ਚੰਡੀਗੜ੍ਹ,16 ਮਈ 2023: ਜੇਮਸ ਕੈਮਰਨ ਦੀ ਫਿਲਮ ‘ਅਵਤਾਰ ਦਿ ਵੇ ਆਫ ਵਾਟਰ’ (Avatar The Way Of Water) ਸਿਨੇਮਾਘਰਾਂ ‘ਚ ਕਾਫੀ ਹਿੱਟ ਰਹੀ ਸੀ। ਇਹ ਫਿਲਮ ਦੁਨੀਆ ਵਿੱਚ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀਆਂ ਫਿਲਮਾਂ ਦੀ ਸੂਚੀ ਵਿੱਚ ਸ਼ਾਮਲ ਹੋ ਗਈ ਹੈ। ਹੁਣ ਜਿਹੜੇ ਲੋਕ ਇਸ ਫਿਲਮ ਨੂੰ ਸਿਨੇਮਾਘਰਾਂ ‘ਚ ਨਹੀਂ ਦੇਖ ਸਕੇ ਹਨ, ਉਹ ਹੁਣ ਇਸ ਨੂੰ ਬਹੁਤ ਜਲਦ OTT ‘ਤੇ ਦੇਖ ਸਕਣਗੇ। ਪ੍ਰਸ਼ੰਸਕਾਂ ਦੇ ਇੰਤਜ਼ਾਰ ਨੂੰ ਦੇਖਦੇ ਹੋਏ ਨਿਰਮਾਤਾਵਾਂ ਨੇ ਐਲਾਨ ਕੀਤਾ ਹੈ ਕਿ ਬਹੁਤ ਜਲਦੀ ਇਹ ਫਿਲਮ OTT ‘ਤੇ ਰਿਲੀਜ਼ ਹੋਣ ਜਾ ਰਹੀ ਹੈ।
ਪਿਛਲੇ ਸਾਲ ਸਿਨੇਮਾਘਰਾਂ ਵਿੱਚ ਇੱਕ ਵੱਡੀ ਦੌੜ ਤੋਂ ਬਾਅਦ, ਅਵਤਾਰ ਦਿ ਵੇ ਆਫ਼ ਵਾਟਰ ਹੁਣ ਭਾਰਤ ਵਿੱਚ ਡਿਜ਼ਨੀ ਪਲੱਸ ਹੌਟਸਟਾਰ ‘ਤੇ ਸਟ੍ਰੀਮ ਕਰ ਰਿਹਾ ਹੈ। ਪਲੇਟਫਾਰਮ ਨੇ ਮੰਗਲਵਾਰ ਨੂੰ ਕਿਹਾ ਕਿ ਇਹ ਫਿਲਮ ਅੰਗਰੇਜ਼ੀ ਤੋਂ ਇਲਾਵਾ ਤਾਮਿਲ, ਤੇਲਗੂ, ਮਲਿਆਲਮ, ਕੰਨੜ ਅਤੇ ਹਿੰਦੀ ਵਿੱਚ 7 ਜੂਨ ਨੂੰ ਸਟ੍ਰੀਮਿੰਗ ਲਈ ਉਪਲਬਧ ਹੋਵੇਗੀ।
ਤੁਹਾਨੂੰ ਦੱਸ ਦੇਈਏ ਕਿ ਇਹ ਫਿਲਮ ਪਹਿਲਾਂ ਹੀ ਰੈਂਟਲ ਪਲਾਨ ਦੇ ਤਹਿਤ ਡਿਜੀਟਲ ਪਲੇਟਫਾਰਮ ‘ਤੇ ਰਿਲੀਜ਼ ਹੋ ਚੁੱਕੀ ਹੈ। ਇਸ ਤੋਂ ਪਹਿਲਾਂ ਪ੍ਰਾਈਮ ਵੀਡੀਓ ਅਤੇ ਗੂਗਲ ਐਪ ‘ਤੇ ਵੀ ਇਸ ਫਿਲਮ ਨੂੰ ਦੇਖਣ ਦੇ ਵਿਕਲਪ ਸਨ। ਹਾਲਾਂਕਿ ਇਨ੍ਹਾਂ ਪਲੇਟਫਾਰਮਾਂ ‘ਤੇ ਫਿਲਮ ਦੇਖਣ ਲਈ ਲਗਭਗ 850 ਰੁਪਏ ਖਰਚ ਕਰਨੇ ਪੈਂਦੇ ਸਨ, ਪਰ ਹੁਣ ਡਿਜ਼ਨੀ ਦੇ ਗ੍ਰਾਹਕਾਂ ਇਸ ਫਿਲਮ ਨੂੰ ਮੁਫਤ ਵਿਚ ਦੇਖ ਸਕਣਗੇ।
ਅਵਤਾਰ ਦਿ ਵੇ ਆਫ ਵਾਟਰ (Avatar The Way Of Water) ਪਿਛਲੇ ਸਾਲ 16 ਦਸੰਬਰ ਨੂੰ ਰਿਲੀਜ਼ ਹੋਇਆ ਸੀ। ਜਿਸ ਨੂੰ ਦੇਖ ਕੇ ਲੋਕ ਕਾਫੀ ਉਤਸ਼ਾਹਿਤ ਸਨ। ਇਸ ਫਿਲਮ ਨੇ ਭਾਰਤ ‘ਚ ਵੀ ਕਾਫੀ ਕਮਾਈ ਕੀਤੀ ਅਤੇ ਦੁਨੀਆ ਭਰ ‘ਚ ਵੀ ਇਸ ਨੇ ਜ਼ਬਰਦਸਤ ਕਾਰੋਬਾਰ ਕੀਤਾ। ਇਹ ਫਿਲਮ ਦੁਨੀਆ ਦੀ ਤੀਜੀ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀ ਫਿਲਮ ਬਣ ਗਈ ਹੈ। ਪਹਿਲੀ ਫਿਲਮ ਅਵਤਾਰ ਹੈ ਜਿਸ ਨੇ $2.92 ਬਿਲੀਅਨ ਦੀ ਕਮਾਈ ਕੀਤੀ, ਜਦੋਂ ਕਿ ਦੂਜੇ ਨੰਬਰ ‘ਤੇ ਐਵੇਂਜਰਸ ਐਂਡਗੇਮ $2.79 ਬਿਲੀਅਨ ਹੈ। ਅਤੇ ਤੀਜਾ ਸਥਾਨ ਅਵਤਾਰ 2 ਨੇ ਹਾਸਲ ਕੀਤਾ।