵਧਾਉਣ ਲਈ ਫੋਰੈਂਸਿਕ ਸੇਵਾਵਾਂ ਵਿਭਾਗ ਨੂੰ 6 ਮੋਬਾਈਲ ਫੋਰੈਂਸਿਕ ਵੈਨਾਂ ਪ੍ਰਦਾਨ ਕਰਨ ਦੀ ਪ੍ਰਵਾਨਗੀ ਦਿੱਤੀ ਹੈ। ਸੂਬੇ ‘ਚ ਰੋਗੀ ਕਲਿਆਣੀ ਸਮਿਤੀ ਨੂੰ ਮਜ਼ਬੂਤ ਕਰਨ ਲਈ ਸਿਹਤ ਮੰਤਰੀ ਧਨੀਰਾਮ ਸ਼ਾਂਡਿਲ ਦੀ ਅਗਵਾਈ ‘ਚ ਇੱਕ ਕੈਬਨਿਟ ਸਬ-ਕਮੇਟੀ ਦਾ ਗਠਨ ਕੀਤਾ ਹੈ।
ਮੰਤਰੀ ਮੰਡਲ ਨੇ ਸ਼ਿਮਲਾ ਵਿੱਚ ਸ਼ੋਘੀ ਅਤੇ ਕਸੌਲੀ, ਜਾਬਲੀ, ਬਰੋਟੀਵਾਲਾ, ਨਾਲਾਗੜ੍ਹ ਅਤੇ ਸੋਲਨ ‘ਚ ਬੱਦੀ ਵਿਖੇ ਈਐਸਆਈ ਮੈਡੀਕਲ ਸੰਸਥਾਵਾਂ ਲਈ 6 ਮੈਡੀਕਲ ਅਫਸਰਾਂ (ਡੈਂਟਲ) ਦੀਆਂ ਅਸਾਮੀਆਂ ਬਣਾਉਣ ਅਤੇ ਭਰਨ ਦੀ ਪ੍ਰਵਾਨਗੀ ਦੇ ਦਿੱਤੀ ਹੈ।
ਮੰਤਰੀ ਮੰਡਲ ਨੇ ਗ੍ਰਹਿ ਵਿਭਾਗ ‘ਚ ਡਿਪਟੀ ਸੁਪਰਡੈਂਟ ਆਫ਼ ਪੁਲਿਸ ਦੀਆਂ 2 ਅਸਾਮੀਆਂ, ਜ਼ਿਲ੍ਹਾ ਜੇਲ੍ਹ ਮੰਡੀ ‘ਚ ਡਰੱਗ ਵਿਤਰਕ ਦੀ ਇੱਕ ਪੋਸਟ, ਸਹਾਇਕ ਡਾਇਰੈਕਟਰ (ਬਾਇਓਲੋਜੀ ਅਤੇ ਸੀਰੋਲਾਜੀ) ਦੀ ਇੱਕ ਪੋਸਟ ਅਤੇ ਲੈਬਾਰਟਰੀ ਸਹਾਇਕ (ਰਸਾਇਣ ਅਤੇ ਜ਼ਹਿਰ ਵਿਗਿਆਨ) ਦੀਆਂ 3 ਅਸਾਮੀਆਂ ਭਰਨ ਦਾ ਫੈਸਲਾ ਕੀਤਾ ਹੈ। ਐਡਵੋਕੇਟ ਜਨਰਲ, ਹਿਮਾਚਲ ਪ੍ਰਦੇਸ਼ ਦੇ ਦਫ਼ਤਰ ਲਈ ਵੱਖ-ਵੱਖ ਸ਼੍ਰੇਣੀਆਂ ਦੀਆਂ 10 ਅਸਾਮੀਆਂ ਭਰਨ ਦਾ ਵੀ ਫੈਸਲਾ ਕੀਤਾ ਗਿਆ ਹੈ ।
