ਚੰਡੀਗੜ੍ਹ 02 ਸਤੰਬਰ 2022: ਇਸ ਵੇਲੇ ਦੀ ਸਭ ਤੋਂ ਵੱਡੀ ਖ਼ਬਰ ਅਫਗਾਨਿਸਤਾਨ (Afghanistan) ਤੋਂ ਸਾਹਮਣੇ ਆ ਰਹੀ ਹੈ, ਜਿੱਥੇ ਹੇਰਾਤ ਸੂਬੇ ‘ਚ ਸ਼ੁੱਕਰਵਾਰ ਦੀ ਨਮਾਜ਼ ਦੌਰਾਨ ਜ਼ਬਰਦਸਤ ਧਮਾਕਾ ਹੋਇਆ। ਇਸ ਵਿੱਚ ਤਾਲਿਬਾਨ ਦੇ ਸਭ ਤੋਂ ਵੱਡੇ ਧਾਰਮਿਕ ਨੇਤਾਵਾਂ ਵਿੱਚੋਂ ਇੱਕ ਮੁੱਲਾ ਮੁਜੀਬ ਉਰ ਰਹਿਮਾਨ ਅੰਸਾਰੀ ਦੀ ਮੌਤ ਹੋ ਗਈ। ਇਹ ਧਮਾਕਾ ਗਜਾਰਘ ਸ਼ਹਿਰ ‘ਚ ਹੋਇਆ ਹੈ । ਪਿਛਲੇ ਮਹੀਨੇ ਵੀ ਤਾਲਿਬਾਨ (Taliban) ਦਾ ਇੱਕ ਪ੍ਰਮੁੱਖ ਨੇਤਾ ਮਾਰਿਆ ਗਿਆ ਸੀ। ਇਸ ਹਮਲੇ ਪਿੱਛੇ ISIS ਦੇ ਖੁਰਾਸਾਨ ਗਰੁੱਪ (ISKP) ਦਾ ਹੱਥ ਮੰਨਿਆ ਜਾ ਰਿਹਾ ਹੈ। ਤਾਲਿਬਾਨ ਨੇ ਅਜੇ ਤੱਕ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਹੈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਗਜ਼ਾਘਰ ਦੀ ਮਸਜਿਦ ਵਿੱਚ ਕੁੱਲ 2 ਧਮਾਕੇ ਹੋਏ ਹਨ । ਇਸ ਦੌਰਾਨ ਜੁਮੇ ਦੀ ਨਮਾਜ਼ ਚੱਲ ਰਹੀ ਸੀ। ਮੁੱਲਾ ਮੁਜੀਬ ਇਸ ਮਸਜਿਦ ਦਾ ਮੁੱਖ ਇਮਾਮ ਸੀ। ਧਮਾਕਾ ਉਸ ਦੇ ਸਾਹਮਣੇ ਕਤਾਰ ਵਿੱਚ ਹੋਇਆ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਫਿਦਾਇਨ ਹਮਲਾ ਸੀ |