ਚੰਡੀਗੜ੍ਹ 09 ਫਰਵਰੀ 2022: ਭਾਰਤੀ ਪੁਲਾੜ ਖੋਜ ਸੰਗਠਨ (ISRO) ਦਾ 2022 ਦਾ ਪਹਿਲਾ ਮਿਸ਼ਨ 14 ਫਰਵਰੀ ਨੂੰ ਸ਼ੁਰੂ ਹੋਣ ਜਾ ਰਿਹਾ ਹੈ ਅਤੇ ਧਰਤੀ ਨਿਰੀਖਣ ਉਪਗ੍ਰਹਿ eos-04 ਨੂੰ PSLV-C52 ਦੁਆਰਾ ਧਰੁਵੀ ਔਰਬਿਟ ‘ਚ ਰੱਖਿਆ ਜਾਵੇਗਾ। ਦੱਸਿਆ ਜਾ ਰਿਹਾ ਹੈ ਕਿ ਪੋਲਰ ਸੈਟੇਲਾਈਟ ਲਾਂਚ ਵਹੀਕਲ (PSLV-C52) ਨੂੰ ਸੋਮਵਾਰ ਨੂੰ ਸ਼੍ਰੀਹਰੀਕੋਟਾ ਸਥਿਤ ਸਤੀਸ਼ ਧਵਨ ਸਪੇਸ ਸੈਂਟਰ ਦੇ ਪਹਿਲੇ ‘ਲਾਂਚ ਪੈਡ’ ਤੋਂ ਸਵੇਰੇ 5:59 ਵਜੇ ਲਾਂਚ ਕੀਤਾ ਜਾਵੇਗਾ, ਇਸ ਸੰਬੰਧੀ ਜਾਣਕਾਰੀ ਬੈਂਗਲੁਰੂ ‘ਚ ਇਸਰੋ ਹੈੱਡਕੁਆਰਟਰ ਦੁਆਰਾ ਦਿੱਤੀ ਗਈ ਹੈ ।

ਇਸ ਦੌਰਾਨ ਇਸਰੋ (ISRO) ਨੇ ਕਿਹਾ ਕਿ ਪੀਐਸਐਲਵੀ-ਸੀ52 ਨੂੰ 1,710 ਕਿਲੋਗ੍ਰਾਮ ਈਓਐਸ-04 ਉਪਗ੍ਰਹਿ ਨੂੰ 529 ਕਿਲੋਮੀਟਰ ਸੂਰਜ ਦੇ ਸਮਕਾਲੀ ਧਰੁਵੀ ਔਰਬਿਟ ਵਿੱਚ ਰੱਖਣ ਲਈ ਤਿਆਰ ਕੀਤਾ ਗਿਆ ਹੈ। PSLV-C52 ਮਿਸ਼ਨ ਵਿੱਚ ਦੋ ਹੋਰ ਛੋਟੇ ਉਪਗ੍ਰਹਿ ਸਥਾਪਿਤ ਕੀਤੇ ਜਾਣਗੇ। eos-04 ਇੱਕ ਰਾਡਾਰ ਇਮੇਜਿੰਗ ਸੈਟੇਲਾਈਟ ਹੈ ਜੋ ਖੇਤੀਬਾੜੀ, ਬਨਸਪਤੀ, ਮਿੱਟੀ ਦੀ ਨਮੀ ਅਤੇ ਹੋਰ ਬਹੁਤ ਕੁਝ ਦੀਆਂ ਉੱਚ ਗੁਣਵੱਤਾ ਵਾਲੀਆਂ ਹਰ ਮੌਸਮ ਦੀਆਂ ਤਸਵੀਰਾਂ ਭੇਜੇਗਾ।