ਚੰਡੀਗੜ੍ਹ, 30 ਮਈ 2024: ਹਰਿਆਣਾ (Haryana) ਵਿੱਚ ਲੋਕ ਸਭਾ ਆਮ ਚੋਣਾਂ-2024 ਵਿੱਚ ਇੱਕ ਨਵਾਂ ਰਿਕਾਰਡ ਬਣਿਆ ਹੈ। 20 ਸਾਲਾਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ ਸੂਬੇ ‘ਚ ਕਿਤੇ ਵੀ ਮੁੜ ਵੋਟਾਂ ਨਹੀਂ ਪਈਆਂ ਹਨ। ਸੂਬੇ ਵਿੱਚ ਨਿਰਪੱਖ ਅਤੇ ਪਾਰਦਰਸ਼ੀ ਢੰਗ ਨਾਲ ਵੋਟਿੰਗ ਕਰਵਾਈ ਗਈ ਹੈ ਅਤੇ ਭਾਰਤੀ ਚੋਣ ਕਮਿਸ਼ਨ ਨੇ ਵੀ ਇਸ ਦੀ ਸ਼ਲਾਘਾ ਕੀਤੀ ਹੈ।
ਮੁੱਖ ਚੋਣ ਅਧਿਕਾਰੀ ਅਨੁਰਾਗ ਅਗਰਵਾਲ ਨੇ ਕਿਹਾ ਕਿ 2004 ਤੋਂ 2019 ਤੱਕ ਲੋਕ ਸਭਾ ਚੋਣਾਂ ਦੀ ਕਹਾਣੀ ਇਹ ਰਹੀ ਹੈ ਕਿ ਹਰ ਵਾਰ ਕਿਸੇ ਨਾ ਕਿਸੇ ਮੌਕੇ ‘ਤੇ ਮੁੜ ਪੋਲਿੰਗ ਹੋਈ ਹੈ। ਉਨ੍ਹਾਂ ਵਿਸਤ੍ਰਿਤ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ 2004 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਹਰਿਆਣਾ (Haryana) ਵਿੱਚ ਅੰਬਾਲਾ, ਕੁਰੂਕਸ਼ੇਤਰ, ਸੋਨੀਪਤ, ਫਰੀਦਾਬਾਦ ਅਤੇ ਭਿਵਾਨੀ ਲੋਕ ਸਭਾ ਹਲਕਿਆਂ ਦੇ ਕੁੱਲ 11 ਪੋਲਿੰਗ ਸਟੇਸ਼ਨਾਂ ‘ਤੇ 12 ਮਈ 2004 ਨੂੰ ਮੁੜ ਪੋਲਿੰਗ ਹੋਈ ਸੀ। ਇਸੇ ਤਰ੍ਹਾਂ 2009 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਸਿਰਸਾ ਲੋਕ ਸਭਾ ਹਲਕੇ ਦੇ ਇੱਕ ਪੋਲਿੰਗ ਸਟੇਸ਼ਨ ’ਤੇ 13 ਮਈ 2009 ਨੂੰ ਮੁੜ ਪੋਲਿੰਗ ਹੋਈ ਸੀ।
ਉਨ੍ਹਾਂ ਦੱਸਿਆ ਕਿ 2014 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਗੁੜਗਾਓਂ ਲੋਕ ਸਭਾ ਹਲਕੇ ਦੇ ਕੁੱਲ 8 ਪੋਲਿੰਗ ਸਟੇਸ਼ਨਾਂ ‘ਤੇ 15 ਮਈ 2014 ਨੂੰ ਮੁੜ ਪੋਲਿੰਗ ਹੋਈ ਸੀ, ਜਦਕਿ 2019 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਇਕ ਪੋਲਿੰਗ ਸਟੇਸ਼ਨ ‘ਤੇ ਮੁੜ ਪੋਲਿੰਗ ਹੋਈ ਸੀ | ਫਰੀਦਾਬਾਦ ਲੋਕ ਸਭਾ ਹਲਕੇ ਵਿੱਚ 19 ਮਈ, 2019 ਨੂੰ ਪੋਲਿੰਗ ਸਟੇਸ਼ਨ ‘ਤੇ ਮੁੜ ਪੋਲਿੰਗ ਹੋਈ ਸੀ |
ਇਸ ਵਾਰ 2024 ਦੀਆਂ ਚੋਣਾਂ ਵਿੱਚ ਕਿਤੇ ਵੀ ਮੁੜ ਪੋਲਿੰਗ ਦੀ ਲੋੜ ਨਹੀਂ ਹੋਈ, ਇਸ ਲਈ ਵੋਟਿੰਗ ਪ੍ਰਕਿਰਿਆ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣ ਲਈ ਸਮੂਹ ਅਧਿਕਾਰੀ, ਕਰਮਚਾਰੀ ਅਤੇ ਹੋਰ ਸਟਾਫ ਸ਼ਲਾਘਾ ਦਾ ਹੱਕਦਾਰ ਹੈ।