ਚੰਡੀਗੜ੍ਹ 08 ਫਰਵਰੀ 2022: ਭਾਰਤੀ ਬੈਡਮਿੰਟਨ ਸਟਾਰ ਪੀਵੀ ਸਿੰਧੂ (PV Sindhu) ਅਤੇ ਦੋ ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਤੇ ਟੋਕੀਓ ਓਲੰਪਿਕ ਦੀ ਚਾਂਦੀ ਦਾ ਤਗਮਾ ਜੇਤੂ ਵੇਟਲਿਫਟਰ ਮੀਰਾਬਾਈ ਚਾਨੂ (Mirabai Chanu) ਬੀਬੀਸੀ ਭਾਰਤੀ ਮਹਿਲਾ ਸਪੋਰਟਸਪਰਸਨ ਆਫ ਦਿ ਈਅਰ ਅਵਾਰਡ ਦੀ ਦੌੜ ‘ਚ ਹਨ। ਇਸ ਸੰਬੰਧੀ ਮੰਗਲਵਾਰ ਨੂੰ ਨਾਮਜ਼ਦਗੀਆਂ ਦਾ ਐਲਾਨ ਕੀਤਾ ਗਿਆ। ਪੀਵੀ ਸਿੰਧੂ ਅਤੇ ਮੀਰਾਬਾਈ ਚਾਨੂ (Mirabai Chanu) ਤੋਂ ਇਲਾਵਾ ਗੋਲਫਰ ਅਦਿਤੀ ਅਸ਼ੋਕ, ਟੋਕੀਓ ਪੈਰਾਲੰਪਿਕ ਮਲਟੀਪਲ ਮੈਡਲ ਜੇਤੂ ਨਿਸ਼ਾਨੇਬਾਜ਼ ਅਵਨੀ ਲੇਖਰਾ ਅਤੇ ਟੋਕੀਓ ਓਲੰਪਿਕ ਦੀ ਕਾਂਸੀ ਤਮਗਾ ਜੇਤੂ ਮੁੱਕੇਬਾਜ਼ ਲਵਲੀਨਾ ਬੋਰਗੋਹੇਨ ਵੀ ਦੌੜ ਵਿੱਚ ਹਨ।
ਇਸ ਦੌਰਾਨ ਜਾਰੀ ਇਕ ਬਿਆਨ ‘ਚ ਪੀਵੀ ਸਿੰਧੂ (PV Sindhu) ਨੇ ਕਿਹਾ ਕਿ ਸਫਲਤਾ ਆਸਾਨੀ ਨਾਲ ਨਹੀਂ ਮਿਲਦੀ। ਇਹ ਕੁਝ ਮਹੀਨਿਆਂ ਦੀ ਮਿਹਨਤ ਦਾ ਨਹੀਂ ਸਗੋਂ ਸਾਲਾਂ ਦੀ ਮਿਹਨਤ ਦਾ ਨਤੀਜਾ ਹੈ। ਹਰ ਰੋਜ਼ ਇੱਕ ਪ੍ਰਕਿਰਿਆ ਵਿੱਚੋਂ ਲੰਘ ਕੇ, ਤੁਸੀਂ ਇੱਕ ਬਿੰਦੂ ਤੇ ਪਹੁੰਚਦੇ ਹੋ। ਪੁਰਸਕਾਰ ਲਈ ਆਨਲਾਈਨ ਵੋਟਿੰਗ 28 ਫਰਵਰੀ ਤੱਕ ਖੁੱਲ੍ਹੀ ਹੈ। ਜੇਤੂ ਦਾ ਐਲਾਨ 28 ਮਾਰਚ ਨੂੰ ਕੀਤਾ ਜਾਵੇਗਾ। ਅਵਾਰਡ ਸਮਾਰੋਹ ਵਿੱਚ, ਬੀਬੀਸੀ ਲਾਈਫਟਾਈਮ ਅਚੀਵਮੈਂਟ ਅਵਾਰਡ ਇੱਕ ਅਨੁਭਵੀ ਮਹਿਲਾ ਖਿਡਾਰੀ ਨੂੰ ਦਿੱਤਾ ਜਾਵੇਗਾ, ਜਦੋਂ ਕਿ ਇੱਕ ਉੱਭਰਦੀ ਮਹਿਲਾ ਖਿਡਾਰਨ ਨੂੰ ਰਾਈਜ਼ਿੰਗ ਪਲੇਅਰ ਅਵਾਰਡ ਦਿੱਤਾ ਜਾਵੇਗਾ।
