ਚੰਡੀਗੜ੍ਹ 06 ਮਈ 2022: ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਵਲੋਂ ਝਾਰਖੰਡ ਦੀ ਸੀਨੀਅਰ ਆਈਏਐਸ ਅਧਿਕਾਰੀ ਪੂਜਾ ਸਿੰਘਲ ਅਤੇ ਉਸ ਦੇ ਨਜ਼ਦੀਕੀ ਵਿਅਕਤੀਆਂ ਦੇ 20 ਟਿਕਾਣਿਆਂ ‘ਤੇ ਛਾਪੇਮਾਰੀ ਕੀਤੀ ਗਈ ਹੈ | ਇਸ ਛਾਪੇਮਾਰੀ ਦੌਰਾਨ ਪੂਜਾ ਸਿੰਘਲ ਦੇ ਕਰੀਬੀ ਸੀਏ ਦੇ ਘਰੋਂ 25 ਕਰੋੜ ਰੁਪਏ ਦੀ ਨਕਦੀ ਬਰਾਮਦ ਕੀਤੇ ਹਨ |
ਇਸ ਦੌਰਾਨ ਖਬਰ ਹੈ ਕਿ ਈਡੀ ਦੇ ਅਧਿਕਾਰੀ ਨੋਟ ਗਿਣਨ ਵਾਲੀ ਮਸ਼ੀਨ ਤੋਂ ਨਕਦੀ ਦੀ ਗਿਣਤੀ ਕਰਨ ਵਿੱਚ ਲੱਗੇ ਹੋਏ ਹਨ। ਹਾਲਾਂਕਿ ਅਜੇ ਤੱਕ ਇਸ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ ਹੈ। ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਪੂਜਾ ਸਿੰਘਲ ਦੇ ਘਰ ਤੋਂ ਕਈ ਦਸਤਾਵੇਜ਼ ਅਤੇ ਅਹਿਮ ਦਸਤਾਵੇਜ਼ ਵੀ ਬਰਾਮਦ ਹੋਏ ਹਨ ।
ਇਸਦੇ ਨਾਲ ਹੀ ਈਡੀ ਦੀ ਟੀਮ ਰਾਂਚੀ ਦੇ ਪੰਚਵਟੀ ਰੈਜ਼ੀਡੈਂਸੀ ਦੇ ਬਲਾਕ ਨੰਬਰ 9, ਚਾਂਦਨੀ ਚੌਕ, ਕਾਂਕੇ ਰੋਡ, ਹਰੀਓਮ ਟਾਵਰ, ਲਾਲਪੁਰ ਦੀ ਨਵੀਂ ਇਮਾਰਤ, ਪਲਸ ਹਸਪਤਾਲ, ਬਰਿਆਤੂ ਵਿੱਚ ਛਾਪੇਮਾਰੀ ਕਰ ਰਹੀ ਹੈ। ਪਲਸ ਹਸਪਤਾਲ ਪੂਜਾ ਸਿੰਘਲ ਦੇ ਪਤੀ ਅਤੇ ਕਾਰੋਬਾਰੀ ਅਭਿਸ਼ੇਕ ਝਾਅ ਦੀ ਮਲਕੀਅਤ ਹੈ। ਈਡੀ ਦੀ ਟੀਮ ਆਈਏਐਸ ਪੂਜਾ ਸਿੰਘਲ ਦੀ ਸਰਕਾਰੀ ਰਿਹਾਇਸ਼ ‘ਤੇ ਵੀ ਪਹੁੰਚ ਗਈ ਹੈ।
