ਚੰਡੀਗੜ, 16 ਜੁਲਾਈ 2024: ਹਰਿਆਣਾ ਕਰਮਚਾਰੀ ਚੋਣ ਕਮਿਸ਼ਨ ਨੇ ਹਰਿਆਣਾ ਪੁਲਿਸ (Haryana Police) ‘ਚ 5000 ਕਾਂਸਟੇਬਲਾਂ ਦੀ ਭਰਤੀ ਲਈ ਸਰੀਰਕ ਮਾਪਦੰਡ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ | ਹਰਿਆਣਾ ਕਰਮਚਾਰੀ ਚੋਣ ਕਮਿਸ਼ਨ ਦੇ ਚੇਅਰਮੈਨ ਹਿੰਮਤ ਸਿੰਘ ਨੇ ਦੱਸਿਆ ਕਿ ਗਰੁੱਪ-ਸੀ ਦੀ ਸੰਯੁਕਤ ਯੋਗਤਾ ਪ੍ਰੀਖਿਆ ਪਾਸ ਕਰਨ ਵਾਲੇ ਉਮੀਦਵਾਰਾਂ ਨੇ ਹਰਿਆਣਾ ਪੁਲਿਸ ‘ਚ ਕਾਂਸਟੇਬਲ ਜਨਰਲ ਡਿਊਟੀ ਲਈ ਚੋਣ ਕੀਤੀ ਹੈ। ਉਨ੍ਹਾਂ ਦੀ ਫਿਜੀਕਲ ਟੈਸਟ ਪੰਚਕੂਲਾ ਦੇ ਤਾਊ ਦੇਵੀ ਲਾਲ ਸਟੇਡੀਅਮ ‘ਚ ਅੱਜ ਤੋਂ ਸ਼ੁਰੂ ਹੋ ਕੇ 23 ਜੁਲਾਈ ਤੱਕ ਕੀਤੇ ਜਾਣਗੇ |

ਉਮੀਦਵਾਰਾਂ ਦੀ ਸੰਤੁਸ਼ਟੀ ਲਈ 20 ਡਿਜੀਟਲ ਮਾਪਦੰਡ ਸਟੈਂਡ ਲਗਾਏ ਗਏ ਹਨ। ਖੇਡ ਵਿਭਾਗ ਦੇ ਕੋਚਾਂ ਅਤੇ ਹੋਰ ਮਾਹਰਾਂ ਦੀ ਡਿਊਟੀ ਹਰ ਸਟੈਂਡ ’ਤੇ ਲਗਾਈ ਗਈ ਹੈ। ਉਮੀਦਵਾਰ ਡਿਸਪਲੇ ਬੋਰਡ ‘ਤੇ ਡਿਜ਼ੀਟਲ ਸਟੈਂਡ ‘ਤੇ ਆਪਣੀ ਉਚਾਈ, ਕਾਠੀ ਅਤੇ ਭਾਰ ਬਾਰੇ ਜਾਣਕਾਰੀ ਖੁਦ ਦੇਖ ਸਕਦੇ ਹਨ।

ਉਨ੍ਹਾਂ ਦੱਸਿਆ ਕਿ ਅੱਜ ਪਹਿਲਾ ਸਲਾਟ ਸਵੇਰੇ 6.30 ਵਜੇ ਸ਼ੁਰੂ ਹੋਇਆ। ਦੂਜਾ ਸਲਾਟ ਰਾਤ 8.30 ਵਜੇ, ਤੀਜਾ ਸਵੇਰੇ 10.30 ਵਜੇ ਅਤੇ ਚੌਥਾ ਦੁਪਹਿਰ 12.30 ਵਜੇ ਨਿਰਧਾਰਤ ਕੀਤਾ ਗਿਆ ਹੈ। ਅੱਜ ਪਹਿਲੇ ਦਿਨ 2000 ਉਮੀਦਵਾਰਾਂ ਦੇ ਫਿਜੀਕਲ ਟੈਸਟ ਹੋਏ। ਇਸ ਤੋਂ ਬਾਅਦ ਭਲਕੇ 3000 ਉਮੀਦਵਾਰਾਂ ਅਤੇ 18 ਤੋਂ 23 ਜੁਲਾਈ ਤੱਕ 5000 ਉਮੀਦਵਾਰਾਂ ਦੇ ਫਿਜੀਕਲ ਟੈਸਟ ਲਏ ਜਾਣਗੇ ।

ਉਨ੍ਹਾਂ ਦੱਸਿਆ ਕਿ ਪਹਿਲੇ ਪੜਾਅ ‘ਚ 5000 ਪੁਲਿਸ ਕਾਂਸਟੇਬਲਾਂ (Haryana Police) ਦੀਆਂ ਅਸਾਮੀਆਂ ਦੇ ਮੁਕਾਬਲੇ 6 ਗੁਣਾ ਉਮੀਦਵਾਰਾਂ ਨੂੰ ਸਰੀਰਕ ਜਾਂਚ ਲਈ ਬੁਲਾਇਆ ਹੈ। ਬਾਕੀ ਰਹਿੰਦੇ ਉਮੀਦਵਾਰਾਂ ਦੀ ਸੂਚੀ ਬਾਅਦ ‘ਚ ਜਾਰੀ ਕੀਤੀ ਜਾਵੇਗੀ ਜੋ ਕਮਿਸ਼ਨ ਦੀ ਵੈੱਬਸਾਈਟ ‘ਤੇ ਵੀ ਉਪਲਬਧ ਹੈ। ਇਸਦੇ ਨਾਲ ਹੀ ਉਮੀਦਵਾਰਾਂ ਦੀ ਸਹੂਲਤ ਲਈ ਵੱਖ-ਵੱਖ ਥਾਵਾਂ ‘ਤੇ ਹੈਲਪ ਡੈਸਕ ਸਥਾਪਿਤ ਕੀਤੇ ਗਏ ਹਨ।