ਚੰਡੀਗੜ੍ਹ 13 ਨਵੰਬਰ 2021 : ਪਾਕਿਸਤਾਨ ਦੇ ਸਾਬਕਾ ਕਪਤਾਨ ਸ਼ਾਹਿਦ ਅਫਰੀਦੀ ਦਾ ਮੰਨਣਾ ਹੈ ਕਿ ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਨੂੰ ਬੱਲੇਬਾਜ਼ ਦੇ ਤੌਰ ‘ਤੇ ਜ਼ਿਆਦਾ ਪ੍ਰਦਰਸ਼ਨ ਕਰਨ ਲਈ ਖੇਡ ਦੇ ਸਾਰੇ ਫਾਰਮੈਟਾਂ ‘ਚ ਆਪਣੀ ਕਪਤਾਨੀ ਦੀ ਭੂਮਿਕਾ ਛੱਡ ਦੇਣੀ ਚਾਹੀਦੀ ਹੈ। ਅਫਰੀਦੀ ਨੇ ਕਿਹਾ ਕਿ ਬੀਸੀਸੀਆਈ (ਕ੍ਰਿਕਟ ਬੋਰਡ ਆਫ ਇੰਡੀਆ) ਦਾ ਰੋਹਿਤ ਸ਼ਰਮਾ ਨੂੰ ਭਾਰਤੀ ਟੀ-20 ਟੀਮ ਦਾ ਕਪਤਾਨ ਨਿਯੁਕਤ ਕਰਨ ਦਾ ਫੈਸਲਾ ਚੰਗਾ ਹੈ। ਬੀਸੀਸੀਆਈ ਨੇ ਇਹ ਫੈਸਲਾ ਭਾਰਤ ਦੀ ਟੀ-20 ਵਿਸ਼ਵ ਕੱਪ ਮੁਹਿੰਮ ਦੇ ਅੰਤ ਵਿੱਚ ਕੋਹਲੀ ਵੱਲੋਂ ਟੀ-20 ਕਪਤਾਨੀ ਤੋਂ ਹਟਣ ਦੇ ਫੈਸਲੇ ਤੋਂ ਬਾਅਦ ਲਿਆ ਹੈ।
ਅਫਰੀਦੀ ਨੇ ਕਿਹਾ ਕਿ ਮੈਨੂੰ ਲੱਗਦਾ ਹੈ ਕਿ ਉਹ ਭਾਰਤੀ ਕ੍ਰਿਕਟ ਲਈ ਸ਼ਾਨਦਾਰ ਤਾਕਤ ਰਿਹਾ ਹੈ ਪਰ ਮੈਨੂੰ ਲੱਗਦਾ ਹੈ ਕਿ ਇਹ ਚੰਗਾ ਹੋਵੇਗਾ ਜੇਕਰ ਉਹ ਹੁਣ ਸਾਰੇ ਫਾਰਮੈਟਾਂ ‘ਚ ਕਪਤਾਨ ਦੇ ਰੂਪ ‘ਚ ਸੰਨਿਆਸ ਲੈਣ ਦਾ ਫੈਸਲਾ ਕਰਦਾ ਹੈ। ਮੈਂ ਰੋਹਿਤ ਨਾਲ ਇਕ ਸਾਲ ਤੱਕ ਖੇਡਿਆ ਅਤੇ ਉਹ ਮਜ਼ਬੂਤ ਮਾਨਸਿਕਤਾ ਵਾਲਾ ਸ਼ਾਨਦਾਰ ਖਿਡਾਰੀ ਹੈ। ਉਸਦਾ ਸਭ ਤੋਂ ਮਜ਼ਬੂਤ ਨੁਕਤਾ ਇਹ ਹੈ ਕਿ ਉਹ ਲੋੜ ਪੈਣ ‘ਤੇ ‘ਆਰਾਮ’ ਕਰ ਸਕਦਾ ਹੈ ਅਤੇ ਜਦੋਂ ਇਹ ਬਿਲਕੁਲ ਜ਼ਰੂਰੀ ਹੋਵੇ ਤਾਂ ਹਮਲਾਵਰਤਾ ਵੀ ਦਿਖਾ ਸਕਦਾ ਹੈ।
