ਚੰਡੀਗੜ੍ਹ, 17 ਜੂਨ, 2024: ਪਾਕਿਸਤਾਨ ਕ੍ਰਿਕਟ ਟੀਮ ਦੇ ਕਪਤਾਨ ਬਾਬਰ ਆਜ਼ਮ (Babar Azam) ਦਾ ਮੰਨਣਾ ਹੈ ਕਿ ਟੀਮ ਦੇ ਸਾਰੇ ਖਿਡਾਰੀ ਟੀਮ ਵਰਕ ‘ਚ ਅਸਫਲ ਰਹੇ ਅਤੇ ਇਹੀ ਕਾਰਨ ਹੈ ਟੀ-20 ਵਿਸ਼ਵ ਕੱਪ ‘ਚ ਉਨ੍ਹਾਂ ਦੀ ਟੀਮ ਨੇ ਫਲਾਪ ਪ੍ਰਦਰਸ਼ਨ ਕੀਤਾ। ਪਾਕਿਸਤਾਨ, ਜੋ ਕਿ ਸੁਪਰ-8 ਵਿਚ ਪਹੁੰਚਣ ਤੋਂ ਪਹਿਲਾਂ ਹੀ ਬਾਹਰ ਹੋ ਗਿਆ ਸੀ, ਉਨ੍ਹਾਂ ਨੇ ਐਤਵਾਰ, 16 ਜੂਨ ਨੂੰ ਫਲੋਰੀਡਾ ਵਿਚ ਆਇਰਲੈਂਡ ਦੇ ਖ਼ਿਲਾਫ਼ ਜਿੱਤ ਪ੍ਰਾਪਤ ਕੀਤੀ। ਹਾਲਾਂਕਿ, ਉਨ੍ਹਾਂ ਨੂੰ ਜਿੱਤ ਲਈ ਸਖ਼ਤ ਮਿਹਨਤ ਕਰਨੀ ਪਈ ਕਿਉਂਕਿ ਟੀਮ ਦੀ ਬੱਲੇਬਾਜ਼ੀ ਇਕ ਵਾਰ ਫਿਰ ਕਮਜ਼ੋਰ ਸੀ।
ਜਿੱਤ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ ‘ਚ ਬਾਬਰ ਆਜ਼ਮ ਨੇ ਕਿਹਾ ਕਿ ਪਾਕਿਸਤਾਨ ਦਾ ਖਰਾਬ ਪ੍ਰਦਰਸ਼ਨ ਕਿਸੇ ਇਕ ਵਿਅਕਤੀ ਕਾਰਨ ਨਹੀਂ ਹੈ। ਮੈਂ ਹਰ ਕਿਸੇ ਦੀ ਜਗ੍ਹਾ ‘ਤੇ ਨਹੀਂ ਖੇਡ ਸਕਦਾ, ਅਸੀਂ ਚੀਜ਼ਾਂ ਨੂੰ ਸਹੀ ਢੰਗ ਨਾਲ ਨਹੀਂ ਚਲਾ ਸਕੇ।
ਬਾਬਰ (Babar Azam) ਨੇ ਕਿਹਾ, ਜਿੱਥੋਂ ਤੱਕ ਕਪਤਾਨੀ ਦਾ ਸਵਾਲ ਹੈ, ਪਹਿਲਾਂ ਮੈਂ ਆਪਣੇ ਮਨ ਨਾਲ ਕਪਤਾਨੀ ਛੱਡ ਦਿੱਤੀ ਸੀ। ਮੈਂ ਖੁਦ ਇਸ ਦਾ ਐਲਾਨ ਕੀਤਾ ਸੀ। ਜਦੋਂ ਕਪਤਾਨੀ ਵਾਪਸ ਦਿੱਤੀ ਜਾਂਦੀ ਹੈ, ਇਹ ਪੀਸੀਬੀ (ਪਾਕਿਸਤਾਨ ਕ੍ਰਿਕਟ ਬੋਰਡ) ਦਾ ਫੈਸਲਾ ਹੈ। ਹੁਣ ਅਸੀਂ ਜਾਵਾਂਗੇ, ਬੈਠ ਕੇ ਵਿਚਾਰ ਕਰਾਂਗੇ ਅਤੇ ਬਾਅਦ ਵਿੱਚ ਇਹ ਫੈਸਲਾ ਲਵਾਂਗੇ। ਹਾਲਾਂਕਿ ਜਦੋਂ ਮੈਨੂੰ ਕਪਤਾਨੀ ਛੱਡਣੀ ਪਵੇਗੀ ਤਾਂ ਮੈਂ ਖੁੱਲ੍ਹ ਕੇ ਦੱਸਾਂਗਾ। ਫਿਲਹਾਲ ਮੈਂ ਇਸ ਬਾਰੇ ਕੁਝ ਨਹੀਂ ਸੋਚਿਆ ਹੈ। ਪੀਸੀਬੀ ਵੱਲੋਂ ਜੋ ਵੀ ਫੈਸਲਾ ਲਿਆ ਜਾਵੇਗਾ।
ਬਾਬਰ ਆਜ਼ਮ ਨੇ ਕਿਹਾ, ‘ਹਰ ਕੋਈ ਦੁਖੀ ਹੈ। ਅਸੀਂ ਇੱਕ ਟੀਮ ਵਜੋਂ ਨਹੀਂ ਖੇਡੇ। ਮੈਂ ਤੁਹਾਨੂੰ ਦੱਸਿਆ ਕਿ ਅਸੀਂ ਇੱਕ ਖਿਡਾਰੀ ਦੇ ਕਾਰਨ ਨਹੀਂ ਹਾਰੇ। ਅਸੀਂ ਇੱਕ ਟੀਮ ਵਜੋਂ ਹਾਰ ਰਹੇ ਹਾਂ। ਮੈਂ ਇਹ ਕਿਸੇ ਇੱਕ ਵਿਅਕਤੀ ਕਰਕੇ ਨਹੀਂ ਕਹਿ ਰਿਹਾ। ਤੁਸੀਂ ਇਸ਼ਾਰਾ ਕਰ ਰਹੇ ਹੋ ਕਿ ਅਸੀਂ ਕਪਤਾਨ ਦੇ ਕਾਰਨ ਹਾਰੇ, ਪਰ ਮੈਂ ਹਰ ਖਿਡਾਰੀ ਦੀ ਜਗ੍ਹਾ ਨਹੀਂ ਖੇਡ ਸਕਦਾ। ਇੱਥੇ 11 ਖਿਡਾਰੀ ਹਨ ਅਤੇ ਉਨ੍ਹਾਂ ਵਿੱਚੋਂ ਹਰ ਇੱਕ ਦੀ ਆਪਣੀ ਭੂਮਿਕਾ ਹੈ। ਇਸੇ ਲਈ ਉਹ ਇੱਥੇ ਵਿਸ਼ਵ ਕੱਪ ਖੇਡਣ ਆਏ ਹਨ।
ਮੈਂ ਸੋਚਦਾ ਹਾਂ ਕਿ ਇੱਕ ਟੀਮ ਦੇ ਰੂਪ ਵਿੱਚ ਅਸੀਂ ਲਾਗੂ ਕਰਨ, ਪਾਲਣਾ ਕਰਨ ਅਤੇ ਚੀਜ਼ਾਂ ਨੂੰ ਪੂਰਾ ਕਰਨ ਦੇ ਯੋਗ ਨਹੀਂ ਰਹੇ ਹਾਂ। ਸਾਨੂੰ ਸ਼ਾਂਤ ਹੋ ਕੇ ਸਵੀਕਾਰ ਕਰਨਾ ਹੋਵੇਗਾ ਕਿ ਅਸੀਂ ਟੀਮ ਦੇ ਤੌਰ ‘ਤੇ ਚੰਗਾ ਪ੍ਰਦਰਸ਼ਨ ਨਹੀਂ ਕੀਤਾ।