ਚੰਡੀਗੜ੍ਹ, 10 ਅਗਸਤ 2023: ਗੂਗਲ ਨੇ ਆਪਣੇ ਪਲੇ ਸਟੋਰ (Play Store) ਤੋਂ 43 ਮੋਬਾਈਲ ਐਪਸ ਨੂੰ ਹਟਾ ਦਿੱਤਾ ਹੈ ਜਿਨ੍ਹਾਂ ਵਿੱਚ ਮਾਲਵੇਅਰ ਜਾਂ ਵਾਇਰਸ ਸਨ। ਇਨ੍ਹਾਂ ਐਪਸ ਨੂੰ ਕੁੱਲ 2.5 ਮਿਲੀਅਨ ਵਾਰ ਡਾਊਨਲੋਡ ਕੀਤਾ ਗਿਆ ਸੀ। ਇਨ੍ਹਾਂ ਐਪਸ ‘ਤੇ ਗੂਗਲ ਪਲੇ ਡਿਵੈਲਪਰ ਪਾਲਿਸੀ ਦੀ ਉਲੰਘਣਾ ਕਰਨ ਦਾ ਵੀ ਦੋਸ਼ ਹੈ। ਇਹ ਐਪਸ ਫੋਨ ਦੀ ਸਕਰੀਨ ਬੰਦ ਹੋਣ ਤੋਂ ਬਾਅਦ ਵੀ ਵਿਗਿਆਪਨ ਦਿਖਾ ਰਹੇ ਸਨ।
McAfee ਨੇ ਆਪਣੀ ਰਿਪੋਰਟ ‘ਚ ਇਨ੍ਹਾਂ ਐਪਸ ਬਾਰੇ ਜਾਣਕਾਰੀ ਦਿੱਤੀ ਹੈ। ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਫੋਨ ਦੀ ਸਕਰੀਨ ‘ਤੇ ਇਸ਼ਤਿਹਾਰ ਦਿਖਾਉਣ ਨਾਲ ਬੈਟਰੀ ਤੇਜ਼ੀ ਨਾਲ ਖਤਮ ਹੋ ਜਾਂਦੀ ਹੈ ਅਤੇ ਯੂਜ਼ਰਸ ਨੂੰ ਵੀ ਪਰੇਸ਼ਾਨੀ ਹੁੰਦੀ ਹੈ। ਇਸ ਤੋਂ ਇਲਾਵਾ ਡਾਟਾ ਲੀਕ ਹੋਣ ਦਾ ਵੀ ਖਤਰਾ ਹੈ।
ਪਲੇ ਸਟੋਰ (Play Store) ਤੋਂ ਹਟਾਏ ਗਏ 43 ਐਪਸ ਵਿੱਚ ਟੀਵੀ/ਡੀਐਮਬੀ ਪਲੇਅਰ, ਗੀਤ ਡਾਊਨਲੋਡਰ ਅਤੇ ਨਿਊਜ਼ ਅਤੇ ਕੈਲੰਡਰ ਐਪਸ ਸ਼ਾਮਲ ਹਨ। ਜ਼ਿਆਦਾਤਰ ਐਪਸ ਮੀਡੀਆ ਸਟ੍ਰੀਮਿੰਗ ਹਨ। ਇਨ੍ਹਾਂ ਐਪਾਂ ‘ਤੇ ਧੋਖਾਧੜੀ ਦੀਆਂ ਗਤੀਵਿਧੀਆਂ ‘ਚ ਸ਼ਾਮਲ ਹੋਣ ਦਾ ਵੀ ਦੋਸ਼ ਹੈ।
ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਇਨ੍ਹਾਂ ਐਪਸ ਦੀ ਮੱਦਦ ਨਾਲ ਯੂਜ਼ਰ ਦੇ ਫੋਨ ਨੂੰ ਦੂਰ ਬੈਠ ਕੇ ਵੀ ਕੰਟਰੋਲ ਕੀਤਾ ਜਾ ਸਕਦਾ ਸੀ। ਇਹ ਐਪਸ ਲੋਕਾਂ ਦੇ ਸੰਦੇਸ਼ਾਂ ਨੂੰ ਪੜ੍ਹਨ ਅਤੇ ਸਟੋਰੇਜ ਦੇਖਣ ਦੇ ਯੋਗ ਵੀ ਸਨ। ਇਹ ਐਪਸ ਯੂਜ਼ਰਸ ਨੂੰ ਹੋਰ ਐਪਸ ਤੋਂ ਪਹਿਲਾਂ ਨੋਟੀਫਿਕੇਸ਼ਨ ਦਿਖਾਉਣ ਲਈ ਵੀ ਬੇਨਤੀ ਕਰਦੇ ਸਨ। ਇਨ੍ਹਾਂ ਐਪਸ ਦੀ ਵਰਤੋਂ ਬੈਂਕਿੰਗ ਧੋਖਾਧੜੀ ਲਈ ਕੀਤੀ ਜਾ ਸਕਦੀ ਹੈ।
ਇਸ ਤੋਂ ਬਚਣ ਲਈ ਕੀ ਕਰਨਾ ਹੈ?
ਜੇਕਰ ਤੁਹਾਨੂੰ ਲੱਗਦਾ ਹੈ ਕਿ ਕਿਸੇ ਖਾਸ ਐਪ ਕਾਰਨ ਤੁਹਾਡੇ ਫੋਨ ਦੀ ਸਕਰੀਨ ਵਾਰ-ਵਾਰ ਆਨ ਹੋ ਰਹੀ ਹੈ, ਤਾਂ ਸੈਟਿੰਗਜ਼ ਚੈੱਕ ਕਰੋ। ਜੇਕਰ ਸੰਭਵ ਹੋਵੇ ਤਾਂ ਉਸ ਐਪ ਨੂੰ ਮਿਟਾਓ। ਬੈਕਗ੍ਰਾਊਂਡ ਐਪ ਰਿਫ੍ਰੈਸ਼ ਨੂੰ ਵੀ ਬੰਦ ਕਰੋ। ਇਸ ਦਾ ਫਾਇਦਾ ਇਹ ਹੋਵੇਗਾ ਕਿ ਸਕਰੀਨ ਬੰਦ ਹੋਣ ਤੋਂ ਬਾਅਦ ਕੋਈ ਵੀ ਐਪ ਬੈਕਗ੍ਰਾਊਂਡ ‘ਚ ਨਹੀਂ ਚੱਲੇਗਾ ਅਤੇ ਤੁਹਾਡੇ ਫੋਨ ਦੀ ਬੈਟਰੀ ਲਾਈਫ ਵੀ ਬਿਹਤਰ ਹੋਵੇਗੀ। ਇਸ ਤੋਂ ਇਲਾਵਾ ਕਿਸੇ ਵੀ ਐਪ ਨੂੰ ਡਾਊਨਲੋਡ ਕਰਨ ਤੋਂ ਪਹਿਲਾਂ ਪਲੇ ਸਟੋਰ ‘ਤੇ ਉਸ ਦੀ ਸਮੀਖਿਆ ਜ਼ਰੂਰ ਦੇਖੋ।