ਪਾਕਿਸਤਾਨੀ ਸਟਾਰ ਨੇ ਕਿਹਾ ਕਿ ਰੋਹਿਤ ਕੋਲ ਇੱਕ ਚੰਗੇ ਕਪਤਾਨ ਲਈ ਮਾਨਸਿਕ ਤਾਕਤ ਹੈ ਅਤੇ ਉਸਨੇ ਆਪਣੀ ਆਈਪੀਐਲ (ਇੰਡੀਅਨ ਪ੍ਰੀਮੀਅਰ ਲੀਗ) ਦੀ ਫ੍ਰੈਂਚਾਇਜ਼ੀ ਮੁੰਬਈ ਇੰਡੀਅਨਜ਼ ਲਈ ਇਹ ਦਿਖਾਇਆ ਹੈ। ਉਹ ਚੋਟੀ ਦੇ ਦਰਜੇ ਦਾ ਖਿਡਾਰੀ ਹੈ, ਉਸ ਦੀ ਸ਼ਾਟ ਦੀ ਚੋਣ ਸ਼ਾਨਦਾਰ ਹੈ ਅਤੇ ਉਹ ਖਿਡਾਰੀਆਂ ਲਈ ਵਧੀਆ ਆਗੂ ਬਣਨ ਦੀ ਮਾਨਸਿਕਤਾ ਰੱਖਦਾ ਹੈ। ਅਫਰੀਦੀ ਆਈਪੀਐਲ ਦੇ ਸ਼ੁਰੂਆਤੀ ਸਾਲ ਵਿੱਚ ਡੇਕਨ ਚਾਰਜਰਜ਼ ਵਿੱਚ ਰੋਹਿਤ ਦੇ ਨਾਲ ਖੇਡਿਆ ਸੀ।
ਕੋਹਲੀ ਦੇ ਟੀ-20 ਕਪਤਾਨੀ ਤੋਂ ਹਟਣ ਦੇ ਫੈਸਲੇ ‘ਤੇ ਅਫਰੀਦੀ ਨੇ ਕਿਹਾ ਕਿ ਉਹ ਇਸ ਦੀ ਉਮੀਦ ਕਰ ਰਹੇ ਸਨ। ਅਫਰੀਦੀ ਦਾ ਮੰਨਣਾ ਹੈ ਕਿ ਕੋਹਲੀ ਨੂੰ ਕਪਤਾਨੀ ਛੱਡ ਕੇ ਤਿੰਨਾਂ ਫਾਰਮੈਟਾਂ ‘ਚ ਆਪਣੀ ਬੱਲੇਬਾਜ਼ੀ ‘ਤੇ ਧਿਆਨ ਦੇਣਾ ਚਾਹੀਦਾ ਹੈ ਅਤੇ ਇਸ ਦਾ ਆਨੰਦ ਲੈਣਾ ਚਾਹੀਦਾ ਹੈ। ਅਫਰੀਦੀ ਨੇ ਕਿਹਾ ਕਿ ਮੈਨੂੰ ਲੱਗਦਾ ਹੈ ਕਿ ਵਿਰਾਟ ਨੂੰ ਕਪਤਾਨੀ ਛੱਡਣੀ ਚਾਹੀਦੀ ਹੈ ਅਤੇ ਆਪਣੀ ਬਾਕੀ ਦੀ ਕ੍ਰਿਕਟ ਦਾ ਆਨੰਦ ਲੈਣਾ ਚਾਹੀਦਾ ਹੈ ਅਤੇ ਮੈਨੂੰ ਲੱਗਦਾ ਹੈ ਕਿ ਉਸ ਕੋਲ ਅਜੇ ਕਾਫੀ ਕ੍ਰਿਕਟ ਬਾਕੀ ਹੈ। ਉਹ ਚੋਟੀ ਦੇ ਦਰਜੇ ਦਾ ਬੱਲੇਬਾਜ਼ ਹੈ ਅਤੇ ਉਹ ਬਿਨਾਂ ਕਿਸੇ ਦਬਾਅ ਦੇ ‘ਮੁਕਤ’ ਖੇਡ ਸਕਦਾ ਹੈ। ਉਹ ਆਪਣੀ ਕ੍ਰਿਕਟ ਦਾ ਆਨੰਦ ਮਾਣੇਗਾ।