ਮੈਲਬੌਰਨ, 16 ਜਨਵਰੀ 2024: ਮੈਲਬੌਰਨ (Melbourne) ‘ਚ ਆਪਣੇ ਦੋਸਤਾਂ ਨਾਲ ਬੀਚ ‘ਤੇ ਛੁੱਟੀ ਮਨਾਉਣ ਗਏ 27 ਸਾਲਾ ਸਾਹਿਲ ਦੀ ਸਮੁੰਦਰ ‘ਚ ਡੁੱਬਣ ਕਾਰਨ ਮੌਤ ਹੋ ਗਈ | ਮ੍ਰਿਤਕ ਨੌਜਵਾਨ ਕ੍ਰੈਨਬੋਰਨ ਈਸਟ (Cranbourne East) ਦਾ ਰਹਿਣ ਵਾਲਾ ਸੀ | ਪ੍ਰਾਪਤ ਜਾਣਕਾਰੀ ਮੁਤਾਬਕ ਹਰਿਆਣਾ ਦੇ ਕਰਨਾਲ (ਪਿੰਡ ਕੈਮਲਾ) ਦਾ ਨੌਜਵਾਨ ਸਾਹਿਲ 12 ਜਨਵਰੀ ਨੂੰ ਆਪਣੇ ਦੋਸਤਾਂ ਨਾਲ ਵਿਕਟੋਰੀਆ ਦੇ ਕਿਲਕੁੰਡਾ ਸਰਫ ਬੀਚ (Kilcunda Surf Beach) ‘ਤੇ ਗਿਆ ਸੀ। ਇਸਤੋਂ ਬਾਅਦ ਜਦੋਂ ਸਾਰੇ ਦੋਸਤ ਵਾਪਸ ਘਰ ਮੁੜਨ ਹੀ ਲੱਗੇ ਤਾਂ ਸਾਹਿਲ ਦਾ ਚਮਸ਼ਾ ਪਾਣੀ ‘ਚ ਡਿੱਗ ਗਿਆ, ਜਿਵੇਂ ਹੀ ਉਸ ਨੇ ਝੁਕ ਕੇ ਚਸ਼ਮਾ ਚੁੱਕਣ ਦੀ ਕੋਸ਼ਿਸ਼ ਤਾਂ ਪਾਣੀ ਦੀ ਤੇਜ਼ ਲਹਿਰ ਆਈ ਅਤੇ ਸਾਹਿਲ ਨੂੰ ਆਪਣੇ ਨਾਲ ਸਮੁੰਦਰ ਦੀ ਡੂੰਘਾਈ ‘ਚ ਖਿੱਚ ਕੇ ਲੈ ਗਈ।
ਇਸ ਦੌਰਾਨ ਦੋਸਤਾਂ ਨੇ ਸਾਹਿਲ ਨੂੰ ਬਚਾਉਣ ਦੀ ਹਰ ਸੰਭਵ ਕੋਸ਼ਿਸ਼ ਕੀਤੀ ਪਰ ਉਸ ਦਾ ਕੋਈ ਸੁਰਾਗ ਨਹੀਂ ਮਿਲਿਆ। ਧੁੰਦ ਅਤੇ ਹਨ੍ਹੇਰਾ ਇੰਨਾ ਜ਼ਿਆਦਾ ਸੀ ਕਿ ਸਾਹਿਲ ਦਾ ਕੁਝ ਪਤਾ ਨਹੀਂ ਲੱਗ ਸਕਿਆ । ਕੁਝ ਘੰਟਿਆਂ ਬਾਅਦ ਉਸ ਦੀ ਲਾਸ਼ ਬਾਸ ਕੋਸਟ (Bass Coast) ਤੋਂ ਬਰਾਮਦ ਕੀਤੀ ਗਈ। ਦੱਸਿਆ ਜਾ ਰਿਹਾ ਹੈ ਕਿ ਚਾਰ ਸਾਲ ਪਹਿਲਾਂ ਹੀ ਸਾਹਿਲ ਨਾਲ ਵਿਆਹੀ ਅੰਨੂ (28) ਉਸ ਨਾਲ ਉਸ ਸ਼ਾਮ ਬੀਮਾਰ ਹੋਣ ਕਰਕੇ ਨਹੀਂ ਜਾ ਸਕੀ ਸੀ| ਜਦੋਂ ਬਿਨਾਂ ਸਾਹਿਲ ਤੋਂ ਬਾਕੀ ਦੋਸਤ ਉਸਦੇ ਘਰ ਪਰਤੇ ਅਤੇ ਅੰਨੂ ਨੂੰ ਸਾਰੀ ਗੱਲ ਦੱਸੀ, ਤਾਂ ਉਨ੍ਹਾਂ ਨੂੰ ਗਹਿਰਾ ਸਦਮਾ ਲੱਗਾ |
ਗੌਰਵ ਦੇ ਮੁਤਾਬਕ ਅਜੇ 5 ਮਹੀਨੇ ਪਹਿਲਾਂ ਹੀ ਉਸ ਨੂੰ ਪਰਮਾਨੈਂਟ ਰੈਜ਼ੀਡੈਂਸੀ (ਪੀ.ਆਰ.) ਮਿਲੀ ਸੀ। ਸਾਲ 2020 ‘ਚ ਉਸ ਦਾ ਪਾਣੀਪਤ ਦੇ ਇੱਕ ਪਿੰਡ ਦੀ ਅਨੂੰ ਨਾਲ ਵਿਆਹ ਹੋਇਆ ਸੀ। ਵਿਆਹ ਤੋਂ ਬਾਅਦ ਉਹ ਕੋਵਿਡ ਦਰਮਿਆਨ ਆਸਟ੍ਰੇਲੀਆ ਨਾ ਆ ਸਕੀ, ਪਰ 2022 ‘ਚ ਸਾਹਿਲ, ਅਨੂੰ ਨੂੰ ਵੀ ਆਪਣੇ ਨਾਲ ਆਸਟ੍ਰੇਲੀਆ ਲੈ ਕੇ ਆ ਗਿਆ ਸੀ ਅਤੇ ਅਜੇ ਤਿੰਨ ਮਹੀਨੇ ਪਹਿਲਾਂ ਹੀ ਉਹਨਾਂ ਨੇ ਆਪਣਾ ਘਰ ਖਰੀਦਿਆ ਸੀ। ਸਾਹਿਲ ਕੈਬਿਨੇਟ ਮੇਕਰ ਦਾ ਕੰਮ ਕਰਦਾ ਸੀ ਅਤੇ ਭਾਰਤ ਵਿਚਲੇ ਆਪਣੇ ਘਰ ਦਾ ਬਹੁਤਾ ਖਰਚ ਵੀ ਖੁਦ ਹੀ ਚੁੱਕਦਾ ਸੀ।
ਅੰਨੂ ਦੀ ਹਾਲਤ ਠੀਕ ਨਾ ਵੇਖ ਕੇ ਦੋਸਤਾਂ ਨੇ ਖੁਦ ਉਸ ਨੂੰ ਅਗਲੇ ਦਿਨ ਦੀ ਭਾਰਤ ਦੀ ਟਿਕਟ ਕਰਕੇ ਨਾਲ ਲੈ ਆਏ । ਪਰ ਹੁਣ ਸਾਹਿਲ ਦੀ ਮ੍ਰਿਤਕ ਦੇਹ ਲੈ ਕੇ ਜਾਣ ਅਤੇ ਪਰਿਵਾਰ ਨੂੰ ਥੋੜ੍ਹੀ ਬਹੁਤ ਮਾਲੀ ਮੱਦਦ ਖਾਤਰ ਇੱਕ ਡੋਨੇਸ਼ਨ ਪੇਜ ਸ਼ੁਰੂ ਕੀਤਾ ਗਿਆ ਹੈ | ਸਾਹਿਲ ਦੇ ਮਾਂ ਪਿਓ ਅਤੇ ਭੈਣਾਂ ਆਪਣੇ ਲਾਡਲੇ ਦੀ ਉਡੀਕ ਕਰ ਰਹੇ ਹਨ।