ਚੰਡੀਗੜ੍ਹ 14 ਅਕਤੂਬਰ 2022: ਹਰਿਆਣਾ ‘ਚ ਸੁਪਰੀਮ ਕੋਰਟ ਦੀ ਪਾਬੰਦੀ ਦੇ ਬਾਵਜੂਦ ਨਜਾਇਜ਼ ਪਟਾਕੇ ਵੇਚਣ ਲਈ ਅਜਿਹਾ ਤਰੀਕਾ ਅਪਣਾਇਆ ਗਿਆ ਕਿ ਹਰ ਕੋਈ ਦੰਗ ਰਹਿ ਜਾਵੇਗਾ। ਫਰੀਦਾਬਾਦ ਦੇ ਨੇੜੇ ਪਲਵਲ (Palwal) ਦੇ ਬਘੋਲਾ ਪਿੰਡ ਦੇ ਕੋਲ ਜੰਗਲ ਵਿੱਚ ਦੂਰ ਤੱਕ ਫੈਲੇ ਪਾਣੀ ਦੇ ਵਿਚਕਾਰ ਇੱਕ ਟਾਪੂ ਵਰਗੀ ਜਗ੍ਹਾ ‘ਤੇ ਗੋਦਾਮ ਬਣਾ ਕੇ ਗੈਰ-ਕਾਨੂੰਨੀ ਤਰੀਕੇ ਨਾਲ ਕਰੋੜਾਂ ਦੇ ਪਟਾਕੇ ਭਰੇ ਗਏ। ਸੀਜੀਐਸਟੀ (CGST) ਟੀਮ ਨੂੰ ਰੇਡ ਕਰਨ ਲਈ ਪਾਣੀ ਦੇ ਵਿਚਕਾਰ ਟਰੈਕਟਰ ਰਾਹੀਂ ਜਾਣਾ ਪਿਆ। ਸੀਜੀਐਸਟੀ ਟੀਮ ਨੇ ਇਨ੍ਹਾਂ 21 ਗੋਦਾਮਾਂ ਤੋਂ 50.88 ਲੱਖ ਰੁਪਏ ਦੀ ਨਕਦੀ ਤੋਂ ਇਲਾਵਾ 10 ਕਰੋੜ ਰੁਪਏ ਦੇ ਪਟਾਕੇ ਜ਼ਬਤ ਕੀਤੇ ਹਨ।

ਦੱਸਿਆ ਜਾ ਰਿਹਾ ਹੈ ਕਿ ਟੀਮ ਨੂੰ ਸੂਚਨਾ ਮਿਲੀ ਸੀ ਕਿ ਪਲਵਲ ਦੇ ਬਘੋਲਾ ਪਿੰਡ ਨੇੜੇ ਇੱਕ ਕੰਪਨੀ ਪਾਬੰਦੀ ਦੇ ਬਾਵਜੂਦ ਗੋਦਾਮ ਵਿੱਚ ਪਟਾਕੇ ਵੇਚ ਰਹੀ ਹੈ, ਇਸਤੋਂ ਬਾਅਦ ਕੇਂਦਰੀ ਵਸਤੂ ਅਤੇ ਸੇਵਾ ਕਰ (ਸੀਜੀਐਸਟੀ) ਕਮਿਸ਼ਨਰੇਟ ਫਰੀਦਾਬਾਦ ਦੀ ਟੀਮ ਗੈਰ-ਕਾਨੂੰਨੀ ਪਟਾਕਿਆਂ ਅਤੇ ਜੀਐਸਟੀ ਦੀ ਅਦਾਇਗੀ ਕੀਤੇ ਬਿਨਾਂ ਪਟਾਕੇ ਵੇਚਣ ਦੀ ਸੂਚਨਾ ‘ਤੇ ਟਰੈਕਟਰਾਂ ‘ਤੇ ਰਵਾਨਾ ਹੋਈ ਅਤੇ ਛਾਪੇਮਾਰੀ ਕੀਤੀ ਗਈ | ਇਹ ਛਾਪੇਮਾਰੀ ਵਧੀਕ ਕਮਿਸ਼ਨਰ ਇਵਗਨ ਰਾਜੇਸ਼ ਕੁਮਾਰ ਦੀ ਅਗਵਾਈ ਹੇਠ 4 ਟੀਮਾਂ ਬਣਾ ਕੇ ਕੀਤੀ ਗਈ ਹੈ ।

10 ਅਕਤੂਬਰ ਨੂੰ ਸੁਪਰੀਮ ਕੋਰਟ ਅਤੇ ਐਨਜੀਟੀ ਨੇ ਗ੍ਰੀਨ ਪਟਾਕਿਆਂ ਨੂੰ ਛੱਡ ਕੇ ਹਰ ਤਰ੍ਹਾਂ ਦੇ ਪਟਾਕਿਆਂ ‘ਤੇ ਪਾਬੰਦੀ ਲਗਾ ਦਿੱਤੀ ਸੀ। ਇਸ ਸਬੰਧੀ ਹਰਿਆਣਾ ਰਾਜ ਪ੍ਰਦੂਸ਼ਣ ਕੰਟਰੋਲ ਬੋਰਡ ਵੱਲੋਂ ਆਦੇਸ਼ ਦਿੱਤੇ ਗਏ ਹਨ। ਇਹ ਹੁਕਮ ਐਨਸੀਆਰ ਨਾਲ ਲੱਗਦੇ ਹਰਿਆਣਾ ਦੇ ਖੇਤਰਾਂ ਵਿੱਚ ਲਾਗੂ ਹਨ।