19 ਨਵੰਬਰ 2024: ਪਿਛਲੇ ਕੁਝ ਦਿਨਾਂ ਤੋਂ ਸਰਹੱਦ ‘ਤੇ ਪਾਕਿਸਤਾਨ (pakistan) ਤੋਂ ਨਸ਼ੀਲੇ ਪਦਾਰਥਾਂ ਨੂੰ ਉਸੇ ਥਾਂ ‘ਤੇ ਭੇਜਣ ਦਾ ਸਿਲਸਿਲਾ ਹਜੇ ਤੱਕ ਜਾਰੀ ਹੈ। ਅੱਜ ਇੱਕ ਵਾਰ ਫਿਰ ਪੁਲਿਸ ਦੀ ਖੁਫ਼ੀਆ ਏਜੰਸੀ ਨੇ ਉਸੇ ਥਾਂ ਤੋਂ ਦੋ ਪੈਕੇਟ ਹੈਰੋਇਨ (heroine) ਬਰਾਮਦ ਕੀਤੀ ਹੈ, ਜਿਸ ਦਾ ਵਜ਼ਨ ਇੱਕ ਕਿੱਲੋ ਦੇ ਕਰੀਬ ਦੱਸਿਆ ਜਾ ਰਿਹਾ ਹੈ।
ਜਾਣਕਾਰੀ ਅਨੁਸਾਰ ਬਮਿਆਲ ਸੈਕਟਰ ਅਧੀਨ ਪੈਂਦੇ ਪਿੰਡ ਅਖਵਾੜਾ ਦਾ ਉਹ ਸਥਾਨ, ਜਿੱਥੋਂ ਪਾਕਿਸਤਾਨ ਵੱਲੋਂ ਪਿਛਲੇ ਸੱਤ ਦਿਨਾਂ ਤੋਂ ਲਗਾਤਾਰ ਡਰੋਨ ਰਾਹੀਂ ਹੈਰੋਇਨ ਦੀ ਖੇਪ ਸੁੱਟੀ ਜਾ ਰਹੀ ਸੀ। ਹਾਲਾਂਕਿ ਕੁਦਰਤੀ ਤੌਰ ‘ਤੇ ਪਿੰਡ ਦੇ ਨੌਜਵਾਨਾਂ ਨੂੰ ਇਹ ਖੇਪ ਮਿਲ ਗਈ ਅਤੇ ਤੁਰੰਤ ਸੀਮਾ ਸੁਰੱਖਿਆ ਬਲ ਨੂੰ ਸੂਚਨਾ ਦਿੱਤੀ। ਅੱਜ ਇੱਕ ਵਾਰ ਫਿਰ ਪੰਜਾਬ ਪੁਲਿਸ ਨੂੰ ਸ਼ੱਕ ਹੈ ਕਿ ਸ਼ਾਇਦ ਹੈਰੋਇਨ ਦੀ ਕੋਈ ਖੇਪ ਉਸੇ ਥਾਂ ਤੇ ਉਸੇ ਸਮੇਂ ਭੇਜੀ ਜਾਵੇਗੀ। ਇਸ ’ਤੇ ਪੰਜਾਬ ਪੁਲਿਸ ਦੀ ਖੁਫ਼ੀਆ ਟੀਮ ਨੇ ਵਿਸ਼ੇਸ਼ ਤੌਰ ’ਤੇ ਨਾਕਾਬੰਦੀ ਕਰਕੇ ਤਲਾਸ਼ੀ ਮੁਹਿੰਮ ਵੀ ਚਲਾਈ। ਇਸ ਕਾਰਵਾਈ ਦੌਰਾਨ ਦੇਰ ਸ਼ਾਮ ਖੁਫੀਆ ਏਜੰਸੀ ਨੂੰ ਕਮਾਦ ਦੇ ਖੇਤਾਂ ਨੇੜੇ ਹੈਰੋਇਨ ਦੇ ਦੋ ਪੈਕੇਟ ਮਿਲੇ, ਜਿਨ੍ਹਾਂ ‘ਚੋਂ ਇਕ ਬੈਗ ‘ਚ ਪੈਕ ਕੀਤਾ ਹੋਇਆ ਸੀ ਅਤੇ ਦੂਜਾ ਕਰੀਬ 15 ਫੁੱਟ ਦੀ ਦੂਰੀ ‘ਤੇ ਪਿਆ ਸੀ। ਪੰਜਾਬ ਪੁਲਿਸ ਨੇ ਮੌਕੇ ‘ਤੇ ਪਹੁੰਚ ਕੇ ਦੋਵੇਂ ਪੈਕਟਾਂ ਨੂੰ ਆਪਣੇ ਕਬਜ਼ੇ ‘ਚ ਲੈ ਲਿਆ। ਇਸ ਖੇਤਰ ਵਿੱਚ ਹੈਰੋਇਨ ਦੇ ਪੈਕਟਾਂ ਦੀ ਲਗਾਤਾਰ ਬਰਾਮਦਗੀ ਕਈ ਸਵਾਲ ਖੜ੍ਹੇ ਕਰ ਰਹੀ ਹੈ।