ਚੰਡੀਗੜ੍ਹ 03 ਮਈ 2022: ਵੈਸਟਇੰਡੀਜ਼ (West Indies) ਦੇ ਧਾਕੜ ਖੱਬੇ ਹੱਥ ਦੇ ਬੱਲੇਬਾਜ਼ ਨਿਕੋਲਸ ਪੂਰਨ (Nicholas Pooran) ਨੂੰ ਵੈਸਟਇੰਡੀਜ਼ ਦਾ ਨਵਾਂ ਵਨਡੇ ਅਤੇ ਟੀ-20 ਕਪਤਾਨ ਨਿਯੁਕਤ ਕੀਤਾ ਗਿਆ ਹੈ। ਪੂਰਨ ਪਿਛਲੇ ਮਹੀਨੇ ਸੇਵਾਮੁਕਤ ਹੋਏ ਕੀਰੋਨ ਪੋਲਾਰਡ ਦੀ ਥਾਂ ਲੈਣਗੇ। ਕ੍ਰਿਕਟ ਵੈਸਟਇੰਡੀਜ਼ ਨੇ ਮੰਗਲਵਾਰ (3 ਮਈ) ਨੂੰ ਇਸ ਦਾ ਐਲਾਨ ਕੀਤਾ। ਪੂਰਨ ਇਸ ਤੋਂ ਪਹਿਲਾਂ ਪੋਲਾਰਡ ਦੀ ਅਗਵਾਈ ਵਾਲੀ ਟੀਮ ਦੇ ਉਪ-ਕਪਤਾਨ ਸਨ। ਵਿਕਟਕੀਪਰ ਬੱਲੇਬਾਜ਼ ਸ਼ਾਈ ਹੋਪ ਨੂੰ ਵਨਡੇ ‘ਚ ਟੀਮ ਦਾ ਨਵਾਂ ਉਪ ਕਪਤਾਨ ਬਣਾਇਆ ਗਿਆ ਹੈ।
ਕ੍ਰਿਕੇਟ ਵੈਸਟਇੰਡੀਜ਼ ਨੇ ਕਿਹਾ, “ਪੋਲਾਰਡ ਦੇ ਅੰਤਰਰਾਸ਼ਟਰੀ ਕ੍ਰਿਕਟ ਤੋਂ ਸੰਨਿਆਸ ਲੈਣ ਤੋਂ ਬਾਅਦ ਨਿਕੋਲਸ ਪੂਰਨ (Nicholas Pooran) ਵੈਸਟਇੰਡੀਜ਼ ਦੀ ਪੁਰਸ਼ ਵਨਡੇ ਅਤੇ ਟੀ-20 ਟੀਮਾਂ ਦੀ ਕਪਤਾਨੀ ਸੰਭਾਲਣਗੇ।” ਪੂਰਨ ਇਸ ਸਾਲ ਦੇ ਅੰਤ ਵਿੱਚ ਹੋਣ ਵਾਲੇ ਆਈਸੀਸੀ ਪੁਰਸ਼ ਟੀ-20 ਵਿਸ਼ਵ ਕੱਪ ਅਤੇ ਅਕਤੂਬਰ 2023 ਵਿੱਚ ਹੋਣ ਵਾਲੇ ਆਈਸੀਸੀ ਪੁਰਸ਼ ਕ੍ਰਿਕਟ ਵਿਸ਼ਵ ਕੱਪ ਵਿੱਚ ਵੀ ਟੀਮ ਦੀ ਅਗਵਾਈ ਕਰੇਗਾ।
ਕ੍ਰਿਕਟ ਵੈਸਟਇੰਡੀਜ਼ ਦੇ ਡਾਇਰੈਕਟਰ ਜਿੰਮੀ ਐਡਮਜ਼ ਦੇ ਹਵਾਲੇ ਨਾਲ ਕਿਹਾ ਗਿਆ, “ਸਾਡਾ ਮੰਨਣਾ ਹੈ ਕਿ ਨਿਕੋਲਸ ਆਪਣੇ ਤਜ਼ਰਬੇ ਅਤੇ ਪ੍ਰਦਰਸ਼ਨ ਨਾਲ ਸਫੈਦ ਗੇਂਦ ਵਾਲੀਆਂ ਟੀਮਾਂ ਦੀ ਅਗਵਾਈ ਕਰਨ ਲਈ ਤਿਆਰ ਹਨ। ਚੋਣ ਕਮੇਟੀ ਦਾ ਮੰਨਣਾ ਹੈ ਕਿ ਨਿਕੋਲਸ ਇੱਕ ਖਿਡਾਰੀ ਦੇ ਤੌਰ ‘ਤੇ ਪਰਿਪੱਕ ਹੋ ਗਿਆ ਹੈ।” ਉਸਨੇ ਦੋਵਾਂ ਟੀਮਾਂ ਦੀ ਕਪਤਾਨੀ ਕੀਤੀ ਹੈ। ਪੋਲਾਰਡ ਦੀ ਗੈਰ-ਮੌਜੂਦਗੀ ‘ਚ ਟੀਮਾਂ ਅਤੇ ਚੋਣ ਕਮੇਟੀ ਉਸ ਦੇ ਪ੍ਰਦਰਸ਼ਨ ਤੋਂ ਖੁਸ਼ ਹੈ।
