ਚੰਡੀਗੜ੍ਹ, 22 ਨਵੰਬਰ 2023: ਉੱਤਰਾਖੰਡ ਦੇ ਉੱਤਰਕਾਸ਼ੀ (Uttarkashi) ਦੀ ਸਿਲਕਿਆਰਾ ਸੁਰੰਗ ਵਿੱਚ ਫਸੇ 41 ਮਜ਼ਦੂਰਾਂ ਦੇ ਜਲਦੀ ਬਾਹਰ ਨਿਕਲਣ ਦੀ ਉਮੀਦ ਹੈ। ਅਮਰੀਕੀ ਔਗਰ ਮਸ਼ੀਨ ਨੇ ਸੁਰੰਗ ਦੇ ਪ੍ਰਵੇਸ਼ ਬਿੰਦੂ ਤੋਂ ਲਗਭਗ 45 ਮੀਟਰ ਤੱਕ 800 ਮਿਲੀਮੀਟਰ (ਲਗਭਗ 32 ਇੰਚ) ਪਾਈਪ ਨੂੰ ਡ੍ਰਿਲ ਕੀਤਾ ਹੈ। ਹੁਣ ਕਰੀਬ 12 ਮੀਟਰ ਡਰਿਲਿੰਗ ਬਾਕੀ ਹੈ।
ਡ੍ਰਿਲਿੰਗ ਅੱਜ ਰਾਤ ਜਾਂ ਕੱਲ੍ਹ ਸਵੇਰ ਤੱਕ ਪੂਰੀ ਹੋਣ ਦੀ ਉਮੀਦ ਹੈ। ਇਸ ਦੌਰਾਨ 6 ਇੰਚ ਦੀ ਪਾਈਪਲਾਈਨ ਰਾਹੀਂ ਮਜ਼ਦੂਰਾਂ ਨੂੰ ਦੁਪਹਿਰ ਦਾ ਖਾਣਾ ਭੇਜਿਆ ਗਿਆ ਹੈ। ਉਨ੍ਹਾਂ ਨੂੰ ਦਾਲ, ਚਾਵਲ, ਸਬਜ਼ੀ ਅਤੇ ਰੋਟੀ ਭੇਜੀ ਗਈ। ਉੱਤਰਾਖੰਡ ਦੇ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਵੀ ਰਾਹਤ ਅਤੇ ਬਚਾਅ ਕਾਰਜਾਂ ਦਾ ਜਾਇਜ਼ਾ ਲੈਣ ਲਈ ਉੱਤਰਕਾਸ਼ੀ ਪਹੁੰਚ ਰਹੇ ਹਨ।
ਡ੍ਰਿਲੰਗ ਦਾ ਕੰਮ ਪੂਰਾ ਹੋਣ ਤੋਂ ਬਾਅਦ, ਐੱਨ.ਡੀ.ਆਰ.ਐੱਫ ਦੀ ਟੀਮ 32 ਇੰਚ ਦੀ ਪਾਈਪ ਰਾਹੀਂ ਸੁਰੰਗ ਦੇ ਅੰਦਰ ਜਾਵੇਗੀ ਅਤੇ ਮਜ਼ਦੂਰਾਂ ਨੂੰ ਇੱਕ-ਇੱਕ ਕਰਕੇ ਬਾਹਰ ਕੱਢੇਗੀ। ਜੇਕਰ ਕਰਮਚਾਰੀ ਕਮਜ਼ੋਰ ਮਹਿਸੂਸ ਕਰਦੇ ਹਨ, ਤਾਂ ਐੱਨ.ਡੀ.ਆਰ.ਐੱਫ ਟੀਮ ਨੇ ਸਕੇਟਾਂ ਨਾਲ ਫਿੱਟ ਆਰਜ਼ੀ ਟਰਾਲੀ ਦੀ ਵਰਤੋਂ ਕਰਕੇ ਉਨ੍ਹਾਂ ਨੂੰ ਬਾਹਰ ਕੱਢਣ ਦੀ ਤਿਆਰੀ ਕਰ ਲਈ ਹੈ।
ਸਥਿਤੀ ਨੂੰ ਬਚਾਅ ਕਾਰਜ ਦੇ ਨੇੜੇ ਆਉਂਦੇ ਦੇਖ ਉੱਤਰਾਖੰਡ ਪ੍ਰਸ਼ਾਸਨ ਨੇ 40 ਐਂਬੂਲੈਂਸਾਂ ਨੂੰ ਮੌਕੇ ‘ਤੇ ਬੁਲਾਇਆ ਹੈ। (Uttarkashi) ਦੀ ਸਿਲਕਿਆਰਾ ਸੁਰੰਗ ਵਾਲੀ ਥਾਂ ‘ਤੇ ਇੱਕ ਅਸਥਾਈ ਹਸਪਤਾਲ ਵੀ ਬਣਾਇਆ ਗਿਆ ਹੈ, ਜਿੱਥੇ ਸਾਰਿਆਂ ਦੀ ਜਾਂਚ ਕੀਤੀ ਜਾਵੇਗੀ। ਚਿਲਿਆਨਸੌਰ, ਉੱਤਰਕਾਸ਼ੀ ਅਤੇ ਏਮਜ਼ ਰਿਸ਼ੀਕੇਸ਼ ਨੂੰ ਅਲਰਟ ਮੋਡ ‘ਤੇ ਰੱਖਿਆ ਗਿਆ ਹੈ। ਵਰਕਰਾਂ ਨੂੰ ਏਅਰਲਿਫਟ ਕਰਨ ਦਾ ਵੀ ਪ੍ਰਬੰਧ ਕੀਤਾ ਗਿਆ ਹੈ।