ਜਿਕਰਯੋਗ ਹੈ ਕਿ ਪੂਜਾ ਸਿੰਘਲ ਝਾਰਖੰਡ ਦੀ ਸੀਨੀਅਰ ਅਧਿਕਾਰੀ ਹੈ। ਵਰਤਮਾਨ ਵਿੱਚ ਉਨ੍ਹਾਂ ਕੋਲ ਉਦਯੋਗ ਸਕੱਤਰ ਅਤੇ ਮਾਈਨਸ ਸਕੱਤਰ ਦਾ ਚਾਰਜ ਹੈ। ਇਸ ਤੋਂ ਇਲਾਵਾ ਪੂਜਾ ਸਿੰਘਲ ਝਾਰਖੰਡ ਰਾਜ ਖਣਿਜ ਵਿਕਾਸ ਨਿਗਮ (JSMDC) ਦੀ ਚੇਅਰਮੈਨ ਵੀ ਹੈ। ਇਸ ਤੋਂ ਪਹਿਲਾਂ ਵੀ ਪੂਜਾ ਸਿੰਘਲ ਭਾਜਪਾ ਸਰਕਾਰ ਵਿੱਚ ਖੇਤੀਬਾੜੀ ਸਕੱਤਰ ਦੇ ਅਹੁਦੇ ‘ਤੇ ਤਾਇਨਾਤ ਸੀ। ਮਨਰੇਗਾ ਘੁਟਾਲੇ ਵੇਲੇ ਪੂਜਾ ਖੁੰਟੀ ਵਿੱਚ ਡੀਸੀ ਵਜੋਂ ਤਾਇਨਾਤ ਸੀ।
ਤੁਹਾਨੂੰ ਦੱਸ ਦਈਏ ਕਿ ਆਈਏਐਸ ਪੂਜਾ ਸਿੰਘਲ ਨੂੰ ਚਤਰਾ, ਖੁੰਟੀ ਅਤੇ ਪਲਾਮੂ ਜ਼ਿਲ੍ਹਿਆਂ ਵਿੱਚ ਡਿਪਟੀ ਕਮਿਸ਼ਨਰ ਵਜੋਂ ਆਪਣੇ ਕਾਰਜਕਾਲ ਦੌਰਾਨ ਵਿੱਤੀ ਬੇਨਿਯਮੀਆਂ ਦੇ ਕਈ ਗੰਭੀਰ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਈਡੀ ਨੇ ਮਨਰੇਗਾ ਘੁਟਾਲੇ ਦੇ ਇੱਕ ਮਾਮਲੇ ਵਿੱਚ ਹਾਈਕੋਰਟ ਦੇ ਹੁਕਮਾਂ ‘ਤੇ ਪੂਰੇ ਮਾਮਲੇ ਦੀ ਜਾਣਕਾਰੀ ਨਾਲ ਜੁੜਿਆ ਪੱਤਰ ਦਾਖ਼ਲ ਕੀਤਾ ਸੀ। ਖੁੰਟੀ ਵਿੱਚ ਮਨਰੇਗਾ ਵਿੱਚ 18.06 ਕਰੋੜ ਰੁਪਏ ਦੇ ਘਪਲੇ ਦੇ ਸਮੇਂ ਪੂਜਾ ਸਿੰਘਲ ਉੱਥੇ ਡਿਪਟੀ ਕਮਿਸ਼ਨਰ ਸਨ।
ਇਸਦੇ ਨਾਲ ਹੀ ਚਤਰਾ ‘ਚ ਵੀ ਪੂਜਾ ਸਿੰਘਲ ਅਗਸਤ 2007 ਤੋਂ 2008 ਤੱਕ ਡਿਪਟੀ ਕਮਿਸ਼ਨਰ ਰਹੀ ਅਤੇ ਉੱਥੇ ਵੀ ਉਨ੍ਹਾਂ ‘ਤੇ ਗੜਬੜੀ ਦੇ ਦੋਸ਼ ਲੱਗੇ ਸਨ। ਪਲਾਮੂ ‘ਚ ਡਿਪਟੀ ਕਮਿਸ਼ਨਰ ਰਹਿੰਦਿਆਂ ਪੂਜਾ ਸਿੰਘਲ ‘ਤੇ ਮਾਈਨਿੰਗ ਲਈ ਕਰੀਬ 83 ਏਕੜ ਜ਼ਮੀਨ ਇਕ ਨਿੱਜੀ ਕੰਪਨੀ ਨੂੰ ਟਰਾਂਸਫਰ ਕਰਨ ਦਾ ਦੋਸ਼ ਹੈ।